الەۋمەتتىك دۇكەندەر كوبەيەدى

استانادا نان باعاسى قىمباتتاۋىنا بايلانىستى قالالىق ءماسليحاتتىڭ دەپۋتاتتارى قوعامدىق تىڭداۋ وتكىزدى.

قالالىق ءماسليحاتتىڭ حاتشىسى سانسىزباي ەسىلوۆ بارلىق دەپۋتاتتاردىڭ اتىنان الدىمەن وسى جيىنعا قاتىسقان دارىگەرلەر قاۋىمىن دەنساۋلىق ساقتاۋ سالاسى قىزمەتكەرلەرىنىڭ كاسىبي مەرەكەسىمەن قۇتتىقتاپ, يگى تىلەگىن جەتكىزدى.

استانا قالاسى اۋىل شارۋاشىلىعى باسقارماسىنىڭ باسشىسى مۇرات دالاباەۆتىڭ ايتۋىنشا, بۇگىنگى تاڭدا ەلوردادا كۇن سايىن 120 توننا نان جانە 200 تونناعا جۋىق نان ونىمدەرى وندىرىلەدى. قالا اۋماعىنداعى 12 بيداي وڭدەۋشi كاسىپورىن مەن رەسمي تۇردە تىركەلگەن 30 ناۋبايحانا قالا تۇرعىندارىن نان جانە ناننان جاسالاتىن ونىمدەرمەن تولىقتاي قامتاماسىز ەتىپ وتىر.

سوڭعى بەس جىلدىڭ ىشىندە نان باعاسى وزگەرمەگەن. نان باعاسىن تۇراقتى ۇستاپ تۇرۋ ماقساتىندا ۇكiمەت مەملەكەتتiك قوردان كاسiپورىندارعا ارزان باعامەن بيداي ساتۋ تۋرالى شەشiم قابىلداعان. بيىل دا بۇل باعدارلاما جالعاسىن تاۋىپ, 19 ناۋ­بايحانا نان باعاسىن نەگiزسiز وسiرۋگە جول بەرمەۋ تۋرالى مەموراندۋمعا قول قويعان. دەگەنمەن, نان ونiمدەرi نارىعىنداعى «تسەسنا» كونتسەرنى بۇل باعدارلاماعا بيىل قاتىسپاي, جىل باسىنان بەرى كوممۋنالدىق قىزمەتتەر, ەلەكتر ەنەرگياسى ءۇشىن باعانىڭ وسۋىنە بايلانىستى 10 ماۋسىمنان نان باعاسىن قىمباتتاتۋ تۋرالى شەشiم قابىلداعان. بۇل رەتتە استانادا شىعاتىن بارلىق نان ونىمدەرىنىڭ 15 پايىزىن وندىرەتىن «تسەسنا-استىق» كونتسەرنiنىڭ جەتەكشىسى يليا مەششەرياكوۆتىڭ مالىمدەۋىنشە, بۇگىنگى تاڭدا كاسىپورىن كۇن سايىن 250 مىڭ بولكە نان شىعارادى ەكەن. ناننىڭ ءبىر بولكەسى ءۇشىن ۇن باعاسى 50 تەڭگە بولعاندا 16,5 تەڭگە شىعىن كەتەتىنىن جەتكىزگەن يليا نيكولاەۆيچ بىلتىر كاسىپورىننىڭ 148 ملن تەڭگە, ۇستىمىزدەگى جىلدىڭ بەس ايىندا 56 ملن جانە وسى ون كۇندى قوسا ەسەپتەگەندە 60 ملن-عا جۋىق شىعىنعا باتقانىن ايتتى. «ۇننىڭ قىمباتتاۋى كۇن سايىن 420 مىڭ تەڭگە شىعىن اكەلۋدە. سوعان قاراماستان, سالىق تولەيمىز. ەشقانداي سۋبسيديا جوق» دەگەن كونتسەرن جەتەكشىسى «كىرپىش» ناندى كوبىنە از قامتىلعان وتباسىلار, قۇرىلىستا جۇمىس ىستەيتىندەر, ءتىپتى, كەيبىر تۇرعىنداردىڭ جانۋارلارعا بەرۋ ءۇشىن الاتىنىن ايتتى.

استانا نارىعىندا ون ەكى جىلدان بەرى جۇمىس ىستەپ كەلە جاتقان «ستوليچنىي حلەب» جشس-ءنىڭ ديرەكتورى مارات احاەۆ سوڭعى ءۇش جىلدان بەرى مەموراندۋم بويىنشا نان باعاسىن وسىرمەي كەلگەندەرىن جەتكىزدى. ال قيىندىق بيىل ناۋرىز ايىنان باستالعان. بەس ايدان بەرى اتالمىش كاسىپورىن دا شىعىنعا باتىپ جاتقان كورىنەدى. وسىعان وراي, ول دا زامان تالابىنا ساي جۇمىس ىستەپ, ساپالى تاۋار شىعارۋ ءۇشىن باعانى كوتەرۋى كەرەكتىگىن العا تارتتى.

دەپۋتات ا.كيمنىڭ: «وزگە وڭىرلەردە نان باعاسى قانداي؟» دەگەن سۇراعىنا م.دالاباەۆ اس اتاسى بۇگىندە وسكەمەندە – 63, الماتىدا 65-70 تەڭگەدەن جوعارى ەكەنىن ايتتى. ال, دەپۋتات ا.بايگەنجين كەيبىرەۋلەردىڭ زاۋىتتان شىعارىلاتىن بولكە ناندى مالعا بەرەتىنىن, وسىعان قاراعاندا بىزدەگى نان باعاسىنىڭ تىم ارزان ەكەنىن, سوندىقتان ونىڭ قىمباتتاۋىن قولدايتىنىن جەتكىزدى.

جالپى, ساپالى تاۋاردىڭ قۇنى قاشان دا قىمبات بولادى. دەگەنمەن, بۇعان دەيىن از قامتىلعان, تۇرمىسى تومەن استانالىقتار ناندى «ەۋرازيا» جانە «الەم» ساۋدا ورتالىقتارىنداعى الەۋمەتتىك ورىنداردان تومەن باعامەن ساتىپ الىپ كەلدى. ءماسليحات حاتشىسى س.ەسىلوۆ الداعى ۋاقىتتا وسىنداي ورىنداردىڭ قاتارىن ارتتىرۋدى ۇسىندى.

گۇلبارشىن وكەشقىزى