ەلوردادا حالىقارالىق تۇرمە رەفورماسى PRI ۇيىمىنىڭ ورتالىق ازياداعى وكىلدىگىنىڭ ۇيىمداستىرۋىمەن «تۇرمە جۇيەسىن دامىتۋدىڭ جاھاندىق ترەندتەرى» تاقىرىبىندا ءباسپاسوز كونفەرەنتسياسى ءوتتى. بۇل شارا ەلباسى ۇسىنعان ۇلت جوسپارىنىڭ 33-قادامىن ىسكە اسىرۋ اياسىندا ۇيىمداستىرىلىپ وتىر.
جيىن بارىسىندا حالىقارالىق ۇيىم وكىلدىگىنىڭ ايماقتىق ديرەكتورى ازامات شامبيلوۆ جازاسىن وتەپ جاتقان ايەلدەردىڭ قۇقىعىن قورعايتىن «بانگكوك ەرەجەسى» مەن ەلىمىزدەگى بالالاردىڭ قۇقىعىن قورعايتىن ومبۋدسمەن قىزمەتى تۋرالى ايتتى. سونداي-اق, ول كامەلەتكە تولماعان جازاسىن وتەۋشىلەر جايلى ءسوز قوزعاپ, گرۋزيا تاجىريبەسىن مىسالعا كەلتىردى. جازاسىن وتەپ شىققان گرۋزيالىق جاسوسپىرىمدەردىڭ ءومىربايانىنان سوتتالعاندىعى جايىندا دەرەك وشىرىلەدى ەكەن. بۇل – تۋرا جولعا ءتۇسىپ, تۇزەلەم دەگەن جاستار ءۇشىن تاپتىرماس مۇمكىندىك ەكەنى انىق. ءبىر وكىنىشتىسى, ەلىمىزدە 70-كە جۋىق كامەلەتكە تولماعان بالا كولونيادا جازالارىن وتەپ جاتىر. وسى ماسەلەگە قىنجىلىس بىلدىرگەن ا.شامبيلوۆ اتالعان ماسەلەنى وزگەدەي جولدارمەن شەشىپ, بالالارعا باسقاشا جاعداي جاساۋ كەرەكتىگىن العا تارتتى.
ال ىشكى ىستەر مينيسترلىگىنە قاراستى قىلمىستىق-اتقارۋ جۇيەسى كوميتەتى توراعاسىنىڭ ورىنباسارى ازامات بازىلبەكوۆ جازاسىن وتەۋشىلەرگە كيگىزىلەتىن ەلەكتروندى بىلەزىكتىڭ قىر-سىرىن باياندادى. ونىڭ ايتۋىنشا, بۇل جۇمىس قازىر زاڭدىلىق تاراپىنان تالقىلانۋ ۇستىندە, 2018 جىلعا قاراي اياقتالىپ قالادى.
كەلەسى كەزەكتە ءسوز العان حالىقارالىق ساراپشى, مولدوۆا رەسپۋبليكاسى پروباتسيا قىزمەتىنىڭ باسشىسى ۆلاديمير پوپا ءوز ەلدەرىندەگى احۋالمەن ءبولىستى. قازىرگى كەزدە مولدوۆا رەسپۋبليكاسىندا 16-17 تۇرمە مەن 6-7 مىڭداي جازاسىن وتەۋشى بار ەكەن. جازاسىن وتەۋشىلەردىڭ سانى بويىنشا 45-ورىندا تۇرعان قازاقستان مەن مولدوۆانىڭ ەرەكشەلىكتەرىنە توقتالعان ول حالىقارالىق زاڭنامالار جايلى اقپارات بەردى.
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
