بايقوڭىر اۋدانىنىڭ بەلسەندى ۇزاق ءومىر ءسۇرۋ ورتالىعىندا ارداگەر-جۋرناليستەردىڭ قاتىسۋىمەن «قالامگەردەن شىققان ءسوز» اتتى ادەبي كەش ءوتتى, دەپ حابارلايدى astana-akshamy.kz
كەش جازۋشى, بەلگىلى جۋرناليست, «ەگەمەن قازاقستان» گازەتىنىڭ ەكونوميكا جانە ءوندىرىس بولىمىنىڭ مەڭگەرۋشىسى اباي ايماعامبەتتىڭ شىعارماشىلىعىنا ارنالدى.
ادەبي كەشتى قر جۋرناليستەر وداعىنىڭ مۇشەسى, عالىم, كوپتەگەن تانىمدىق كىتاپتاردىڭ اۆتورى, ورتالىقتىڭ قازاق ءتىلى ءپانىنىڭ وقىتۋشىسى مارجان پىرىمبەتوۆا جۇرگىزىپ, جينالعانداردى جاس قالامگەردىڭ شىعارماشىلىق ومىرىمەن تانىستىردى.
وسى كەشكە قاتىسۋشى ارداگەر-جۋرناليستەر مەن ءتىل ماماندارى جازۋشى ا. ايماعامبەتكە اعا بۋىن وكىلدەرىن تولعاندىراتىن ماسەلەلەردى ايتتى. سونداي-اق, ارداگەر ارىپتەستەرىنىڭ اقىل-كەڭەسىن قابىلداپ, وزەكتى تاقىرىپتاردى ءوز شىعارماشىلىعىندا پايدالانۋدى سۇرادى.
كەش بارىسىندا ارداگەر-جۋرناليست, قالامگەر, ادەبي اۋدارماشى باياندى ءالپي مەن ءباسپاسوز قىزمەتىنىڭ ارداگەرى كەڭتاي الدىرباي قازىرگى جۋرناليستيكا سالاسىندا تۋىنداعان ماسەلەلەردى ورتاعا سالدى.
ەكى بۋىن وكىلدەرىنىڭ كەزدەسۋى جىلى اتموسفەرادا ءوتتى.
«بۇگىندە ءبىزدىڭ ورتالىققا بايقوڭىر اۋدانى بويىنشا 2500-گە جۋىق زەينەتكەر كەلەدى, ولاردىڭ ىشىندە 128 ادام قازاق ءتىلى كۋرستارىنا قاتىسىپ ءجۇر. ولار ءتىلدى مەڭگەرۋ دەڭگەيلەرىنە قاراي التى توپقا ءبولىپ وقىتىلادى. قىزمەت الۋشى زەينەتكەرلەر اراسىندا اقىن-جازۋشىلار, بۇرىڭعى جۋرناليستەر مەن فيلولوگ ماماندار بار. وسى ەكى بۋىن وكىلدەرىنىڭ اراسىنداعى ساباقتاستىقتى جالعاستىرۋ ءۇشىن كوپتەگەن ادەبي بايگەلەردىڭ جۇلدەگەرى, ۇزدىك پروزاشى, بەلگىلى جۋرناليست اباي ايماعامبەتپەن كەزدەسۋ وتكىزۋدى ءجون كوردىك. كەزدەسۋدە جاس تالانت اباي باۋرىمىزدىڭ ونەرىنە ءتانتى بولعان زەينەتكەرلەر جىلى لەبىزدەرىن ءبىلدىرىپ, ونىڭ شىعارماشىلىعىنىڭ ءوسىپ-وركەندەۋىنە تىلەكتەس بولدى» – دەپ پىكىر ءبىلدىردى ءتىل مامانى مارجان پىرىمبەتوۆا.
«بەسىنشى جاتاقحانا» كىتابىنىڭ اۆتورى, رەسپۋبليكالىق دەڭگەيدە وتكىزىلگەن «جۋسان ءيىسى», «اۋىل حيكايالارى», «جاسىل ءسوزدىڭ جارقىلى», «التىن توبىلعى» ادەبي بايقاۋلارىنىڭ جۇلدەگەرى اباي ايماعامبەتتىڭ شىعارماشىلىعىنا ارناعان ادەبي كەش زەينەتكەرلەردىڭ كوڭىلىنەن شىعىپ, ارداگەرلەر اق باتاسىن بەردى.
كەش سوڭىندا بەلسەندى ۇزاق ءومىر ءسۇرۋ ورتالىعىنىڭ ديرەكتورى مۇحتار ەركەتاەۆ جاس قالامگەرگە شىعارماشىلىق شابىت تىلەپ, ۇجىم اتىنان العىسىن ءبىلدىردى.
