سۋ تاسقىنىمەن كۇرەسكە ەتنومادەني بىرلەستىكتەردىڭ 12 مىڭعا جۋىق وكىلى قوسىلدى
استانادا پرەزيدەنت قاسىم-جومارت توقاەۆتىڭ قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسى ءوتتى, دەپ حابارلايدى astana-akshamy.kz
وتىرىستا كوتەرىلگەن ماسەلەلەرگە قاتىستى قحا-نىڭ استاناداعى اقساقالدار كەڭەسىنىڭ مۇشەسى, ەۇۋ پروفەسسورى ءامىرجان الپەيىسوۆ پىكىر ءبىلدىردى.
«مەملەكەت باسشىسىنىڭ بۇگىنگى بايانداماسى ەلىمىزدىڭ ساياسي-ەكونوميكالىق جانە الەۋمەتتىك ماسەلەلەرىن قامتىدى. مۇندا بارلىق ماسەلە جان-جاقتى قاراستىرىلعان. بارشاڭىزعا بەلگىلى, قازىر كۇللى الەمدە ءارتۇرلى سيپاتتا تابيعات اپاتىنىڭ سانى ارتۋدا. ەلىمىز دە ۇلكەن قاتەرگە تاپ بولدى. بىرنەشە ايماقتا سۋ تاسقىنى بولىپ جاتىر. ءوز سوزىندە, مەملەكەت باسشىسى بۇعان قازاقستان حالقى اسسامبلەياسى دا بەلسەندى تۇردە كومەكتەسىپ جاتقانىن ايتتى. وزدەرىڭىزگە بەلگىلى, تاسقىن سۋدان زارداپ شەككەن ايماقتارعا اسسامبلەيانىڭ رەسپۋبليكالىق جانە ايماقتىق شتابتارى قۇرىلدى. بۇگىندە «جۇرەكتەن جۇرەككە» اتتى اۋكىمدى اكتسيا جۇرگىزىلۋدە. وڭىرلەرگە 1500 توننادان استام ەڭ قاجەتتى تاۋارلار جىبەرىلدى», – دەدى سپيكەر.
سۋ تاسقىنىمەن كۇرەسكە ەتنومادەني بىرلەستىكتەردىڭ 12 مىڭعا جۋىق وكىلى قوسىلعان. ولار قايىرىمدىلىق جانە گۋمانيتارلىق كومەك جيناۋعا جاردەم بەردى. سونىمەن قوسا, ولار جۇرتتى قاۋىپسىز جەرگە كوشىرۋگە اتسالىستى.
سپيكەر سەسسيادا قاسىم-جومارت توقاەۆ مەملەكەتتىك ساياساتتىڭ باستى وزەگى بىرلىك ەكەنىن باسا ايتقانىنا توقتالدى.
«پرەزيدەنت كوتەرگەن ۇلكەن ماسەلەلەردىڭ ءبىرى – مەملەكەتتىك ءتىلدىڭ الار ورنى. ءوز سوزىندە ءتۇرلى مادەنيەتكە دەگەن قۇرمەت, مەملەكەتتىك ءتىلدى جانە باسقا تىلدەردى دە ءبىلۋ – قازاقستان ازاماتتارىنا ءتان قاسيەتتەر ەكەنى ايتىلدى. تاعى ءبىر كوتەرىلگەن ماسەلە – كەيبىر توپتاردىڭ اراسىندا «اسسامبلەيانىڭ كەرەگى جوق» دەگەن سيپاتتا اڭگىمەلەر بار. مەنىڭ ويىمشا, بۇل ايتىلعان قاۋەسەت – ورىنسىز. بۇعان قاتىستى پرەزيدەنت «اسسامبلەيا – كەيبىر ادامدار ايتىپ جۇرگەندەي, جاساندى ۇيىم ەمەس. اسسامبلەيا – ەل بىرلىگىن ءىس جۇزىندە ورنىقتىرا تۇسەتىن ءتيىمدى قۇرىلىم. بۇگىندە بۇل – كونستيتۋتسيالىق مارتەبەسى بار ماڭىزدى قوعامدىق ورگان. اسسامبلەيا وتە اۋقىمدى قايىرىمدىلىق شارالارىن دەر كەزىندە جانە جەدەل ۇيىمداستىرىپ كەلەدى. مۇنىڭ ءبارى كوپ جىلدىق جۇيەلى جۇمىستىڭ ناتيجەسى ەكەنى ءسوزسىز», دەپ ايتتى.
راسىمەن دە, اسسامبلەيا مۇشەلەرى قايىرىمدىلىق جوبالارى ارقىلى مۇقتاجدارعا ۇنەمى قولداۋ كورسەتىپ كەلەدى. مەنىڭ ويىمشا, بىرلىگى مىقتى حالىقتىڭ كۇش-قۋاتى قيىن-قىستاۋ ۋاقىتتا ايقىن كورىنىس تابادى», – دەپ ءسوزىن تۇيىندەدى ءامىرجان الپەيىسوۆ.
