نۇرگۇل – «قازاق ارۋى»
بەيبىتشىلىك جانە كەلىسىم سارايىندا «قازاق ارۋى» سۇلۋلىق بايقاۋىنىڭ فينالى ءوتتى. بايقاۋعا ەلىمىزدىڭ ەڭ ادەمى دەگەن 16 قىزى قاتىستى. ولار 600-دەن اسا قىزداردىڭ ىشىنەن ىرىكتەلىپ شىققان حاس سۇلۋلار بولاتىن.
«قازاق ارۋى» بايقاۋى ەلىمىزدە التى جىلدان بەرى ءدال وسى ناۋرىز ايىندا ءوتىپ كەلە جاتىر. بايقاۋدىڭ شارتى بويىنشا ۇمىتكەرلەر مىندەتتى تۇردە قازاق ءتىلىن ءبىلۋى كەرەك. سونداي-اق, قىزدار قازاقتىڭ ادەبيەتى مەن تاريحىن جانە دە سالت-داستۇرلەرىن جەتە بىلۋگە مىندەتتەلگەن. وسى تالاپتاردان سۇرىنبەي وتكەن 16 قىز «قازاق ارۋى» بايقاۋىنا قاتىسۋعا مۇمكىندىك الدى.
قازىلار القاسىنىڭ ءتورايىمى قر پارلامەنتى سەناتىنىڭ دەپۋتاتى بىرعانىم ءايتىموۆا بولسا, ال ونىڭ قۇرامىنا جوبانىڭ پروديۋسەرى ءارى يدەيا اۆتورى بايان ەسەنتاەۆا, تەلەجۋرناليست ايگۇل مۇكەي, ديزاينەر ايدا قاۋمەنوۆا كىردى. سونداي-اق, استانا قالاسىنىڭ مادەنيەت باسقارماسىنىڭ باسشىسى بولات ماجاعۇلوۆ, ءارتىس ەرىك جولجاقسىنوۆ, تەلەجۇرگىزۋشى دينارا ءساتجان, اقىن قالقامان سارين, ءانشى بۇركىت جانە «قازاق ارۋى-2016» بايقاۋىنىڭ باس جۇلدەگەرى الميرا احاتوۆا قازىلىق ەتتى.
قازىلار القاسىنىڭ شەشىمى بويىنشا باتىسقازاقستاندىق نۇرگۇل اسانوۆا جەڭىمپاز اتاندى. ءبىرىنشى ورىندى قىزىلوردالىق زۋحرا سايپي, ەكىنشى ورىندى اقتوبە وبلىسىنىڭ تۋماسى گۇلجانات جۇماجانوۆا يەمدەندى. ال ءۇشىنشى ورىن قاراعاندىلىق ايگەرىم ورىنبەكوۆاعا بۇيىردى.