12 ماۋسىم كۇنى مەملەكەت باسشىسى قر پرەزيدەنتى جانىنداعى شەتەلدىك ينۆەستورلار كەڭەسىنىڭ اقمولا وبلىسى بۋراباي كۋرورتتىق ايماعىندا وتكەن 27-جالپى وتىرىسىنا قاتىستى دەپ حابارلايدى www.akorda.kz cايتى.
سەنىمدى سەرىكتەستىك – تۇراقتىلىقتىڭ ارقاسى
مەملەكەت باسشىسى قازاقستان ءۇشىن قازىرگى وتكىزۋ نارىقتارىن كەڭەيتۋگە جانە ىنتىماقتاستىقتى نىعايتۋعا مۇمكىندىك بەرەتىن ەۋرازيالىق ەكونوميكالىق وداقتىڭ ماڭىزدىلىعىنا توقتالدى.
ء–بىزدىڭ ەلدەرىمىزدىڭ اراسىندا ءتيىمدى ەكونوميكالىق بايلانىستار ورناتۋ وڭىردە دوستىق جانە تاتۋ كورشىلىك قارىم-قاتىناستاردى جولعا قويۋعا ىقپال ەتەدى. كەيبىر ەلدەردە احۋال تۇراقسىزدانىپ, ينۆەستيتسيالىق كليمات ناشارلاپ وتىرعان كەزدە قازاقستاندا ەكونوميكالىق وداقتىڭ ارقاسىندا شەتەلدىك ينۆەستورلار ءۇشىن جاڭا مۇمكىندىكتەر اشىلۋدا, – دەدى نۇرسۇلتان نازارباەۆ.
ەل پرەزيدەنتى قازاقستان ەكونوميكاسىنا ينۆەستيتسيا سالۋ ەۋرازيالىق ەكونوميكالىق وداقتىڭ ورتاق نارىعىندا جۇمىس ىستەۋ ءۇشىن وڭتايلى الاڭ بولاتىنىن اتاپ ءوتتى.
– بىرەگەي ينۆەستيتسيالىق شارتتار, ەڭ تومەنگى سالىقتار جانە ينۆەستورلار مەن مەملەكەتتىڭ ءوزارا قارىم-قاتىناستارىنىڭ تۇراقتىلىعى ءبىزدىڭ ەلدى ەۋرازيالىق ەكونوميكالىق وداقتىڭ الىپ نارىعىنا كىرەتىن «ۇزدىك» قاقپا رەتىندە كورسەتەدى, – دەدى قازاقستان پرەزيدەنتى.
يندۋستريالاندىرۋدىڭ ءبىرىنشى بەسجىلدىعىنا توقتالعان مەملەكەت باسشىسى جاھاندىق ەكونوميكالىق داعدارىسپەن بايلانىستى تۋىنداعان قيىندىقتارعا قاراماستان, قازاقستان جاڭا جۇمىس ورىندارىن اشىپ, ەكونوميكانىڭ وڭدەۋشى سالالارىنا ينۆەستورلار تارتا العانىن اتاپ ءوتتى.
– يندۋستريالاندىرۋ كارتاسى اياسىندا 4 جىلدا جالپى سوماسى 2,4 تريلليون تەڭگەنىڭ 651 جوباسى ىسكە قوسىلدى, 70 مىڭعا جۋىق جۇمىس ورنى قۇرىلدى. وسى جوبالاردىڭ ءاربىر جەتىنشىسى تىكەلەي شەتەلدىك ينۆەستيتسيالاردىڭ كومەگىمەن جۇزەگە اسىرىلدى, – دەدى نۇرسۇلتان نازارباەۆ.
قازاقستان پرەزيدەنتى مۇنداي جوبالاردىڭ قاتارىندا «الستوم» كومپانياسى ۇيىمداستىرعان استاناداعى ەلەكتروۆوزدار ءوندىرىسىن, «رەنو», «نيسسان» جانە «اۆتوۆاز» كومپانيالارىمەن بىرلەسكەن اۆتوقۇرامداۋىشتار ءوندىرىسىنىڭ تولىق تسيكلدى زاۋىتىنىڭ قۇرىلىسىن اتادى.
