تاۋەلسىزدىك سارايىندا قوستانايلىق سۋرەتشى ۆاديم بىكوۆتىڭ «قاس-قاعىم ءسات, ايالدا, سەن عاجاپسىڭ!» اتتى كورمەسى اشىلدى. كورمەگە قىلقالام شەبەرىنىڭ 50-دەن اسا كەسكىندەمە جانە گرافيكالىق تۋىندىلارى قويىلدى.
ۆاديم بىكوۆ ءتۇرلى جانردا جۇمىس ىستەيدى. ماسەلەن, ونىڭ سالعان پورترەتتەرى مەن پەيزاجدارى دا قانىق بوياۋىمەن كوز تارتادى. ول كارتينالارىندا كوركەم قۇرالداردى ەركىن پايدالانادى. اسىرەسە, تابيعاتتى بەينەلەۋگە شەبەر. ونىڭ الەمدەگى قۇبىلىستاردى قابىلداۋى دا وزگەشە. قاس-قاعىم ساتتەگى ءومىر كورىنىسىن تامىرشىداي تاپ باسادى.
ول – قازاقستان سۋرەتشىلەر وداعىنىڭ مۇشەسى, كوپتەگەن وبلىستىق جانە رەسپۋبليكالىق كورمەلەرگە قاتىسقان. قوستاناي مەتسەناتتار كلۋبىنىڭ «قازىنا» سىيلىعىنىڭ لاۋرەاتى. ونىڭ شىعارمالارى «قازاقستاننىڭ بەينەلەۋ ونەرى» كىتابى مەن بەس تومدىق «قازاق ونەرى» جيناعى جانە ەكى تومدىق «قازاقستاننىڭ كەسكىندەمە ونەرى» باسىلىمىنا ەنگەن. ايتپاقشى, كورمە 25 مامىرعا دەيىن جالعاسادى.
