كەشە «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ №78 مەكتەپ-گيمنازيانىڭ اشىلۋ سالتاناتىندا ءبىرىنشى سىنىپ وقۋشىلارىمەن بىرگە مەكتەپ اۋلاسىندا اعاش وتىرعىزدى. بۇل راسىمنەن سوڭ وقۋشىلار «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى سىنىپ ساعاتىنا قاتىستى.
ايسۇلۋ سەيداحمەتوۆا جەتەكشىلىك ەتەتىن 1 «ۆ» سىنىبىنا كىرىپ شىقتىق. 32 وقۋشى وڭ قولدارىن جۇرەك تۇسىنا قويىپ, قر ءانۇرانىن ورىندادى. وتان, اتا زاڭ, ەلباسى تۋرالى ولەڭدەر وقىلدى. ەڭ باستىسى, مۇعالىمنىڭ قويعان سۇراقتارى جاۋاپسىز قالمادى. بالالار زور قۇلشىنىسپەن تاقتاعا شىعىپ, مەملەكەتتىك رامىزدەردىڭ اۆتورلارىن اتاپ, ءمان-ماعىناسىن اشىپ, سۋرەتتەپ بەردى. سونداي-اق, مەكتەپتە قالاي ءجۇرىپ-تۇرۋ كەرەك ەكەندىگىن دە بىلەتىن بولىپ شىقتى.
ەندى, مەكتەپ جاڭالىعىنا كوشەلىك. «1200 وقۋشىعا ارنالعان مەكتەپتىڭ وقۋ كابينەتتەرى جاڭا زامانعا ساي تەحنيكالىق قۇرىلعىلارمەن جابدىقتالعان. سونداي-اق, تەحنولوگيا ساباعىنا قاجەتتى اعاش وڭدەۋ, ءىس تىگۋ شەبەرحانالارى دا بار. وقۋ ورداسىنا «جاعالاۋ» تۇرعىن ءۇي كەشەنىندە, مەكتەپ اۋماعىنداعى شاعىن اۋدانداردا تۇراتىن وقۋشىلار قابىلدانىپ جاتىر. الىس جەرلەردە تۇراتىن وقۋشىلاردى تاسىمالداۋ ءۇشىن 4 اۆتوبۋس ءبولىنىپ وتىر» دەيدى ءبىلىم باسقارماسىنىڭ ءبولىم باسشىسى ءمادينا تاسجانقىزى. ال, №78 مەكتەپ-گيمنازيانىڭ ديرەكتورى جانار جۇمابەكوۆانىڭ ايتۋىنشا, وقۋعا ازىرگە بار-جوعى 255 وقۋشى قابىلدانىپتى. 45 مۇعالىمنىڭ 25-ءىن كوللەدج, جوعارى وقۋ ورىندارىن ۇزدىك تامامداعان جاس ماماندار قۇرايدى. جاڭا ءبىلىم ورداسى 1-سىنىپتان اعىلشىن, نەمىس, فرانتسۋز تىلدەرىن, ال 5-سىنىپتان باستاپ قازاقستان تاريحى ءپانى تەرەڭدەتىپ وقىتاتىن گۋمانيتارلىق باعىتتاعى مەكتەپ-گيمنازيا بولماق.
ءمادينا جاقىپ
