«تازا قازاقستان. استانا – تازالىق پەن ءتارتىپتىڭ ۇلگىسى» اتتى اۋقىمدى ەكولوگيالىق اكتسياسىنا جۋرناليستەر دە قولداۋ كورسەتتى, دەپ حابارلايدى astana-akshamy.kz
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ ستۋدەنتتەرى مەن «ەگەمەن قازاقستان» رەسپۋبليكالىق گازەتىنىڭ قىزمەتكەرلەرى «جۋرناليستەر اللەياسىندا» تازالىق ءىس-شاراسىن ۇيىمداستىردى.
ۇيىمداستىرۋشىلار جالپىۇلتتىق اكتسياعا ۇلەس قوسىپ, اللەيا اۋماعىن تازالاپ, رەتكە كەلتىرىپ قويۋ باستى ماقساتتارى ەكەنىن ايتتى.
«تازا قازاقستان» ەكواكتسياسى اياسىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ شەمىمىمەن «جۋرناليستەر اللەياسىن» تازارتىپ, ءارى تاماشالاپ قايتايىق» دەگەن نيەت بولدى. بۇل فاكۋلتەتىمىزدىڭ تۋعان كۇنىمەن دە تۇسپا-تۇس كەلىپ وتىر. فاكۋلتەتىمىز 5 مامىر كۇنى اشىلعان بولاتىن. وسى باستامامىزدى كافەدرا مەڭگەرۋشىلەرى, وقىتۋشىلار, ستۋدەنتتەر جانە 12 باسىلىمنىڭ باسىن بىرىكتىرگەن «قازاق گازەتتەرى» سەرىكتەستىگى قولداپ, ونىڭ ىشىندە «ەگەمەن قازاقستان» گازەتى دە بىزبەن بىرگە تازالىق اكتسياسىنا قاتىسىپ جاتىر, – دەدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ دەكانى, پروفەسسور قايرات ساق.
ەكواكتسيا قاتىسۋشىلارى ءىس-شارانىڭ سيمۆوليكالىق ءمان-ماڭىزىنا دا توقتالىپ ءوتتى.
«وسى جەردە ءوتىپ جاتقان تازالىق اكتسياسىنىڭ سيمۆوليكالىق ءمانى بار. ويتكەنى بۇل جەر تەك قانا جۋرناليستەر اللەياسى ەمەس, «ەگەمەن قازاقستان» گازەتى كوشەسى. استانادا اقپارات قۇرالدارىنىڭ اتىنا بەرىلگەن ەكى كوشە بولسا, سونىڭ بىرەۋى – وسى. ال ەكىنشىسى «قازاق راديوسى» كوشەسى ەكەنىن بىلەسىزدەر. مۇنىڭ تازالىق قانا ەمەس, ماعىنالىق ءمانى بار ءىس-شارا دەۋگە بولادى. «تازالىق بار جەردە ادامنىڭ جانى تازا, اۋلاسى تازانىڭ اۋاسى تازا» دەپ جاتادى. سوندىقتان بۇل – تازالىققا, ۇلكەندى سىيلاۋعا شاقىراتىن اكتسيا, – دەدى «ەگەمەن قازاقستان» گازەتىنىڭ شەف-رەداكتورى قۋات اۋەسباي.
وسى اپتا «ونەگەلى ۇرپاق» دەپ اتالادى جانە ارداگەرلەر اۋلالارى مەن قارتتار ۇيلەرىنىڭ اۋماقتارىن تازالاۋعا جانە اباتتاندىرۋعا ارنالعان.
اۋقىمدى ەكواكتسيا اياسىندا قالانى سانيتارلىق تازارتۋ, نوسەر جانە ارىق كارىز جەلىلەرى, كوشەلەردى, تروتۋارلاردى, كۆارتالىشىلىك اۋماقتاردى, قوعامدىق كەڭىستىكتەر مەن اۋلالاردى تازالاۋ جۇمىستارى جۇرگىزىلىپ جاتىر.
سونداي-اق, جاسىل جەلەكتەردى كۇتىپ-باپتاۋ جانە وتىرعىزۋ, ساۋدا وبەكتىلەرىنە ىرگەلەس اۋماقتاردى جيناۋ, كوگالدار مەن گۇلزارلاردى ورناتۋ, رۇقسات ەتىلمەگەن پوليگونداردى جويۋ جانە ت.ب. جۇمىستار جۇرگىزىلۋدە.
