استانادا «تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى ءوتىپ جاتىر, دەپ حابارلايدى astana-akshamy.kz
بۇل اپتا «ءمولدىر بۇلاق» دەپ اتالادى, ونىڭ بارىسىندا سۋ ايدىندارى – وزەندەر مەن كولدەردىڭ اينالاسى قوقىستان تازارتىلادى. ەكواكتسيا اياسىندا GPT نەيروجەلىلىك چاتىنىڭ كومەگىمەن جاسالعان سۋرەتتەردىڭ فوتوكورمەسى ءوتتى.
قوناقتار مەن قالا تۇرعىندارىنىڭ نازارىنا الەمدى جاساندى ينتەللەكت كوزىمەن بەينەلەيتىن 50 ەرەكشە سۋرەت ۇسىنىلدى. كەلۋشىلەر ەكولوگياعا جاۋاپسىز كوزقاراستى كورسەتەتىن جانە قورشاعان ورتاعا قامقورلىق جاساۋعا شاقىراتىن سۋرەتتەردى كوردى.
GPT چاتىمەن جاسالعان كارتينالاردىڭ ارقايسىسى قازىرگى جاعدايدى جانە بولاشاقتى بەينەلەيدى. سۋرەتتەر ءارتۇرلى ستيلدە جاسالعان. جاساندى ينتەللەكت بولاشاقتى قالاي بەينەلەيتىنى كەلۋشىلەردى ەرەكشە قىزىقتىردى.
ءىس-شارا اياسىندا بەلگىلى ەكوبەلسەندى شاساليم شاگاليموۆ ەلوردا تۇرعىندارى ءۇشىن تابيعاتقا جاناشىرلىق تاقىرىبىندا ءدارىس وقىدى.
«ءبىزدىڭ ەلىمىز ءۇشىن ەكولوگيا وتە ماڭىزدى ماسەلە. بۇل سالاداعى پروبلەمالاردىڭ وڭ شەشىمىن قالاداعى كوممۋنالدىق قىزمەتتەر عانا ەمەس, تۇرعىندار دا قولداۋى ءتيىس. كولىك تەرەزەسىنەن لاقتىرىلعان نەمەسە ارنايى جاشىككە سالىنباعان كىشكەنە قوقىستىڭ ءوزى ەكولوگياعا, جولدارعا, كوشەلەرگە, جالپى قالامىزدىڭ سىرت كەلبەتىنە تەرىس اسەر ەتەتىنىن ۇمىتپاۋىمىز كەرەك. قورشاعان ورتاعا, تابيعاتقا قۇرمەتپەن قاراۋعا, جاقسى ەكولوگيا ۇلت دەنساۋلىعىنا تىكەلەي اسەر ەتەتىنىن ەستە ساقتاۋعا شاقىرامىن», – دەدى شاساليم شاگاليموۆ.
ەستەرىڭىزگە سالا كەتەيىك, اۋقىمدى ەكواكتسيا اياسىندا قالانى سانيتارلىق تازارتۋ, نوسەر جانە ارىق جەلىلەرى, كوشەلەردى, تروتۋارلاردى, كۆارتالىشىلىك اۋماقتاردى, قوعامدىق كەڭىستىكتەر مەن اۋلالاردى تازالاۋ جۇمىستارى جۇرگىزىلىپ جاتىر.
سونداي-اق, جاسىل جەلەكتەردى كۇتىپ-ۇستاۋ جانە وتىرعىزۋ, ساۋدا نىساندارىنا ىرگەلەس اۋماقتاردى جيناۋ, كوگالدار مەن گۇلزارلار ورناتۋ, رۇقسات ەتىلمەگەن پوليگونداردى جويۋ جانە ت.ب. جۇمىستار جۇرگىزىلۋدە.
