ەلوردادا جۇمىسسىز جۇرگەن قالا تۇرعىندارىنىڭ جۇمىس تاۋىپ, قارجىلىق جاعدايىن جاقسارتۋعا مۇمكىندىك بەرەتىن «JOLTAP» جوباسى قىزۋ ءجۇرىپ جاتىر, دەپ حابارلايدى astana-akshamy.kz
بۇگىندە جوبا اياسىندا 2 مىڭنان استام ەلوردا تۇرعىنى ءتۇرلى ماماندىقتار بويىنشا وقىتۋ كۋرستارىنان وتكەن. ال وقىتۋ باعدارلامالارى ەڭبەك نارىعىنىڭ سۇرانىستارىنا سۇيەنە وتىرىپ جاسالعان. وقىتۋ كۋرسىنان ءوتىپ, جوبا ارقىلى جۇمىس تاپقانداردىڭ ءبىرى – ەلوردالىق تولەبي تۇرسىنباەۆ. باريستا ماماندىعىن مەڭگەرگەن قالا تۇرعىنى باعدارلاما تۋرالى كەزدەيسوق بىلگەنىن ايتادى.
«مەن ءوزىم ەلورداعا تۇركىستان قالاسىنان كەلدىم. نەگىزى قارجىگەر ماماندىعى بويىنشا ديپلومىم بار. بىراق ول سالادا جۇمىس ىستەگەن جوقپىن. تەك تۇرمىستىق تەحنيكالاردى جوڭدەۋ ىسىمەن اينالاستىم. بۇل جوبا تۋرالى كەزدەيسوق ءبىلدىم دەپ ايتسام بولادى. استانادا ادام كوپ جينالاتىن ورىنداردا وسىنداي پۋنكتەردىڭ اشىلىپ جاتقانىن كورىپ ءجۇردىم. ءبىر كۇنى جاي قىزىعۋشىلىق تانىتىپ, كىرىپ كوردىم. ال ىشتە وتىرعان قىزمەتكەرلەر ماعان قانداي ماماندىققا وقۋعا بولاتىنىن ايتىپ بەردى. بارلىق شارتتاردى ءتۇسىندىردى. سودان باريستا ماماندىعىن تاڭدادىم», – دەيدى قالا تۇرعىنى.
30 جاستاعى تولەبي تۇرسىنباەۆ سوڭعى كەزدە تانىمالدىلىققا يە بولىپ جاتقان ماماندىق بويىنشا بۇرىن دا از ۋاقىت جۇمىس ىستەپ كورگەنىن ايتادى. بىراق ءبىراز جىلدىق ۇزىلىستەن كەيىن «JOLTAP» جوباسى بويىنشا ءبىلىم الۋ كەزىندە كاسىبي مامانداردان ءيىسى اڭقىپ, ءدامى ءتىل ۇيىرەتىن كوفە جاساۋدى قايتا مەڭگەرگەن.
«وقىتۋ كۋرسى ءساۋىر ايىندا بولدى. بەس كۇن ىشىندە باريستانىڭ نەگىزگى قىزمەتتەرىن ۇيرەتتى. كۋرس وتە جاقسى ءوتتى, بارلىعى تۇسىنىكتى بولدى. بۇرىن مەندە باريستا قىزمەتىندە از دا بولسا تاجىريبە بولعاندىقتان, نەگىزگى جۇمىس بارىسىن تەز ەسكە ءتۇسىردىم دەپ ايتسام بولادى. كۋرس بىتكەن سوڭ بىردەن جۇمىس تاپتىم. ارينە, الدىمەن سىناق مەرزىمى بولدى. ال رەسمي تۇردە جۇمىسقا تەز ورنالاستىم. شىنىمدى ايتسام, باريستا بولۋدى ارمانداعان جوقپىن. بىراق كوفەمانمىن دەپ ايتا الامىن. جالپى مۇنداي جۇمىس مەنىڭ كوڭىلىمە جاقىن. جايلى جانە شىعارماشىلىق ەركىندىك بار», – دەيدى ول.
بۇگىندە ارامىزدا كەيىپكەرىمىز سياقتى بار مۇمكىندىكتى پايدالانىپ, جۇمىسقا ورنالاسقان تۇرعىندار كوپ. بيىل ەلوردادا وسى جوبا بويىنشا 10 مىڭ تۇرعىندى جاڭا ماماندىقتارعا وقىتۋ جوسپارلانىپ وتىر.
ايتا كەتەيىك, قاتىسۋشىلاردىڭ تاڭداۋىنا 14 ماماندىق ۇسىنىلعان. ال وقىتۋ باعدارلامالارى ماماندىققا بايلانىستى 2 اپتادان 1 ايعا دەيىن بارىنشا قىسقا مەرزىمدە پراكتيكالىق داعدىلاردى ۇسىنۋعا باعىتتالعان. جوبا ارقىلى وقىعىسى نەمەسە اقىل-كەڭەس, باعىت-باعدار العىسى كەلەتىن كەز كەلگەن ازاماتقا قالانىڭ ادام كوپ جينالاتىن ورىندارىندا ورنالاسقان «بارشاعا مۇمكىندىك» مودۋلدىك پۋنكتتەرىندە تەگىن كەڭەس بەرىلەدى.
