سۋرەتشى مەن شاكىرتتەرىنىڭ سىيى
قازىرگى زامانعى ونەر مۇراجايىندا تولەۋعازى بايعاليەۆ پەن ونىڭ شاكىرتتەرىنىڭ استانا كۇنىنە ارنالعان بىرلەسكەن كورمەسى اشىلدى. كورمە ماۋسىم ايىنىڭ سوڭىنا دەيىن جالعاسادى.
وندا سۋرەتشىنىڭ 55 ەڭبەگى كوپشىلىك نازارىنا ۇسىنىلعان. سونىڭ ىشىندە «اۋىلىم», «جاسىباي كولىندە», «كولدەگى تاڭ», «كۇز», «كەش», «جاڭبىر باستالدى», «العاشقى قار» سىندى ونشاقتى گرافيكالىق كەسكىندەمە بار. ەسەپتىك كورمەگە 23 وقۋشىنىڭ اكۆارەل, گۋاش, قارىنداش جانە باسقا تەحنيكالاردا ورىندالعان 45 سۋرەتى قويىلدى.
«ستۋديا 2010 جىلدان باستاپ جۇمىس ىستەيدى. بالالار 5-18 جاس شاماسىندا. وقۋشىلاردىڭ جۇمىستارى ءتۇرلى تەحنيكالاردا ورىندالعان. ولاردان ۇستازدىڭ وقۋشىلارىن بەينەلەۋ ونەرىنىڭ بار مۇمكىندىكتەرىمەن تانىستىرۋى جانە بار جان-تاندەرىمەن ونەردى سۇيۋگە ۇيرەتۋگە ۇمتىلىسى سەزىلىپ تۇرادى. كارتينالاردىڭ اۆتورلارى – حالىقارالىق, رەسپۋبليكالىق, قالالىق كورمەلەردىڭ قاتىسۋشىلارى جانە جەڭىمپازدارى» دەيدى ت.بايعاليەۆ.
ايتا كەتەيىك, تولەۋعازى بايعاليەۆ – كەسكىندەمەشى جانە گرافيك, پەيزاجدار مەن تاقىرىپتىق كارتينالاردىڭ اۆتورى, پەداگوگ. قازىرگى ۋاقىتتا ونىڭ ەڭبەكتەرى گەرمانيا, رەسەي, كورەيا, اقش, قىتاي جانە ۋكراينا ەلدەرىندە جەكە جيداشىلار قورىندا ساقتالۋدا.
اسحات رايقۇل