جاڭا وقۋ جىلى قارساڭىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى «كەمەل ەل» جاستاردى تاربيەلەۋ ورتالىعىنىڭ مۇشەلەرى استانا قالاسىنداعى مەكتەپتەردىڭ بەلسەندى وقۋشىلارىمەن كەزدەستى.
ۇيىمداستىرۋشىلار باسقوسۋعا جوعارى سىنىپتاردا وقيتىن ۇزدىكتەردى, زياتكەرلىك سايىستار مەن سپورتتىق شارالاردىڭ جەڭىمپازدارىن شاقىرعان. ولار ەلباسىنىڭ كىتاپحاناسى ورنالاسقان, ساۋلەت ونەرىنىڭ بىرەگەي تۋىندىسى بولىپ تابىلاتىن جاڭا عيماراتتى العاشقىلاردىڭ ءبىرى بولىپ تاماشالادى. جاسوسپىرىمدەر مەملەكەت باسشىسى نۇرسۇلتان نازارباەۆتىڭ جەكە كىتاپحاناسىنا جانە ينتەراكتيۆتى ەكسپوزيتسيانىڭ مازمۇنىنا ەرەكشە قىزىعۋشىلىق ءبىلدىردى. بالالارمەن كەزدەسۋگە كەلگەن قازاقستان رەسپۋبليكاسىنىڭ پرەزيدەنتى كەڭسەسىنىڭ باستىعى, قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى مىندەتىن اتقارۋشى ماحمۇد قاسىمبەكوۆ رۋحاني وردانىڭ جۇمىسىنا ىنتالىلىعىن تانىتىپ, عىلىممەن اينالىسامىن دەگەن جەتكىنشەكتەردى ەلباسى كىتاپحاناسىمەن بىرگە جۇمىس ىستەۋگە شاقىردى.
جيىن بارىسىندا م.قاسىمبەكوۆ, ا.مولداعارينوۆ جانە ە.حاسەنوۆ ەلباسى كىتاپحاناسىمەن بىرلەسە شىعارعان ن.نازارباەۆ تۋرالى «ءبىزدىڭ پرەزيدەنت» اتتى كىتاپتىڭ تۇساۋى كەسىلدى. «الماتى كىتاپ باسپاسىنان» جارىق كورگەن دەرەكتى پوۆەست 2012 جىلى باسىلعان «نۇرسۇلتان نازارباەۆ. ءومىربايان» اتتى ەڭبەكتىڭ نەگىزىندە ورتا جانە جوعارى سىنىپ وقۋشىلارىنا ارنالىپ جازىلعان. قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ ديرەكتورى مىندەتىن اتقارۋشى, كىتاپ اۆتورلارىنىڭ جەتەكشىسى ماحمۇد قاسىمبەكوۆ بۇل باسىلىمنىڭ بارلىق وبلىستاعى ءبىلىم وشاقتارىنا, كىتاپحانالارعا تاراتىلاتىنىن جەتكىزدى. «نەگىزگى ءبىزدىڭ يدەيامىز ەلباسىنىڭ ءومىرى مەن قىزمەت جولىن مەكتەپ وقۋشىلارىنا تۇسىنىكتى تىلمەن جەتكىزۋ بولدى. بۇل كىتاپ 23 مىڭ دانامەن ورىس تىلىندە شىقتى, قازىر قازاق تىلىندەگى نۇسقاسى دايىندالۋدا. كەلەسى جىلدىڭ باسىندا قازاق تىلىندەگى نۇسقاسى 20-25 مىڭ دانامەن شىعارىلادى. سونداي-اق, بۇل كىتاپتار وڭىرلەردەگى مەكتەپتەرگە تاراتىلىپ بەرىلەدى. جاقىن ارادا جامبىل وبلىسىنا 1 مىڭعا تارتا كىتاپتى بەرگەلى وتىرمىز» دەدى ول.
