نۇرسۇلتان نازارباەۆ: ءار ادام ماماندىعىن دۇرىس تاڭداي ءبىلۋى كەرەك
كەشە استانادا №75 كوپ سالالى جاڭا مەكتەپ اشىلدى. ونىڭ تۇساۋكەسەرىنە ەلباسى نۇرسۇلتان نازارباەۆ قاتىسىپ, بارشا قازاقستاندىقتاردى ءبىلىم كۇنىمەن قۇتتىقتادى.
–بيىلعى ءبىلىم كۇنىندە ەلىمىزدەگى بارلىق 7 600 مەكتەپتە 2 ملن 600 مىڭ بالا مەكتەپكە باردى. سونىڭ ىشىندە 300 مىڭ وقۋشى پارتاعا العاش رەت وتىردى. بۇل وتكەن جىلمەن سالىستىرعاندا 70 مىڭعا كوپ. مۇنىڭ ءوزى جاستارىمىزدىڭ ءوسىپ كەلە جاتقانىن, حالقىمىزدىڭ سانى كوبەيىپ كەلە جاتقانىنىڭ كورسەتكىشى, – دەدى قۇتتىقتاۋ سوزىندە پرەزيدەنت.
ەلباسى تاۋەلسىزدىك جىلدارىندا ءبىر مىڭداي مەكتەپ ىسكە قوسىلعانىن ايتا كەلىپ, سونىڭ ىشىندە 150-ءى بيىل پايدالانۋعا بەرىلەتىنىن جەتكىزدى. ال بيىلعى 1 قىركۇيەكتە ەلىمىز بويىنشا 63 جاڭا مەكتەپ وقۋشىلارعا ەسىگىن ايقارا اشىپتى.
مەملەكەت باسشىسى ەلىمىزدىڭ بولاشاعى – مۇعالىمدەردىڭ قولىندا ەكەندىگىن ايتا كەلە, رەسپۋبليكا مەكتەپتەرىندە 300 مىڭ ۇستاز جۇمىس ىستەيتىنىن, سونىڭ 11 مىڭنان استامى ەلوردادا ەڭبەك ەتىپ جاتقانىن اتاپ ءوتتى.
ء–بىز بالالاردى پاتريوتتىق پەن تولەرانتتىلىق رۋحىندا تاربيەلەي ءبىلۋىمىز كەرەك. ولار دوستىققا ادال بولىپ, اتا-انا مەن ۇلكەندەردى قۇرمەتتەيتىن ازاماتتار بولىپ وسۋگە ءتيىس. ورتاق قوعامداعى ەشقاشان ءمانىن جوعالتپايتىن قۇندىلىقتاردى وسكەلەڭ ۇرپاققا ميراس ەتۋ – پارىزىمىز. بارشا قازاقستاندىقتاردى بۇگىنگى ءبىلىم كۇنىمەن قۇتتىقتايمىن. بالالارىمىز, جاستارىمىز باقىتتى بولسىن! سولاردىڭ باعى مەن بولاشاعى ءۇشىن ءبىز 2050 باعدارلاماسىن جاسادىق. قازىرگى ۇرپاعىمىز ءوسىپ-جەتىلەمىن دەگەنشە, باعدارلامامىزداعى مىندەت-ماقساتتار دا ورىندالىپ بىتەدى. دەمەك, ونىڭ جەمىسىن جاستارىمىز كورەتىن بولادى, – دەدى نۇرسۇلتان نازارباەۆ.
مەملەكەت باسشىسى ارالاپ كورگەن ەسىلدىڭ سول جاعالاۋىنداعى №75 كوپ سالالى مەكتەپ 1300 وقۋشىعا ارنالعان ەكەن. جاڭا مەكتەپ 1313 وقۋشىعا ەسiگiن اشىپ وتىر. باستان-اياق زاماناۋي قۇرىلعىلارمەن جابدىقتالعان ءبىلىم وشاعىندا 56 سىنىپ بولمەسى, ات شاپتىرىم ءماجىلىس زالى, ەلەكتروندىق ابونەمەنتتiك كiتاپحانا بار. بۇعان قوسا, وقۋشىلاردىڭ تاجىريبەسىن شىڭداۋعا ارنالعان عارىش, مەديتسينا, پەداگوگيكالىق جانە اقپاراتتىق تەحنولوگيالىق زەرتحانالار مەن لەكتسيالىق سىنىپتار ورنالاسقان. بۇل كابينەتتەردىڭ تۇگەلى ساباققا قاجەتتى قۇرىلعىلارمەن قامتاماسىز ەتىلىپتى.
ەلباسى مەكتەپتىڭ مۇعالىمدەرى مەن وقۋشىلارىنا بىلىمگە, ماماندىق تاڭداۋعا قاتىستى ءدارىس وقىپ, «قازاقستان – 2050» ستراتەگياسىنا قاتىستى اشىق ساباققا قاتىستى.
مۇعالىمدەرمەن اڭگىمەلەسىپ, جەتكىنشەكتەرگە اقىل-كەڭەسىن ايتقان ەلباسى ەلىمىز دامىعان 30 مەملەكەتتىڭ قاتارىنا قوسىلۋعا تالپىنىپ وتىرعانىن, ول ءۇشىن ءار ادام بىلىمگە ۇمتىلىپ, ماماندىعىن دۇرىس تاڭداي ءبىلۋ كەرەكتىگىن ايتتى.
–جاس كەزىڭدە بارىنە ۇلگەرگىڭ كەلەدى, بىراق وعان ۋاقىت جەتە بەرمەيدى. سوندىقتان ءبىر كاسىپكە توقتالىپ, ونى بۇگە-شىگەسىنە دەيىن زەرتتەگەن ءجون. سوندا عانا جەتىستىككە جەتەسىڭدەر. كەز كەلگەن ۇجىمدا ءوز ءىسىن شەبەر بىلەتىن كاسىپقوي مامانداردى قۇرمەتتەيدى. سولاردى ۇلگى تۇتادى. سوندىقتان ءار ادام تاڭداعان ماماندىعىنىڭ شەبەرى بولۋعا ۇمتىلۋ كەرەك – دەدى ەلباسى.
قىمبات نۇرعالي
