ەلوردادا جىل باسىنان بەرى جولاقى تولەمەگەن 900 ازاماتقا ايىپپۇل سالىندى. بۇل تۋرالى «City Transportation Systems» جشس كولىكتىك باقىلاۋ دەپارتامەنتى ديرەكتورىنىڭ ورىنباسارى رايىمبەك قايروللا مالىمدەدى.
بيىل ەلورداداعى قوعامدىق كولىكتەردە كوندۋكتور قىزمەتىن الىپ تاستاپ, جولاقىنى ەلەكتروندى تۇردە تولەۋ جۇيەسى ەنگىزىلگەنىنە 6 جىل بولادى. وسى ۋاقىت ارالىعىندا اۆتوبۋستاردا ونلاين تولەم جۇيەسىنىڭ جاڭا تۇرلەرى پايدا بولىپ, قالا تۇرعىندارىنا ەش كەدەرگىسىز تولەم جاساۋعا مۇمكىندىك بەرىلدى. وسىعان قاراماستان, جولاقى تولەۋدەن جالتارىپ, ايىپپۇل تولەپ جۇرگەن ەلوردالىقتار سانى ازايار ەمەس. سوڭعى جىلدارداعى ستاتيستيكالىق دەرەكتەرگە سۇيەنسەك, جولاقى تولەمەيتىن جولاۋشىلار سانى ازايماي تۇر. كولىك باقىلاۋ دەپارتامەنتىنىڭ قىزمەتكەرلەرى 2020 جىلى جولاقى تولەمەۋدىڭ 207 545 دەرەگىن تىركەپ, 3 مىڭعا جۋىق ازاماتقا 16 323 740 تەڭگە ايىپپۇل سالدى. ال 2021 جىلى 222 مىڭ ادام اۆتوبۋسپەن «تەگىن» جۇرسە, جاۋاپسىز جولاۋشىلارعا 57 ملن تەڭگەگە ايىپپۇل سالىنعان.
– ءبىزدىڭ ەسەپپەن كۇنىنە جولاۋشىلاردىڭ 10-15 پايىزى جولاقىسىن تولەمەي, تەگىن قاتىنايدى. بۇل, شامامەن, 90 مىڭ ادام. ەندى وسى 90 مىڭدى 90 تەڭگەگە كوبەيتسەك, كۇنىنە 8 ميلليون تەڭگە شىعادى. جىلىنا اۆتوبۋس پاركتەرىنە 2,9 ملرد شىعىن كەلەدى. ماسەلەن, 2023 جىلدىڭ قورىتىندىسى بويىنشا كولىكتىك باقىلاۋ دەپارتامەنتىنىڭ قىزمەتكەرلەرى 200 مىڭنان اسا جولاۋشىنىڭ جولاقىسىن تولەمەگەنىن انىقتادى. بىراق 10 مىڭنان اسا جولاۋشىعا عانا اكىمشىلىك حاتتاما تولتىرىلدى. ونىڭ جالپى سوماسى 70 ملن تەڭگەدەن اسادى. ءبىزدىڭ قىزمەتكەرلەر تەكسەرىس بارىسىندا اۆتوبۋستىڭ تولەم جۇيەسىن بلوكقا قويادى. بۇعاتتاعان كەزدە جولاقىسىن تولەمەگەن جولاۋشىنى انىقتايدى. ونىڭ ايالدامادان ءتۇسۋىن سۇرايدى. ءارى قاراي 102-گە حابارلاسىپ, پوليتسيا قىزمەتكەرلەرىن 30 مينۋتتان 1 ساعاتقا دەيىن كۇتەدى. بۇل مەزەتتە تەكسەرۋشى مەن جولاۋشى اراسىندا داۋ باستالادى. ال ءبىزدىڭ قىزمەتكەرلەر ولاردى كۇشتەپ ۇستاپ تۇرا المايدى, – دەدى رايىمبەك قايروللا.
زارينا سارسەنبايقىزى
