ەلىمىزدىڭ استاناسى نەبىر ىسكەرلىك جيىنداردىڭ ورتالىعىنا اينالدى. كۇن سايىن ەلىمىزدىڭ ءار ايماعىنان كەلەتىن قوناقتار مەن شەتەلدىك تۋريستەر سانىندا شەك جوق. وسى رەتتە جاڭادان بوي كوتەرگەن «نۇرلى جول» ۆوكزالى ءبىر مەزەتتە 35 مىڭ ادامدى ەمىن-ەركىن قابىلداي الاتىنى قۋانتادى. حان-شاتىر, بايتەرەك, بەيبىتشىلىك جانە كەلىسىم سارايى, اقوردا… ءبىر ءتۇزۋ سىزىقتىڭ بويىندا ورنالاسقان عيماراتتار ءتىزىمىن ەندى «نۇرلى جول» ۆوكزالى تولىقتىردى.
التى قاباتتى الىپ عيمارات
قازىرگى تاڭدا التى قاباتتان تۇراتىن الىپ عيماراتقا 27 جولاۋشىلار پويىزى كەلىپ كەتەدى. العاشقى ەكى قاباتىنداعى اۆتوتۇراققا 740 كولىك ەمىن-ەركىن سىيادى. ءۇشىنشى قابات – پەررون, ءتورتىنشى قابات – جولاۋشىلاردى پەررونعا شىعاراتىن زال, ال بەسىنشى-التىنشى قاباتتا كوممەرتسيالىق ورتالىقتار بوي كوتەرگەن. وندا كەلۋشىلەرگە بارلىق جاعداي جاسالعان.
دەمالۋعا, تاماقتانۋعا, دۇكەن ارالاۋعا, ءتىپتى ءوز شارۋاسىمەن اينالىسۋعا ارنالعان ورىندار بارشىلىق. ۆوكزالدىڭ ەڭ باستى ەرەكشەلىگى دە سول, مۇمكىندىگى شەكتەۋلى جانداردىڭ بارلىق مۇددەسى ەسكەرىلگەن.
ال تۋريستەرگە ارنالعان ارناۋلى بۇرىشتا جان-جاقتى اقپاراتتار مەن بيلەت ساتۋ نۇكتەلەرى توپتاستىرىلعان. قالا تۇرعىندارى مەن قوناقتارى ءۇشىن 52 ەسكالاتور مەن 26 ليفت ورناتىلعان.
«جاسىل تەحنولوگيالار» جەتىستىگى
جاڭا ۆوكزالدا جاڭا تەحنولوگيالار جەتىستىگى قولدانىسقا ەنگىزىلگەن. ماسەلەن, عيمارات شاتىرىندا جيناقتالعان جاڭبىر سۋىن تەحنيكالىق قاجەتتىلىكتەرگە, ماڭايىنداعى اعاشتاردى سۋعارۋعا جۇمسايدى. اۋا باپتاۋ جۇيەسىندە دە جاڭاشىلدىق بار. سۋىق بولىپ تۇرعان جەرگە جىلى اۋانى ايداۋ ارقىلى ەنەرگيا ۇنەمدەلەدى.
ەسكى تەمىرجول ۆوكزالى 12 مىڭ ادامعا شاقتالسا, جاڭا ۆوكزالعا ءبىر مەزەتتە 35 مىڭداي ادام ەمىن-ەركىن كەلىپ-كەتە الادى. قازىرگى ۋاقىتتا 40-50 پويىز قاتىنايدى. ۆوكزالدىڭ قاۋىپسىزدىگىنە ەرەكشە كوڭىل بولىنگەن. عيماراتتا ادامداردى تەكسەرىستەن وتكىزەتىن اقىلدى 16 كىرەبەرىس بار جانە 510 كامەرامەن جابدىقتالعان.
گۇلميرا ايماعانبەت
