قالا كوشەلەرىنىڭ بىرىندە كەتىپ بارا جاتىپ, جول بويىنداعى قاپتاعان كولىكتىڭ ىشىنەن ساپ-سارى تۇسىمەن دارالانىپ, وزگەلەرگە قاراعاندا اسىقپاي قوزعالىپ كەلە جاتقان شاعىن اۆتوبۋسقا كوزىمىز ءتۇستى. بىردەن امەريكالىق كينولاردا ءجيى كورسەتىلەتىن بالالار اۆتوبۋسى ەسكە تۇسپەسى بار ما؟ ويىمىزدىڭ ارناسى دۇرىس ەكەنىن قابىرعاسىنداعى «Schoolbus» دەگەن جازۋدى وقىعاندا تۇسىندىك. سول ساتتە سانامىزدا سان سۇراق تۋىنداپ ۇلگەرگەن ەدى. ءمان-جايدى انىقتاۋ ءۇشىن جاۋاپتارىن ىزدەستىرە باستادىق…
ەڭ الدىمەن, اۆتوبۋس اتاۋىن Google دوسىمىزدان سۇراپ, تابىلعان مەكەنجايعا جول تارتتىق. «Highvill» تۇرعىن ءۇي كەشەنىندە ورنالاسقان كىشىگىرىم عانا كەڭسە ىشىنەن ءبىزدى ءوزىن البەرت ني دەپ تانىستىرعان «Schoolbus» ديرەكتورى جىلى قارسى الىپ, ءىستىڭ نەدەن باستاۋ العانىن بايانداي باستادى.
2013 جىلى جۇمىس بابىمەن جانۇياسىن ەرتىپ, اتىراۋدان استاناعا كوشىپ كەلگەن ول كىشكەنتاي قىزىن بالاباقشاعا ورنالاستىرادى. ۇنەمى جينالىستارعا قاتىسىپ, ىسساپارلارعا كەتۋگە تۋرا كەلەتىندىكتەن, ولاردىڭ الدىنان بالانى بالاباقشاعا جەتكىزۋ ماسەلەسى شىعا كەلەدى. جۇبايىمەن بىرگە تاسىمالداۋدى جۇزەگە اسىراتىن بىردە-ءبىر كومپانيانى تاپپاي قينالادى. ال تاكسي شاقىرىپ, ۇزاق كۇتەمىز دەپ, باراتىن جەرلەرىنە تالاي رەت كەشىگىپتى. سول كەزدە البەرتكە بالالاردى تاسىمالداۋمەن اينالىساتىن كومپانيا قۇرۋ تۋرالى وي كەلەدى. ءوزى كەلگەن جۇمىس فيليالى قايتادان اتىراۋعا اۋىسقاندا, ولار ەلوردادا قالۋدى ءجون ساناپ, «تاۋەكەل» دەپ, العاشقىدا ويعا كەلگەن وسى قيالدى ومىردە ورىنداۋعا كىرىسەدى. «ەڭ اۋەلى, اكە رەتىندە بالامدى كىمگە سەنىپ تاپسىراتىنىمدى ويلادىم. مىسالى, جولشىباي تاكسي توقتاتسام دا, الدىن الا شاقىرتسام دا, ولار ۋاقىتتىڭ تىعىزدىعىنا بايلانىستى جولدا ۇشىپ ءجۇرىپ, ىلعي دا راتسيامەن نە ۇيالى تەلەفونمەن سويلەسەتىندىكتەن, قىزمەتتەرىنە كۇمانمەن قارايمىن. ءتىپتى, ولاردىڭ ناقتى كەلەتىندىگىنە دە سەنىمدى بولا المايمىز» دەيدى البەرت ني. بالالار كولىگىنىڭ ستاندارتتىق تالاپتارىن جەتە زەرتتەپ, زاڭگەرلەرمەن كەڭەسە كەلە, ول ماسكەۋلىكتەرمەن بايلانىس ورناتادى. ولار اتىنان-اق زاتى تۇسىنىكتى بولاتىن كومپانيانى «Schoolbus» دەپ اتايدى. لوگوتيپتى دە سول ماسكەۋلىكتەر ۇسىنادى.
سونىمەن, روبەرت سيراەۆ اتتى جۇرگىزۋشىنىڭ تاپسىرىس ۋاقىتى جاقىنداپ, قىزمەت ساپاسىن كوزبەن كورۋ ءۇشىن سارى كولىككە ءبىز دە وتىردىق. بۇل بەس بالاعا ارنالعان مينيۆەن ەكەن. ورىندىقتارى ىڭعايلى, كىشكەنتاي بالالارعا ارنالعان ارنايى كرەسلولار دا بار. ايتىلعانداي-اق, اۆتوبۋس ساعاتىنا 60 كم جىلدامدىقپەن ءجۇرىپ كەلەدى. الدىنداعى كامەرا ارقىلى سىرتتاعى جول مەن سالون ءىشى تاسپاعا جازىلۋدا. ميلان كۆارتالىنداعى «بەبي كلۋبتان» كولىككە 4 جاسار كىشكەنتاي قىز بەن ءبىر ايەل كىسى ىڭعايلى جايعاسىپ العانى سول ەدى, ءبۇلدىرشىن قىڭقىلداپ تا ۇلگەرگەن جوق, سالونعا ورناتىلعان ەكراننان «ماشا ي مەدۆەد» ءمۋلتفيلمى كورسەتىلىپ, كىشكەنتايدىڭ بار نازارى سوعان اۋدى. ال, قاسىنداعىسى بالا كۇتۋشىسى بولىپ شىقتى. «وتە ىڭعايلى اۆتوبۋس. باستىسى, كەشىگۋ دەگەن جوق. ۋاقىتىمەن, كەيدە ءتىپتى ەرتە كەلەدى. «مەرۋەرت, اۆتوبۋس كەلدى» دەسەم بولعانى, ءماز بولىپ, ەسىككە قاراي جۇگىرەدى. جول بويى تەلەديداردان مۋلتفيلمدەر كورەدى» دەيدى كۇتۋشىسى قالامقاس جەكەباەۆا. ولار ءۇيدىڭ جانىنان ءتۇستى. ال, جۇرگىزۋشى بولسا, بىزگە تاعى ءبىر اقپارات ايتا كەتتى. اتا-انا بالانىڭ الدىنان شىعا الماعان كۇندە, جۇرگىزۋشى ونى ەسىگىنە دەيىن شىعارىپ سالادى ەكەن.
بۇگىنگى كۇنى ءار اتا-انا وزدەرىنە بەرىلگەن لوگين ارقىلى سايتقا كىرىپ, اۆتوبۋستىڭ قاي جەردە كەتىپ بارا جاتقانىن GPS ارقىلى كورە الادى. ال, كومپانيا ديرەكتورىنىڭ ايتۋىنشا, بالا كولىككە ءمىنىپ-تۇسكەن كەزدە اتا-انانىڭ تەلەفوندارىنا اۆتوماتتى تۇردە حابارلاما كەلىپ تۇراتىنداي باعدارلاما جاسالۋدا.
ءمادينا جاقىپ
