بالا كۇنىمىزدە سيقىرشىلاردىڭ كوزدى اربايتىن سيقىرلى تاياعى مەن سان ءتۇرلى ارەكەتتەرىنە كوز الماي قاراپ, ولاردىڭ قاس-قاباعى مەن كوز قيىعىن ەرەكشە قاداعالاپ وتىراتىنىمىز ءبارىمىزدىڭ ەسىمىزدە. تاڭعاجايىپ الەمگە ءسابي جۇرەكپەن تامساناتىنبىز. ءبىز عانا ەمەس, ۇلكەندەر جاعى دا وپ-وڭاي الدانىپ قالىپ, ارقا-جارقا ءماز بولىپ, سوناۋ الىستا قالعان بالالىق داۋرەندەرىنە ءبىر ساياحات جاساپ قايتاتىن. سول عاجايىپتار الەمىنە قايتا ورالعىڭىز كەلسە, 5-6 شىلدە كۇندەرى وتەتىن ءبىرىنشى حالىقارالىق «Magic Astana» – «سيقىرلى استانا» يلليۋزيونيستەر فەستيۆالىنە كەلىڭىز.
«سيقىرلى استانا» – ەلىمىزدە تۇڭعىش رەت قولعا الىنىپ وتىرعان بىرەگەي جوبا. بۇرىن-سوڭدى وتپەگەن فەستيۆالدى ۇيىمداستىرۋشىلار شارانى ەندى جىل سايىن جۇزەگە اسىرماق.
ەلوردا تورىنە الەمنىڭ تۇكپىر-تۇكپىرىنەن سيقىر ونەرىنىڭ ساڭلاقتارى كەلەتىن بولادى. ەكى كۇندىك شوۋ بارىسىندا ماگيا ونەرىنىڭ مايىن ىشكەن مايتالماندار بەيبىتشىلىك جانە كەلىسىم سارايىندا جينالعاندارعا ەستەن كەتپەس شوۋ ۇسىنادى. باعدارلامانىڭ اۋقىمى كەڭ. كوزدى اشىپ-جۇمعانشا تالاي قىزىقتىڭ كۋاسى بولاسىز. ءوز ءىسىنىڭ شەبەرلەرى بۇرىن-سوڭدى بولماعان كەرەمەتتەردى كورسەتۋگە ۋادە ەتىپ وتىر.
فەستيۆال قوناقتارىنىڭ اراسىندا «وتقا تۇسسە جانبايتىن» اعايىندى سافرونوۆتار بار. ولارعا الەمدە تەڭ كەلەر ونەرپاز از. رەسەي, جاپونيا, امەريكا مەملەكەتتەرىنىڭ ماماندارى جۇمىس ىستەيتىن ەكسكليۋزيۆتى باعدارلامالارىن وزدەرى دايىنداعان. 2012 جىلى «ادامدى تىرىدەي ورتەۋ» يلليۋزياسىمەن تالايدى تاڭ قالدىرعان. بۇل سيقىر ءتۇرىن وسى ۋاقىتقا دەيىن تەلەارنادان نەمەسە عالامتور بەتتەرىنەن كورىپ جۇرگەن استانالىقتار ەندى بەتپە-بەت تاماشالاي الادى.
رەسەيدە فوكۋس ونەرىمەن اينالىساتىن جالعىز قىز الەكساندرا سكاچكوۆا دا – تىكەلەي ەفير ارقىلى تانىلعانداردىڭ ءبىرى. ول فوكۋسشىلاردىڭ «ۋديۆي مەنيا» تەلەجوباسىنىڭ اقتىق سىنىندا توپ جارعان. الەكساندرا زالداعى حالىقپەن تىكەلەي جۇمىس ىستەگەندى ۇناتادى.
