استانا مەن پاۆلوداردا ەكسترەميزمگە قاتىسى بار كۇدىكتىلەر ۇستالدى

2024 جىلعى 2-3 مامىردا استانا جانە پاۆلودار قالالارىندا ۇلتتىق قاۋىپسىزدىك كوميتەتى ىشكى ىستەر مينيسترلىگىمەن بىرلەسىپ جانە پروكۋراتۋرامەن كەلىسە وتىرىپ, قازاقستاننىڭ ءۇش ازاماتىن قولعا ءتۇسىردى.

ۇلتتىق قاۋىپسىزدىك كوميتەتىنىڭ حابارلاۋىنشا, ولار تەرروريزمدى ناسيحاتتادى جانە رەسپۋبليكا اۋماعىندا تىيىم سالىنعان ءدىني-ەكسترەميستىك ۇيىمنىڭ قىزمەتىنە قاتىستى دەگەن كۇدىككە ىلىنگەن.

ءتىنتۋ كەزىندە ءدىني ادەبيەتتەر مەن باسقا دا زاتتاي ايعاقتار تاركىلەندى.

كۇدىكتىلەر بۇرىن ءارتۇرلى قىلمىس جاساعانى ءۇشىن سوتتى بولعان.

قىلمىستىق كودەكستىڭ 256 جانە 405-باپتارى بويىنشا سوتقا دەيىنگى تەرگەۋ امالدارى جۇرگىزىلۋدە. قىلمىستىق ءىس جۇرگىزۋ كودەكسىنىڭ 201-بابىنىڭ 1-بولىگىنە سايكەس وزگە دە مالىمەتتەر جاريا ەتىلۋگە ​​جاتپايدى.