الماتىداعى ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىندە كورنەكتى عالىم, پۋبليتسيست, ۇستاز, فيلولوگيا عىلىمدارىنىڭ دوكتورى, پروفەسسور نامازالى وماشۇلىنىڭ 70 جاسقا تولۋىنا ارنالعان «ۇلتتىق جۋرناليستيكا: زەرتتەۋ جانە ءبىلىم بەرۋ ماسەلەلەرى» اتتى حالىقارالىق عىلىمي–تاجىريبەلىك ونلاين كونفەرەنتسيا ءوتتى.
مازمۇندى شارا بەلگىلى عالىمعا ارنالعان فوتو جانە كىتاپ كورمەسىنىڭ اشىلۋىمەن باستالدى. ودان كەيىن مەرەيتوي يەسى وقۋ ورداسىنا كەيىنگى شىققان كىتاپتارىن تابىس ەتىپ, ءال-فارابي اتىنداعى تەلەراديوكەشەنى جۇمىسىمەن تانىستى.
كونفەرەنتسيا بارىسىندا قازاقستان جازۋشىلار وداعى توراعاسىنىڭ ورىنباسارى, تانىمال اقىن, عالىم باۋىرجان جاقىپ پەن حالىقارالىق اقپاراتتىق تەحنولوگيالار ۋنيۆەرسيتەتى, مەدياكوممۋنيكاتسيا جəنە قازاقستان تاريحى كافەدراسىنىڭ پروفەسسورى ايازبي بەيسەنقۇلوۆ عيبراتتى عالىمنىڭ ءومىر جولى مەن شىعارماشىلىعى جايىندا بايىپتى بايانداما وقىدى. سونىمەن بىرگە تۇركياداعى ميمار سينان كوركەم ونەر ۋنيۆەرسيتەتىنىڭ پروفەسسورى Əبدىۋاقاپ قارا مەن «قازاق ەلى» جۋرنالىنىڭ رەداكتسيالىق كەڭەس توراعاسى جəنە جاۋاپتى شىعارۋشى رەداكتورى, ەرتولقىن گايرەيۋللاھ, اقش-تاعى كولۋمبيا ۋنيۆەرسيتەتىنىڭ پروفەسسورى گۇلنار كەندىرباي, قاراقالپاق مەملەكەتتىك ۋنيۆەرسيتەتى جۋرناليستيكا كافەدراسى پروفەسسورى, فيلولوگيا عىلىمدارى كانديداتى ماليكا جۇمامۇراتوۆا وماشۇلىنىڭ عىلىمي ەڭبەكتەرى تۋرالى بايانداما جاسادى. «ەگەمەن قازاقستان» گازەتىنىڭ الماتى فيليالىنىڭ مەڭگەرۋشىسى, جازۋشى جۇسىپبەك قورعاسبەك پەن «شالقار» راديوسىنىڭ ديرەكتورى, عالىم بولاتبەك تولەپبەرگەن دە قايراتكەر تۇلعانىڭ ادامي بولمىسى جايىندا سالماقتى ءسوز ءوربىتتى.
وزبەكستانداعى حالىقارالىق ەكونوميكا جəنە ديپلوماتيا ۋنيۆەرسيتەتى, حالىقارالىق جۋرناليستيكا فاكۋلتەتىنىڭ پروفەسسورى فاتيما مۋمينوۆا پروفەسسوردى مەرەيلى جەتپىس جاسىمەن قۇتتىقتاپ: «مەن ول كىسىمەن قازاق ۇلتتىق ۋنيۆەرسيتەتىندە جۋرناليستيكا بويىنشا دوكتورلىق ديسسەرتاتسيا قورعاۋ جونىندە ارنايى كەڭەستىڭ وتىرىستارىندا كەزدەسىپ ءجۇردىم. نامازالى وماشۇلى – تاماشا ازامات, بىلىكتى عالىم. ونى وزبەكستاننىڭ عالىمدارى دا جاقسى بىلەدى. وسىنداي كورنەكتى عالىم, ۇلاعاتتى ۇستازداردىڭ ارقاسىندا قازاقستانداعى عىلىم مەن ءبىلىم جوعارى دەڭگەيدە. ءبىز ۇنەمى ول كىسىمەن جاقىن بايلانىستامىز, بىرلەسىپ عىلىمي جيناقتار شىعارىپ, كونفەرەنتسيا وتكىزدىك. ول كىسىگە ۇزاق عۇمىر تىلەيمىن!» دەپ اقجارما لەبىزىن ءبىلدىردى.
سونداي-اق جيىن اياسىندا ۇلتتىق ۋنيۆەرسيتەتتىڭ «ونەگەلى ءومىر» سەرياسىمەن نامازالى وماشۇلىنىڭ تۇلعاسىنا ارنالعان كىتاپ جارىق كورىپ, كونفەرەنتسيا سوڭىندا ايتۋلى عالىم جۋرناليستيكا ماماندىعىنىڭ قىرى مەن سىرى جايىندا وي قوزعاپ, ءىس-شارانى وتكىزۋگە ۇيىتقى بولعان ازاماتتارعا العىسىن ايتتى.
