استانا قالاسى اكىمدىگىنىڭ جاستار تەاترى «شىراق» قويىلىمى ارقىلى بىلتىر «35 گرادۋس» دەگەن اتاۋمەن وتكەن ءى رەسپۋبليكالىق جاستار تەاترلارى فەستيۆالىندە جۇلدەگە يە بولدى. ناقتىراق ايتقاندا, اتالعان قويىلىمنىڭ رەجيسسەرى شىڭعىس جاقىپباي «ەڭ ۇزدىك رەجيسسەر» ديپلومىمەن ماراپاتتالدى. فەستيۆالدىڭ اتى ايتىپ تۇرعانداي, ءىس-شارا اياسىندا تەك 35 جاسقا دەيىنگى رەجيسسەرلەردىڭ تاڭداۋلى قويىلىمدارى ساحنالاندى. سولاردىڭ ءبىرى – استانالىق 30 جاستاعى ش.جاقىپباي مەن باسقا وڭىرلەردەن كەلگەن سونداي 7 رەجيسسەرگە فەستيۆالدىڭ اشىلۋ سالتاناتىندا وسى ديپلوم تابىستالدى.
«تەاتردىڭ باعى دا, سورى دا – رەجيسسەر» دەمەكشى, تەاتر رەجيسسەرى بولۋدىڭ ءوزى – تاباندى جانە قاجىرلى ەڭبەك پەن زور ىزدەنىستى, شىعارماشىلىق تولعانىستى قاجەت ەتەتىن ۇلكەن ونەر. سەگىز جىلدىق اكتەرلىك تاجىريبەسى بار شىڭعىس وسى قيىن جولداعى العاشقى قادامىن بىلتىر ناۋرىز ايىندا «شىراق» مۋزىكالىق قويىلىمى ارقىلى باستادى. دەبيۋتتىك سپەكتاكلىنە ول ۇزاق ويلانىپ, ىشتەي كوپ دايىندالىپ بارىپ كىرىسكەن.
– ءوزىم وسى سپەكتاكلدى قويايىنشى دەپ نيەتتەنىپ ءجۇردىم. نەگىزى, رەجيسسەر بولۋ وتە قيىن, ۋايىمى كوپ جۇمىس ەكەن. ارينە, ءبىر دەبيۋتتىك قويىلىمعا بولا ءوزىمدى رەجيسسەرمىن دەپ سانامايمىن. ول ءۇشىن ءالى تالاي ەڭبەك ەتىپ, كورەرمەن جۇرەگىن جاۋلايتىن پەسالار ساحنالاۋ كەرەك. سەنىڭ كىم ەكەنىڭدى كورەرمەن ءوزى انىقتايدى. ءبىز اتالعان فەستيۆالگە ءوتىنىش جىبەرگەندە وتەمىز دەپ ويلامادىق. قانشاما تەاتردىڭ اراسىندا ءبىزدى تاڭدامايتىن شىعار دەگەن وي بولدى. بىراق حابار كەلگەندە وتە قاتتى قۋاندىق. ءبىز ءۇشىن بۇل – ۇلكەن قۋانىش. سەبەبى فەستيۆالگە قاتىسۋعا شاقىرتۋ الۋدىڭ ءوزى جەڭىس دەپ ويلايمىن, – دەيدى جاس رەجيسسەر شىڭعىس جاقىپباي.
«شىراق» – band ستيلىندە, جاندى مۋزىكالىق شىعارمالارعا نەگىزدەلگەن ليريكالىق دراما. سپەكتاكلدىڭ اۆتورى – قر مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى نۇرلان ورازالين. قويىلىمدا تانىمال ءانشى مارحابا ءسابيدىڭ «ۇنسىزدىك», «جاقسى ادام», «و نەمەنە؟», «مارسقا», «تاسپاي», «قايتەمىز؟» دەگەن اندەرى ورىندالدى.
