ەلوردادا ناۋرىز مەرەكەسىنە وراي 100-دەن استام ءىس-شارا وتەدى. قالا تۇرعىندارى كونتسەرتتەرگە, كورمەلەرگە, قويىلىمدارعا, ۇلتتىق سپورت تۇرلەرى بويىنشا جارىستارعا, سەرۋەنگە جانە باسقا دا مەرەكەلىك باعدارلامالارعا قاتىسا الادى.
22 ناۋرىزدا ساعات 11:00-دەن 15:00-گە دەيىن بارلىق اۋداندا, سونىڭ ىشىندە ەلوردانىڭ ەلدى مەكەندەرىندە «ناۋرىز دۋمان 2022» مادەني-بۇقارالىق ءىس-شارالار ۇيىمداستىرىلادى. بۇل كۇنى مەرەكەنىڭ باستى بەلگىسى – ناۋرىز كوجە ۇلتتىق تاعامى دا جۇرتشىلىققا تاراتىلادى.
الماتى اۋدانىندا مەرەكەلىك ءىس-شارالار «قازاق ەلى» مونۋمەنتى الاڭىندا, «ستۋدەنتتەر» ساياباعىندا, بايقوڭىر اۋدانىندا – «اتاتۇرىك» ساياباعىندا, جازۋشىلار اللەياسىندا, ەسىل اۋدانىندا – ەكسپو اۋماعىندا جانە ۇركەر ەلدى مەكەنىندە, سارىارقا اۋدانىندا – «كوكتال» ساياباعىندا جانە Demalys Promenade الاڭىندا وتەدى.
ناۋرىز مەيرامىنا وراي قايىرىمدىلىق ءىس-شارالار دا ۇيىمداستىرىلادى. اتاپ ايتقاندا, 18-19 ناۋرىزدا قالادا الەۋمەتتىك از قامتىلعان, كوپبالالى وتباسىلارعا, جالعىزباستى قارت ادامدارعا جانە حالىقتىڭ الەۋمەتتىك وسال توپتارىنىڭ باسقا دا ساناتتارىنا ازىق-تۇلىك سەبەتتەرى تاراتىلادى.
