«نۇر وتان» پارتياسى استانا قالالىق فيليالىنىڭ كەزەكتەن تىس وتكەن XXVI كونفەرەنتسياسىندا فيليالدىڭ جاڭا توراعاسى سايلاندى.
دەلەگاتتار بۇل قىزمەتكە استانا قالاسىنىڭ اكىمى باقىت سۇلتانوۆتى تاعايىنداۋ تۋرالى ۇسىنىستى ءبىراۋىزدان قولدادى.
«يسەكەشەۆ اسەت ورەنتايۇلى باسقا جۇمىسقا اۋىسۋىنا بايلانىستى «نۇر وتان» پارتياسى استانا قالالىق فيليالىنىڭ توراعاسى قىزمەتىنەن بوساتىلىپ, استانا قالاسىنىڭ اكىمى سۇلتانوۆ باقىت تۇرلىحانۇلى «نۇر وتان» پارتياسى استانا قالالىق فيليالىنىڭ توراعاسى قىزمەتىنە تاعايىندالسىن» دەلىنگەن كونفەرەنتسيا قاۋلىسىندا.
سونداي-اق, جاڭا اكىم ارنايى قاۋلىمەن «نۇر وتان» پارتياسى استانا قالالىق فيليالىنىڭ ساياسي كەڭەس قۇرامىنا قوسىلدى.
«باقىت تۇرلىحانۇلىنىڭ مەملەكەتتىك قىزمەتتە تاجىريبەسى مول. ءتۇرلى لاۋازىمداردا قىزمەت ەتتى. ەندى, مىنە, مەملەكەت باسشىسىنىڭ تاپسىرماسىمەن اكىم بولىپ تاعايىندالدى. بۇل ۇلكەن سەنىمدى بىلدىرەدى. ءوزىمنىڭ جانە ارىپتەستەرىمنىڭ اتىنان باقىت سۇلتانوۆتى استانالىق فيليالعا – پارتيانىڭ ەڭ ۇلگىلى فيليالىنا توراعالىققا كەلۋىمەن قۇتتىقتايمىن» دەدى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ.
