ەلوردادا ۆانداليزممەن كۇرەسۋ جانە الدىن الۋ بويىنشا بەلسەندى جۇمىس ءجۇرىپ جاتىر, دەپ حابارلايدى astana-akshamy.kz
قۇقىق قورعاۋ ورگاندارى تاعى كەزەكتى ۆاندال وقيعاسىن انىقتاپ, ءتيىستى شارا قولداندى.
سونىمەن, 13 ءساۋىر كۇنى ساعات 15:30-دا 35 جاستاعى ەر ادام قارتالى كوشەسى, 18/1 تۇرعىن ءۇيدىڭ 6-پودەزىندە مەتالل توردى سىندىرعان. ونىڭ جەكە باسى انىقتالىپ, اكىمشىلىك جاۋاپكەرشىلىككە تارتىلدى.
تاعى ءبىر جاعدايدا, 22 ءساۋىر كۇنى ساعات تۇنگى 03.00-دە 44 جاستاعى ەر ادام ماس كۇيىندە ابىلاي حان داڭعىلى, 26/2 مەكەن جايىندا ورنالاسقان دەمالۋ ورنىنىڭ ەسىگىن قاساقانا ۇرىپ سىندىرعان. وزگەنىڭ مۇلكىن بۇلدىرگەنى ءۇشىن 10 كۇنگە قاماۋعا الىندى.
ايتا كەتەيىك, جىل باسىنان بەرى استانادا ەرىكتىلەر, بەلسەندىلەر, تانىمال سپورتشىلار, قالا تۇرعىندارى قولداۋ بىلدىرگەن «توقتا, ۆاندال» اكتسياسى بويىنشا ءبىرشاما جۇمىستار اتقارىلۋدا. اكتسيا اياسىندا قالادا كۇندىزگى جانە تۇنگى رەيدتەر وتكىزىلەدى, تۇرعىندار اراسىندا قوعامدىق ءتارتىپتى ساقتاۋ جانە قالا مۇلكىنە ۇقىپتى قاراۋ قاجەتتىلىگى تۋرالى ءتۇسىندىرۋ جۇرگىزىلىپ كەلەدى.
جىل باسىنان بەرى سوت بوتەننىڭ مۇلكىن قاساقانا سىندىرعانى, جالپى پايدالانۋ ورىندارىن لاستاعانى, عيماراتتار مەن تۇرعىن ءۇي-جايلاردى بۇلدىرگەنى ءۇشىن 100-گە جۋىق ادام جازالاندى. ولاردىڭ ءبارى جاۋاپقا تارتىلدى.