مەملەكەت باسشىسى الەمدەگى تۇراقسىز ەكونوميكالىق احۋالدىڭ سالدارىنان شەتەلدىك تىكەلەي ينۆەستيتسيالار اعىنى قىسقارىپ جاتقان جاعدايدا قازاقستان ينۆەستورلار ءۇشىن تۇراقتى ءارى سەنىمدى سەرىكتەس بولىپ وتىرعاندىعىن ايتتى.
– الەمدىك داعدارىستارعا قاراماستان, ءبىزدىڭ ەكونوميكامىز ورنىقتى دامۋ قارقىنىن جوعالتپادى. ءبىز ينۆەستورلاردى بارلىق جاعىنان قولدايمىز جانە قولداۋ شارالارىن ۇنەمى جەتىلدىرىپ وتىرامىز, – دەدى نۇرسۇلتان نازارباەۆ.
ماكروەكونوميكالىق كليمات بويىنشا وتىزدىق ىشىندەمىز
يندۋستريالىق-يننوۆاتسيالىق دامۋدىڭ ەكىنشى باعدارلاماسىنىڭ باسىمدىقتارىنا توقتالعان مەملەكەت باسشىسى شەتەلدىك ينۆەستورلارمەن سەرىكتەستىكتىڭ بىرقاتار نەگىزگى تاسىلدەرىن اتادى.
قازاقستان پرەزيدەنتى بۇل باعىتتاعى ماڭىزدى قادامداردىڭ ءبىرى جاعىمدى ماكروەكونوميكالىق كليمات قامتاماسىز ەتۋ ەكەنىن ايتتى.
–قازاقستان ون جىلدان استام ۋاقىت بويى كەزەڭ-كەزەڭىمەن ورنىقتى ماكروەكونوميكالىق ورتا قۇردى. وسى كورسەتكىش بويىنشا ءبىز 2013 جىلى 23-ورىندى يەلەنۋ ارقىلى قازىردىڭ وزىندە باسەكەلەستىكتىڭ جاھاندىق يندەكسىندە العاشقى وتىزدىق ەلدەرى قاتارىنا كىرىپ وتىرمىز, – دەپ اتاپ ءوتتى نۇرسۇلتان نازارباەۆ.
مەملەكەت باسشىسى, سونداي-اق, قازاقستاننىڭ دۇنيەجۇزىلىك ساۋدا ۇيىمىنا كىرۋى ينۆەستورلار ءۇشىن قوسىمشا قولايلى شارتتار تۋدىراتىنىن ايتتى. ويتكەنى, ەلىمىزدە ساۋدا, ينۆەستيتسيا, زياتكەرلىك مەنشىكتى قورعاۋ سالالارىندا حالىقارالىق ەرەجەلەر قولدانىلاتىن بولادى.
ينۆەستورلارعا جاردەمدەسۋدىڭ تاعى ءبىر ماڭىزدى شاراسى رەتىندە قارجىلىق قولداۋ ماسەلەسى اتالدى.
– يندۋستريالاندىرۋدىڭ جاڭا باعدارلاماسىن جۇزەگە اسىرۋ ءۇشىن مەملەكەتتىك بيۋدجەتتەن بەس جىل بويىنا شامامەن 600 ميلليارد تەڭگە بولىنەدى. سونداي-اق ۇلتتىق قوردان تاعى 1 تريلليون تەڭگە ءبولۋ تۋرالى شەشىم قابىلدادىق. وعان قوسىمشا, دۇنيەجۇزىلىك بانكپەن, ەۋروپالىق قايتا قۇرۋ جانە دامۋ بانكىمەن, ازيا دامۋ بانكىمەن جانە يسلام بانكىمەن نەگىزدەمەلىك كەلىسىمگە دە قول قويدىق, – دەدى قازاقستان پرەزيدەنتى.
مەملەكەت باسشىسى بيزنەس بايلانىستارى مەن كاسىپكەرلەردىڭ حالىقارالىق كووپەراتسياسىن كەڭەيتۋ ءۇشىن ۆيزالىق كەدەرگىلەردى جويۋ قاجەتتىگىنە توقتالدى.