– قازىر كورەرمەندى تاڭعالدىرۋ قيىن, نەگىزى. وسى ماقساتتا ءبىراز ۋاقىتتان بەرى تەاترلار مۋزىكالىق قويىلىمداردى كوبەيتتى. بۇل دا سونداي تۋىندى. قويىلىمدى باستار الدىندا مارحابا سابيدەن اندەرىن ورىنداۋعا رۇقسات الدىق. رەجيسسەر ءۇشىن ەڭ ءبىرىنشى پەسا ماتەريالىنىڭ, ياعني ءتۇپ شىعارمانىڭ ءمانى مەن ايتار ويى ماڭىزدى. «شىراق» – وتباسى قۇندىلىعى تاقىرىبىن كوتەرەتىن تۋىندى. كۇيەۋىنىڭ ايەلىنە كوڭىل بولمەۋى, جاس كەلىنشەكتىڭ ءوزىن كەرەك سەزىنۋ ءۇشىن ماحابباتتى سىرتتان ىزدەۋى قويىلىم تاقىرىبىنا ارقاۋ بولعان. ءومىرىمىزدىڭ ءمانى – وتباسىنداعى سىيلاستىقتى قالاي ساقتاپ قالۋعا بولادى؟ سەنىم مەن كۇدىك تايتالاسقا تۇسكەندە تۋرا جولدى قالاي تاباسىڭ؟ قويىلىم وسى ساۋالدارعا جاۋاپ ىزدەيدى, كۇلدىرە وتىرىپ, كورەرمەنىن ماڭگىلىك قۇندىلىقتاردىڭ قادىرىن ءتۇسىنىپ, باعالاۋعا شاقىرادى, – دەيدى ش.جاقىپباي.
ونەرلى شاڭىراقتا دۇنيەگە كەلگەن ەكى ۇلدىڭ كىشىسى شىڭعىس قانا اتا-اناسىنىڭ جولىن قۋدى. ولار باسىندا بۇعان قارسى بولسا دا, قانمەن بەرىلگەن ونەرگە تۇساۋ سالمايىق دەپ كەنجەسىنىڭ قادامىن قولدادى. ءسويتىپ ول 2009-2012 جىلدارى ت.جۇرگەنوۆ اتىنداعى قازاق ۇلتتىق ونەر اكادەمياسى كوللەدجىن «مۋزىكالىق تەاتر اكتەرى» ماماندىعى بويىنشا ءتامامدادى. 2012-2016 جىلدارى وسى اكادەميادا «ەسترادا ءارتىسى» (ميۋزيكل) ماماندىعى بويىنشا جوعارى ءبىلىم الدى. 2015 جىلدان باستاپ استانا قالاسى اكىمدىگىنىڭ «جاستار» تەاترىنىڭ اكتەرى.
تەاتردا 11 قويىلىمدا جانە كينودا دا سان الۋان ءرولدى سومداعان. ماسەلەن, تەاتردا «موتسارت» ميۋزيكلىندە كنياز, روزەنبەرگتىڭ بەينەسىن, «ءنارتاۋەكەل» درامالىق داستانىندا سابالاق, ءابىلمانسۇردىڭ ءرولىن, «مەيىرىمدى جۇرەك» ەرتەگىسىندە قاسقىردىڭ كەيپىن, «چيپوللينو» ەرتەگىسىندە بۇرشاقتىڭ ءرولىن, «ءومىر» دراماسىندا بوزبالا ءومىردىڭ ءرولىن, «قۇلىنشاق پەن بولتىرىك» ەرتەگىسىندە قاسقىردىڭ, «قار حانشايىمى» ەرتەگىسىندە زۇلىم سيقىرشىنىڭ, قاراقشىلاردىڭ, «ىرىمشىك قۇمار تىشقاندار» ەرتەگىسىندە مارتوننىڭ, «كوزىمنىڭ قاراسى» مۋزىكالىق دراماسىندا بوزبالا ابايدىڭ, «جىل – ون ەكى اي» ەرتەگىسىندە ساربازدىڭ, «رومەو-جۋلەتتا» سپەكتاكلىندە رومەونىڭ رولدەرىن سومدايدى. ال كينويندۋستريادا «بولاشاق» تەلەحيكاياسىندا ارمان رولىمەن تانىلدى. تەاترداعى جەتىستىكتەرىنىڭ ىشىندە 2014 جىلى وڭتۇستىك كورەيا «DIMF-2014» ميۋزيكل فەستيۆالىنىڭ لاۋرەاتى اتانعانىن ايتا كەتۋگە بولادى. جاس اكتەر ءارى رەجيسسەر شىڭعىس نۇرقاناتۇلى قازىرگى تاڭدا كەلەسى ءبىر رەجيسسەرلىك قويىلىمدى ساحنالاۋ ءۇشىن شىعارماشىلىق ىزدەنىس ۇستىندە. بولاشاقتا ونىڭ جاڭا سپەكتاكلىن ەلوردانىڭ «جاستار» تەاترىنىڭ ساحناسىنان تاماشالاپ تا قالارمىز.