وقىرمانعا جول تارتقان سۋ جاڭا ەڭبەكتە تۇڭعىش پرەزيدەنتتىڭ بالالىق شاعىنان ەر جەتىپ ەسەيگەن كەزىنە دەيىنگى ءومىرى, تەمىرتاۋدا قۇرىشتاي شىڭدالعان ۋاقىتى, ۋكراينادا العاشقى مەتاللۋرگيالىق ءبىلىم الا باستاعان كەزى, قىزمەت جولى, قاراعاندى وبلىسىنداعى العاشقى پارتيالىق قىزمەتتە بولعان كەزەڭى, پرەزيدەنت بولىپ, قازاقستاننىڭ مۇددەسىن قورعاپ, ىستەگەن ۇلكەن قىزمەتتەرى جايىندا مەكتەپ وقۋشىلارىنا تۇسىنىكتى ءتىلمەن جازىلعان. تۇساۋكەسەر ءراسىمىن وتكىزگەن جاستاردى تاربيەلەۋ ورتالىعىنىڭ مۇشەلەرى دە كىتاپتىڭ جەڭىل, قاراپايىم تىلمەن جازىلعاندىعىن ەرەكشە اتاپ ءوتتى. بۇل شىعارمانى وڭاي وقىپ, تەرەڭ ۇعىندىرادى. دەرەكتى پوۆەستى ەل, قوعام جانە جالپى الەم تۋرالى ءبىلىمدى جوعارىلاتۋدا بەرەرى مول بولعاندىقتان, قازاقستان تاريحىن زەرتتەۋدەگى قوسىمشا وقۋ قۇرالى رەتىندە پايدالانۋعا بولادى.
كىتاپتىڭ تۇساۋكەسەرىنە كەلگەن وقۋشىلار ءوز ريزاشىلىقتارىن ءبىلدىردى. «ەڭ باستى قۇندىلىق – تاۋەلسىزدىك. وسى جەردە ەلباسىمىزدىڭ جولداۋىنان دايەكسوز كەلتىرە كەتسەم: «تاۋەلسىزدىككە قول جەتكىزگەننەن گورى ونى ۇستاپ تۇرۋ الدەقايدا قيىن». بۇل – الەم كەڭىستىگىندە عۇمىر كەشكەن تالاي حالىقتىڭ باسىنان وتكەن تاريحي شىندىق. ءوزارا الاۋىزدىق پەن جان-جاققا تارتقان بەرەكەسىزدىك تالاي ەلدىڭ تاعدىرىن قۇردىمعا جىبەرگەن. تىرشىلىك تەزىنە توتەپ بەرە الماي, جەر بەتىنەن ۇلت رەتىندە جويىلىپ كەتكەن ەلدەر قانشاما. ءبىز وزگەنىڭ قاتەلىگىنەن, وتكەننىڭ تاعىلىمىنان ساباق الا بىلۋگە ءتيىسپىز. ول ساباقتىڭ ءتۇيىنى بىرەۋ عانا – ماڭگىلىك ەل بولۋ ءبىزدىڭ ءوز قولىمىزدا. بۇل ءۇشىن ءوزىمىزدى ۇنەمى قامشىلاپ, ۇدايى العا ۇمتىلۋىمىز كەرەك. بايلىعىمىز دا, باقىتىمىز دا بولعان ماڭگىلىك تاۋەلسىزدىگىمىزدى كوزدىڭ قاراشىعىنداي ساقتاي ءبىلۋىمىز كەرەك. مەن بۇل كىتاپتان العان اسەرىم جۇرەگىمنىڭ تورىندە ورىن الدى, پاتريوتتىق سەزىمىمدى وياتتى, تاۋەلسىزدىك پەن بەيبىت ءومىردىڭ قادىرىن جوعارى باعالاۋعا ۇيرەتتى. كىتاپتىڭ اۆتورلارىنا ۇلكەن العىسىمدى بىلدىرەمىن» دەدى «جاس ۇلان» رەسپۋبليكالىق اسكەري مەكتەبىنىڭ وقۋشىسى اقتورە ەستاەۆ.
«ءبىزدىڭ پرەزيدەنت» كىتابىنىڭ تۇساۋكەسەر راسىمىنەن كەيىن ماحمۇد قاسىمبەكوۆ وقۋشىلارعا جاڭا وقۋ جىلىندا تابىس تىلەپ, ءار بالاعا ءوز اتىنان «سەنىڭ ۇدايى جاقسى وقىپ, ەلىمىزدىڭ ءبىلىمدى ازاماتى, حالقىمىزدىڭ ماقتان تۇتار پەرزەنتى بولىپ وسۋىڭە شىن جۇرەكتەن تىلەكتەسپىن» دەگەن اقجارما تىلەگى جازىلعان كىتاپ تابىستادى. شارا سوڭى ەستەلىككە سۋرەتكە تۇسۋمەن اياقتالدى جانە بالالار ءۇشىن ەلباسىنىڭ كىتاپحاناسى بويىنشا ەكسكۋرسيا ۇيىمداستىرىلدى.
اسحات رايقۇل