– بۇگىن ءبىز قازاقستاندا بارىنشا جوعارى ينۆەستيتسيالىق بەلسەندىلىك تانىتقان ون مەملەكەتتىڭ ازاماتتارى ءۇشىن بىرجاقتى ۆيزاسىز رەجيم ورناتۋ تۋرالى حابارلايمىز. بۇل تىزىمگە اقش, نيدەرلاندى, ۇلىبريتانيا, فرانتسيا, گەرمانيا, يتاليا, مالايزيا, بىرىككەن اراب امىرلىكتەرى, كورەيا رەسپۋبليكاسى جانە جاپونيا كىردى, – دەدى نۇرسۇلتان نازارباەۆ.
عىلىمي ىزدەنىسكە ۇلەس قوسىپ, كادر دايارلاۋعا شاقىردى
قازاقستان پرەزيدەنتى ينۆەستورلاردى يننوۆاتسيالىق ەكونوميكانىڭ نەگىزىن قالىپتاستىرۋ جانە ءتيىستى كادرلار دايارلاۋ ۇدەرىستەرىنە بەلسەندى قاتىسۋعا شاقىردى.
– سىزدەردى كورپوراتيۆتىك عىلىمي-زەرتتەۋ جانە تاجىريبەلىك-كونسترۋكتورلىق ورتالىقتار قۇرۋعا جانە ولاردى نازارباەۆ ۋنيۆەرسيتەتىنىڭ قۇرىلىپ جاتقان استانا بيزنەس كامپۋس عىلىمي پاركى اۋماعىندا ورنالاستىرۋعا شاقىرامىن, – دەدى مەملەكەت باسشىسى.
كادر دايارلاۋ جۇيەسىن جاڭعىرتۋدى يندۋستريالاندىرۋدىڭ ماڭىزدى شارتتارىنىڭ ءبىرى رەتىندە اتاعان قازاقستان پرەزيدەنتى ۇكىمەتكە ينۆەستورلاردى كوللەدجدەر مەن جوعارى وقۋ ورىندارىن باسقارۋعا تارتۋدى تاپسىردى.
مەملەكەت باسشىسى مەملەكەت-جەكە مەنشىك سەرىكتەستىگىنىڭ ماڭىزدىلىعىنا نازار اۋداردى. وسى ورايدا ول شەتەلدىك ينۆەستورلاردى جوسپارلانىپ وتىرعان 700-گە جۋىق كومپانيانى جەكەشەلەندىرۋگە بەلسەندى قاتىسۋعا شاقىردى.
ىنتالاندىرۋ پاكەتى كوپ جەڭىلدىك جاسايدى
نۇرسۇلتان نازارباەۆ 2015 جىلى «ەۋروكودتار» جۇيەسىنە كوشۋدىڭ جانە قۇرىلىس سالاسىنداعى ساراپتاما بويىنشا قىزمەتتەردىڭ باسىم كوپشىلىگىن باسەكەلىك ورتاعا بەرۋدىڭ قاجەتتىلىگىن دە اتاپ ءوتتى.
مەملەكەت باسشىسى كاپيتال سالۋدىڭ مەيىلىنشە پەرسپەكتيۆالى باعىتتارى رەتىندە شيكىزات, وڭدەۋشى ونەركاسىپتى, يننوۆاتسيالىق سالالاردى, شاعىن جانە ورتا بيزنەس, تۋريزم جانە قىزمەت كورسەتۋ سەكتورىن اتادى.
وتىرىس بارىسىندا قازاقستان پرەزيدەنتى باسىمدىعى بار باعىتتاردىڭ تارتىمدىلىعىن كوتەرۋ ءۇشىن ۇكىمەت ازىرلەگەن اۋقىمدى ىنتالاندىرۋ پاكەتى تۋرالى دا ايتتى.
اتاپ ايتقاندا, يندۋستريالاندىرۋدىڭ وسى سالالارىنداعى ينۆەستورلار كورپوراتيۆتىك تابىس سالىعىن تولەۋدەن جانە جەر سالىعىنان 10 جىلعا, مۇلىك سالىعىنان 8 جىلعا بوساتىلادى.
