ەلوردادا «تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى ءوتىپ جاتىر, دەپ حابارلايدى astana-akshamy.kz
بۇل اپتالىق «جاسىل ايماق» ۇرانىمەن اعاش وتىرعىزۋ, اقتاۋ, ت.ب. شارالارعا ارنالىپ وتىر. ەكواكتسياعا 70-كە جۋىق شەتەلدىك ەلشىلىكتەر مەن حالىقارالىق ۇيىمدار قولداۋ كورسەتتى. ولاردىڭ اراسىندا جاپونيا, تۇركيا, رەسەي, ت.ب. ەلشىلىكتەرى اعاش وتىرعىزىپ, اۋماقتى اباتتاندىردى.
«قالادا جۇمىس ىستەپ, تۇرىپ جاتقان ۋاقىتىمدا ەلوردانىڭ قالاي دامىپ, كوركەيىپ كەلە جاتقانىن كورىپ ءجۇرمىن. ءاربىر تۇرعىننىڭ تازالىق پەن ءتارتىپتى قامتاماسىز ەتۋگە قالاي ۇلەس قوسىپ جاتقانىن كورۋ قۋانتادى. ءبىز ءوز كەزەگىمىزدە دوستارىمىز بەن كورشىلەرىمىز ءۇشىن وتە قۋانىشتىمىز. سونىمەن, بۇگىن ەكولوگيالىق اكتسياعا قولداۋ كورسەتە وتىرىپ, «تازا قازاقستان. استانا – تازالىق پەن ءتارتىپ ۇلگىسى» دەپ كوشەت ەگىپ جاتىرمىز. وسى ءساتتى پايدالانا وتىرىپ, بارلىق ەلوردا تۇرعىندارى مەن قوناقتارىنا زور دەنساۋلىق جانە تاماشا كوكتەم تىلەيمىن», – دەدى رەسەيدىڭ قازاقستانداعى ەلشىسى الەكسەي بوروداۆكين.
ەكواكتسياعا قاتىسۋشىلار ءوز اۋماقتارىن بەلسەندى تۇردە كوگالداندىردى.
«كەڭ اۋقىمدى ەكولوگيالىق ناۋقان اياسىندا ءبىز جاسىل جەلەكتەردى, اتاپ ايتقاندا 25 ۇيەڭكى كوشەتتەرىن وتىرعىزۋ جۇمىسىن جۇرگىزدىك. ايتا كەتەرلىگى, «جاسىل ايماق» اپتالىعى 11 مامىرعا دەيىن جالعاسىپ, اعاش وتىرعىزۋ مەن اقتاۋعا ارنالعان», – دەيدى وندىرىستىك-تەحنيكالىق ءبولىمنىڭ باس مامانى نۇربەرگەن نۇرمۇحامبەت.
ەستەرىڭىزگە سالا كەتەيىك, اۋقىمدى ەكولوگيالىق اكتسيا اياسىندا قالانى, نوسەر جانە ارىق كارىز جەلىلەرىن سانيتارلىق تازالاۋ, كوشەلەردى, تروتۋارلاردى, كۆارتالىشىلىك اۋماقتاردى, قوعامدىق ورىندار مەن اۋلالاردى تازالاۋ جۇمىستارى دا جۇرگىزىلىپ جاتىر.
سونداي-اق, جاسىل جەلەكتەردى كۇتىپ-باپتاۋ جانە كوگالداندىرۋ, ساۋدا نىساندارىنا ىرگەلەس اۋماقتاردى تازالاۋ, كوگالدار مەن گۇلزارلاردى رەتكە كەلتىرۋ, رۇقسات ەتىلمەگەن قوقىستاردى جويۋ جانە ت.ب. جۇرگىزىلىپ جاتىر.
