قالادا سوڭعى كۇندەرى قالىڭ قار جاۋىپ, كوممۋنالدىق قىزمەت كۇشەيتىلگەن رەجيمدە جۇمىس ىستەۋدە. جەكە سەكتورداعى ەگدە جاستاعى تۇرعىندارعا ءۇيدىڭ اۋماعىن ءوز بەتىنشە تازالاۋ وڭاي ەمەس. بۇل رەتتە ەلوردا ەرىكتىلەرى «قايىرىمدىلىق ىستەر» مارافونى اياسىندا زەينەتكەرلەر ۇيلەرىنىڭ اۋلالارىندا قار تازالاۋ اكتسياسىن جالعاستىردى.
كەشە ەلوردالىق جاستار سارىارقا اۋدانى تۇرعىندارىنىڭ ۇيلەرىنە بارىپ, اۋماقتى قاردان تازارتۋعا كومەكتەستى. جىل باسىنان بەرى اكتسيا اياسىندا قالانىڭ بارلىق اۋداندارى بويىنشا جالعىزباستى اتا-اجەلەردىڭ 40-تان اسا جەكە اۋلاسى تازارتىلدى. ەرىكتىلەردىڭ جۇمىسى تۋرالى قالا تۇرعىندارىنىڭ ءبىرى سانات مۇسابەكوۆ پىكىرىن ءبىلدىردى.
– جاستاردىڭ زەينەتكەرلەرىمىزگە كومەكتەسىپ جاتقانىن كورىپ, مارقايىپ قالدىق. بۇل ءوز كەزەگىندە باسقا ادامدارعا ۇلگى بولادى. سوندىقتان اعام ەكەۋمىز دە اۋلانى قاردان تازارتۋعا كومەكتەسەتىن جاقىندارى جوق كورشىلەرىمىزگە قول ۇشىن بەرۋگە تىرىسامىز, – دەدى سانات.
قايىرىمدىلىق اكتسياسى جالپى قالا مادەنيەتىنە دە اسەر ەتەدى. ەشتەڭەگە بەيجاي قارامايتىن تۇرعىندار يگى ىستەرگە قوسىلۋدا. كەز كەلگەن ادام ەرىكتىلەردىڭ قاتارىن تولىقتىرا الادى. ول ءۇشىن «استانا جاستارى» جاستار رەسۋرستىق ورتالىعىنىڭ Instagram اككاۋنتىنا حابارلاما جازۋ كەرەك.
– «قايىرىمدىلىق ىستەر مارافونى» اكتسياسى اياسىندا سىزدەر ءبىزدىڭ قاتارىمىزدى تولىقتىرىپ, ەرىكتى بولا الاسىزدار. قازاقستاننىڭ بولاشاعى –جاستاردىڭ قولىندا ەكەنىن ەستە ساقتاڭىز» دەدى استانالىق جاستار.
