وسكەمەندە ءتورت قاباتتى تەننيس ورتالىعى پايدا بولادى. ەلىمىزدە ءدال مۇنداي تەننيس ورتالىعى بۇعان دەيىن سالىنباعان. ورتالىق نەگىزگى زالدان بولەك, جاتتىعۋ ورنى, قوناقتارعا ارنالعان جايلى دەمالىس ايماعى مەن دەنە شىنىقتىرۋ زالىنان تۇرادى.
الەمدىك ستاندارتقا ساي ءتورت قاباتتى تەننيس ورتالىعى كۇن ساناپ كوركەيىپ, جاڭارىپ, جاسارىپ كەلە جاتقان اۋداننىڭ دامۋىنا ۇلكەن ىقپالىن تيگىزەتىنى انىق. قازىرگى تاڭدا قۇرىلىسى قارقىندى تۇردە جۇرگىزىلۋدە.
«قازىر ىشىندەگى بولمەلەر مەن جابدىقتاردىڭ قالاي ورنالاساتىنىن ناقتىلاۋ كەرەك. بۇل وتە ماڭىزدى. سول ءۇشىن ءبىز جوبالىق جۇمىستارعا جاتتىقتىرۋشىلاردى تارتتىق. ولاردىڭ قاتارىندا دارىندى سپورتشىلاردىڭ بىرنەشە بۋىنىن تاربيەلەگەن سەرگەي ليتۆينوۆ بار» دەدى وبلىس اكىمى دانيال احمەتوۆ.
