قر پرەمەر-ءمينيسترىنىڭ ورىن-باسارى ەرالى توعجانوۆتىڭ توراعالىعىمەن وتكەن ۆەدومستۆوارالىق كوميسسيا وتىرىسىندا نىسانداردىڭ قىزمەتىن جەڭىلدەتۋدىڭ ەكىنشى كەزەڭى ماقۇلداندى.
دەنساۋلىق ساقتاۋ مينيسترلىگى شەكتەۋ شارالارى ەل بويىنشا COVID-19 ينفەكتسياسىن 10 ەسەگە, جەدەل جاردەمدى شاقىرۋ سانىن 4,2 ەسەگە, اۋرۋحانادا جاتقانداردىڭ سانىن 80 پايىزعا تومەندەتۋگە مۇمكىندىك بەرگەنىن, ال ءموبيلدى بريگادالار سانى 7,6 ەسە ارتقانىن حابارلادى.
قول جەتكىزىلگەن وڭ اسەردى ەسكەرە وتىرىپ, ۆەدومستۆوارالىق كوميسسيا بيىل 31 تامىزدان باستاپ كەلەسى نىسانداردىڭ قىزمەتىن قايتا باستاۋ تۋرالى شەشىم قابىلدادى: ءدىني وبەكتىلەر (جەكە, ۇجىمدىق ءىس-شارالار وتكىزىلمەيدى); باسسەيندەر (جەكە فورماتتا, 1 كەلۋشىگە 5 ش. م. سۋ بەتى ەسەبىنەن, الدىن الا جازىلۋ ارقىلى); جاتتىعۋ زالدارى (1 كەلۋشىگە 5 ش. م. دەيىن, الدىن الا جازىلۋ ارقىلى); سپورت كەشەندەرى (1 كەلۋشىگە 5 ش. م. دەيىن جەكە جانە توپتىق جاتتىعۋلار ءۇشىن); مادەنيەت نىساندارى (1 كەلۋشىگە 5 شارشى مەترگە دەيىن, تولىمدىلىعى 50 پايىزدان اسپايدى, ونىڭ ىشىندە كەمىندە 2 مەتر الەۋمەتتىك قاشىقتىقتى ساقتاي وتىرىپ, 30 ادامعا دەيىن ۇجىمدىق دايىندىقتار, ۇزىلىستەردە بولمەلەردى جەلدەتۋ, بەتپەردە تاعۋ); ەرەكشە قورعالاتىن تابيعي اۋماقتار: مەملەكەتتىك ۇلتتىق تابيعي پاركتەر, قورىقتار, رەزەرۆاتتار جانە ت.ب. (جەكە جانە ۇيىمداسقان توپتار ءۇشىن 15 ادامنان اسپايتىن, الەۋمەتتىك اراقاشىقتىقتى ساقتاي وتىرىپ, كەمىندە 2 مەتر, بەتپەردە تاعۋ); قالا ماڭىنداعى جولاۋشىلار پويىزدارىنىڭ/ەلەكتر پويىزدارىنىڭ, قالاارالىق, وبلىسىشىلىك اۆتوبۋستاردىڭ/شاعىن اۆتوبۋستاردىڭ قوزعالىسىنا رۇقسات بەرىلەدى.
كەڭەس قورىتىندىسى بويىنشا پرەمەر-ءمينيستردىڭ ورىنباسارى بىرقاتار ناقتى تاپسىرما بەردى.
