سەنات سپيكەرى ماۋلەن اشىمباەۆتىڭ توراعالىعىمەن پالاتا جانىنداعى جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەستىڭ وتىرىسى ءوتتى. ءىس-شاراعا سەناتورلار, مەملەكەتتىك ورگانداردىڭ باسشىلىعى جانە ونلاين-فورماتتا ەلىمىزدىڭ بارلىق وڭىرىندەگى ءماسليحات دەپۋتاتتارى قاتىستى.
ءوز سوزىندە سەنات توراعاسى كەڭەستىڭ بۇعان دەيىنگى وتىرىسىندا بەلگىلەنگەن مىندەتتەر بويىنشا اتقارىلعان ىستەر جونىندە ايتتى جانە الداعى بىرلەسكەن جۇمىستى ءتيىمدى جۇزەگە اسىرۋدىڭ ناقتى تەتىكتەرىنە توقتالدى. اتاپ ايتقاندا, زاڭ شىعارۋ قىزمەتىمەن بىرگە وڭىرلەردەگى پروبلەمالاردى بىرلەسىپ شەشۋ, جەرگىلىكتى مەملەكەتتىك باسقارۋ جانە ءوزىن-ءوزى باسقارۋ جۇيەسىن دامىتۋ, زاڭداردىڭ ايماقتاردا ورىندالۋ بارىسىن باقىلاۋ, سونداي-اق ماسليحاتتارعا مەتوديكالىق جانە ماتەريالدىق-تەحنيكالىق قولداۋ كورسەتۋ باعىتتارى بويىنشا سەنات پەن جەرگىلىكتى وكىلدى ورگاندار اراسىنداعى ءوزارا ءىس-قيمىلدى ناتيجەلى جۇزەگە اسىرۋ ماسەلەلەرى ءسوز بولدى.
ماۋلەن اشىمباەۆ بۇل ىستە مەملەكەت باسشىسى جولداۋدا بەلگىلەپ بەرگەن ەكونوميكالىق ساياساتتىڭ جاڭا ۇلگىسىنە كوشۋ ماسەلەسىنە قاتىستى مىندەتتەردىڭ ماڭىزدى ەكەنىنە نازار اۋداردى. «پرەزيدەنتىمىز ەكونوميكانىڭ جاڭا سالالارىن دامىتۋ بويىنشا ناقتى مىندەتتەر جۇكتەدى. الەۋمەتتىك جانە ينجەنەرلىك ينفراقۇرىلىمدى جاڭعىرتۋ باعىتىنا دا ۇلكەن كوڭىل ءبولىنىپ وتىر. حالىقتىڭ ءال-اۋقاتىن ارتتىرۋدى كوزدەيتىن كەشەندى ءىس-شارالار دا جۇزەگە اسىرىلىپ كەلەدى. ەلدىڭ يگىلىگىنە ارنالعان وسى باعىتتاردا بىرلەسىپ, ناتيجەلى جۇمىس ىستەۋىمىز قاجەت. مەملەكەت باسشىسىنىڭ تاپسىرمالارىنا سايكەس, بيىل پارلامەنت بىرقاتار زاڭدار قابىلدايدى. ولاردىڭ قاتارىندا جاڭا سالىق, بيۋدجەت, قالا قۇرىلىسى, سۋ كودەكستەرى بار. بۇل زاڭ جوبالارى بويىنشا, اسىرەسە وڭىرلەرگە قاتىستى ماسەلەلەردە, ءماسليحات دەپۋتاتتارىنىڭ ۇسىنىستارىن نازارعا الۋدىڭ ماڭىزى زور» دەدى ماۋلەن اشىمباەۆ.
سونىمەن قاتار پالاتا سپيكەرى بيىل ەلىمىزدە ءماسليحاتتاردىڭ قۇرىلعانىنا 30 جىل تولاتىنىن اتاپ ءوتتى. كەڭەس وتىرىسىنىڭ قورىتىندىسى بويىنشا زاڭ شىعارۋ قىزمەتىندە جانە باسقا دا ماڭىزدى باعىتتاردا بارلىق دەڭگەيدەگى دەپۋتاتتاردىڭ كۇش-جىگەرىن بىرىكتىرىپ, بىرلەسكەن جۇمىستى ودان ءارى جانداندىرۋدىڭ ماڭىزدى ەكەنى ايتىلدى.
ءىس-شارا بارىسىندا جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەس توراعاسىنىڭ ورىنباسارى تولەۋبەك مۇقاشەۆ, وڭىرلەردىڭ ءماسليحات دەپۋتاتتارى ۆلاديمير بۋبەنكو, ەرلان كاناليموۆ, گۇلقاسيما سۇيىنتاەۆا, ناۋرىزباي بايقاداموۆ جانە تاعى باسقالارى ءسوز سويلەپ, ءوزارا ءىس-قيمىلدىڭ تيىمدىلىگىن ارتتىرۋ جونىندە ۇسىنىس-پىكىرلەرىن ءبىلدىردى.
ەرلان كاناليموۆ ءوز سوزىندە زاڭ شىعارۋ پروتسەسىنىڭ بارلىق قاتىسۋشىلارىمەن ءوزارا ءىس-قيمىل تەتىگىن جەتىلدىرۋ ءۇشىن ءماسليحات دەپۋتاتتارىنىڭ زاڭ شىعارۋ قىزمەتىنە قاتىسۋىن قامتاماسىز ەتۋ قاجەت ەكەنىن اتاپ ءوتتى. «وسىعان بايلانىستى ءماجىلىس پەن پارلامەنت سەناتىنىڭ جۇمىس توپتارىنىڭ قۇرامىنا ءماسليحات دەپۋتاتتارىن قوسۋدى, ايىنا نەمەسە توقسانىنا ءبىر رەت وزەكتى ماسەلەلەردى شەشۋ ءۇشىن جۇمىس تارتىبىمەن كەزدەسۋلەر وتكىزۋدى ۇسىندىم. ءبىز كوتەرگەن ماسەلەلەر «ۇزاق جاشىككە» كەيىنگە قالدىرىلماۋى ءۇشىن جەدەل شارالاردى ازىرلەۋ ءۇشىن ديالوگ الاڭىن قۇرۋ قاجەتتىگى تۋرالى ايتىپ بەردىم» دەدى ءماسليحات توراعاسى.