«ۋديۆي مەنيا» شوۋىنىڭ 3-ماۋسىمداعى تاعى ءبىر جەڭىمپازى – انتون ابراشەكوۆ. ول فوكۋسشى-مانيپۋلياتور رەتىندە ۇشقان قۇس, جۇگىرگەن اڭدى قىبىر ەتكىزبەيدى. ون جىلدىق تاجىريبەسى بار تاعى ءبىر تالانت ەلىمىزگە قۋانا-قۋانا قادام باساتىنىن جەتكىزىپتى. «ۋديۆي مەنيا», «ۋليچنايا ماگيا» جوبالارىنىڭ قاتىسۋشىسى الەكساندر مۋراتاەۆ توردە وتىرعان قالىڭدىقتى توي ۇستىندە تىعىپ قوياتىن ونەرىمەن ەرەكشەلەنەدى.
ون جىلعا جۋىق ەرتەگى الەمىنە جەتەلەپ جۇرگەن تالانتتى ءارتىس پاۆەل كاراحتانوۆ تا قۇر كەلمەيدى. كورەرمەندەر بۇل ونەر يەسىمەن رەسەي ارنالارى ارقىلى جاقسى تانىس. ءار جولى باعدارلاما جۇرگىزۋشىلەرى ونىڭ قيمىل-ارەكەتىن وپەراتورلار ءتۇسىرىپ ۇلگەرە المايتىندىقتارىن ايتىپ, باس شايقاعان.
«فەنومەن», «تاڭعاجايىپ ادامدار» شوۋىنىڭ جەڭىمپازى, سونداي-اق «ۋكراينانىڭ ءبىرىنشى فەنومەنى» اتانعان ارتەم تيحەۆيچ بەيبىتشىلىك جانە كەلىسىم سارايىن ءدۇر سىلكىندىرەتىنىنە سەنىمدى. ول ءوز ونەرىن ەرەكشە باعالايدى. پسيحولوگيالىق, ماگيالىق قاسيەتتەر مەن ىشكى تۇيسىگى ارقىلى جۇمىس ىستەيدى. ماسەلەن, بالا كەزىندە ارتەم مۋلتفيلم كورگىسى كەلسە, اكەسى تاماشالاپ وتىرعان فۋتبول ارناسىن وپ-وڭاي اۋىستىرىپ جىبەرەتىن كورىنەدى.
قىرعىز ەلىنىڭ جوعارى ساناتتى سيقىرشىسى, IBM مۇشەسى, امەريكاندىق SAM باۋىرلاستىق كلۋبىنىڭ مۇشەسى, ەۋروپادا وتكەن «بيتۆى ماگوۆ» جانە باسقا بايقاۋلاردىڭ جۇلدەگەرى يلدار ياگوفاروۆتىڭ قولىنا تۇسكەن دۇنيە سول ساتتە عايىپ بولادى. باسقا بىرەۋدىڭ قالتاسىنان تابىلۋى مۇمكىن نە اسپانعا ۇشىپ جوعالادى. اۋادا قالىقتاپ, كۇلگە اينالادى. قىرىق بولىنگەن قاعاز اقشا قايتا قالپىنا كەلەدى. ادامدار «ۇشىپ», قاسىق-شانىشقىلار قول تيگىزبەسەڭىز دە وزدەرى قيمىلداپ, اۋزىڭىزعا اس سالادى. قىسقاسى, مۇنىڭ ءبارىن كورگەن دە, كورمەگەن دە ارماندا.
گوللاندىق يلليۋزيونيستەردىڭ «Magic Unlimited» توبى ارىپتەستەرىن مىڭ ورايتىن ويلارى بار. قۇرامىندا كارتاشىلار مەن جورامال جاساۋشىلار, ادامدىق كەيىپتەن شىعىپ, باسقا بەينەگە وپ-وڭاي اينالىپ كەتەتىندەر, جوعالىپ-تابىلاتىندار, «ءولىپ-تىرىلەتىندەر» تولىپ جاتىر.
قورىتا ايتقاندا, اسقاق استانانىڭ مەرەيلى كۇندەرى «Magic Astana» – «سيقىرلى استانا» يلليۋزيونيستەر فەستيۆالى ەستەن كەتپەس ەستەلىكتەر قالدىرماق.