سونىمەن قاتار, مەملەكەت نىساندى پايدالانۋعا بەرگەننەن كەيىن شەتەلدىك ينۆەستورلارعا كۇردەلى شىعىستارىنىڭ 30 پايىزىنا دەيىن وتەپ بەرەتىن بولادى. بۇل ورايداعى تاعى ءبىر شەشىم – ينۆەستيتسيالىق جوبانى جۇزەگە اسىرۋدىڭ بۇكىل كەزەڭىندە جانە نىساندى ىسكە قوسقاننان كەيىن ءبىر جىل ەشقانداي كۆوتاسىز جانە رۇقساتسىز جۇمىس كۇشىن تارتۋ بولىپ وتىر.
سونداي-اق ينۆەستورلارعا قوسىمشا قۇن سالىعى مەن اكتسيزدەن باسقا, بارلىق سالىقتار مەن تولەمدەردىڭ مولشەرلەمەلەرىنە قاتىستى زاڭنامانىڭ تۇراقتىلىعىنا كەپىلدىك بەرىلەتىن بولادى.
«ينۆەستيتسيالىق ومبۋدسمەن» ينستيتۋتى ەنگىزىلەدى
قازاقستان پرەزيدەنتى ينۆەستورلار ءۇشىن مەملەكەتتىك مەكەمەلەرمەن جۇمىس كەزىندە «ءبىر تەرەزە» قاعيداتى ەنگىزىلەتىنىن ايتتى.
بۇدان بولەك, ينۆەستورلاردىڭ قۇقىقتارى مەن مۇددەلەرىن قورعاۋدى قامتاماسىز ەتۋ ءۇشىن «ينۆەستيتسيالىق ومبۋدسمەن» ينستيتۋتى زاڭنامالىق دەڭگەيدە ەنگىزىلەتىن بولادى.
مەملەكەت باسشىسى باسىمدىعى بار سالالاردا جۇمىس ىستەيتىن كاسىپورىنداردىڭ كەپىلدەندىرىلگەن تاپسىرىستار الۋىنا جاردەم جاسالاتىنىنا نازار اۋداردى.
ءسوزىنىڭ سوڭىندا نۇرسۇلتان نازارباەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ينۆەستيتسيالىق كليماتتى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
وتىرىس بارىسىندا ەۋروپالىق قايتا قۇرۋ جانە دامۋ بانكىنىڭ پرەزيدەنتى سۋما چاكرابارتي جانە پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ بايانداما جاسادى.
سونداي-اق «توتال», «دويچە بانك فرانكفۋرت», «ەني», «دجەنەرال ەلەكتريك ويل ەند گاز», «تەليا سونەرا», «سبەربانك روسسي», «ەرنست ەند يانگ», «انادولۋ گرۋپپ» جانە باسقا دا كومپانيالاردىڭ باسشىلارى وتىرىستىڭ نەگىزگى تاقىرىبىنا قاتىستى ءوز پىكىرلەرىن ءبىلدىردى.
ءىس-شارانىڭ قورىتىندى بولىگىندە «بۋراباي-قوستاناي» تەلەكوپىرى بولىپ, ونىڭ بارىسىندا مەملەكەت باسشىسى «تويوتا» اۆتوموبيلدەرىن شىعارۋ جونىندەگى جوبانى ىسكە قوسۋ راسىمىنە قاتىستى.
سوڭىندا نۇرسۇلتان نازارباەۆ شەتەلدىك ينۆەستورلار كەڭەسىنىڭ كەلەسى وتىرىسىندا قازاقستانداعى اگروبيزنەستى دامىتۋ ماسەلەلەرىن تالقىلاۋدى جانە ونى شىمكەنتتە وتكىزۋدى ۇسىندى.
وتىرىستان كەيىن نۇرسۇلتان نازارباەۆ كەڭەسكە قاتىسۋشىلارمەن بىرگە ششۋچە كولىنىڭ جاعاسىنا تىگىلگەن ەتنو-اۋىلدى ارالاپ كوردى.
WWW.AKORDA.KZ
