جاقىندا ەلوردا اكىمدىگىندە تەحنيكالىق رەتتەۋ ماسەلەلەرى جونىندەگى وڭىرلىك شتابتىڭ كەزەكتى وتىرىسى ءوتتى.
جيىنعا استانا اكىمىنىڭ ورىنباسارى اندرەي لۋكين, قر يدم تەحنيكالىق رەتتەۋ جانە مەترولوگيا كوميتەتى توراعاسىنىڭ ورىنباسارلارى عالىمجان دۇعالوۆ جانە ەرجان قاراساەۆ, «قازاقستان ستاندارتتاۋ جانە سەرتيفيكاتتاۋ ينستيتۋتى» مەن «قازاقستان مەترولوگيا ينستيتۋتى» رمك, «ۇلتتىق اككرەديتتەۋ ورتالىعى» جشس باسشىلارى, استانا قالاسىنىڭ كاسىپكەرلەر پالاتاسى, قازاقستان مۇناي جانە گاز ينستيتۋتى, مۇناي جانە گاز اقپاراتتى-تالدامالىق ورتالىعى, قازاقستان جانارماي اسسوتسياتسياسى, قالاداعى جانارماي قۇيۋ ستانسالارى, مۇناي بازالارى, مۇناي جانە مۇناي ونىمدەرىن ساتۋ جانە وڭدەۋ سالاسىنداعى ءىرى كومپانيالار, سونىمەن قاتار, قالالىق بيزنەس-قاۋىمداستىقتىڭ وكىلدەرى قاتىستى.
الدىمەن ءسوز العان استانا قالاسى اكىمىنىڭ ورىنباسارى اندرەي لۋكين تەحنيكالىق رەتتەۋ سالاسىندا جاڭا ستاندارتتاردىڭ ەنگىزىلۋى – قازاقستاننىڭ نارىعىن ساپاسىز ونىمدەردەن قورعاۋعا, وتاندىق ءوندىرۋشىلەردىڭ باسەكەگە قابىلەتتىگىن ارتتىرۋعا ۇلكەن قولداۋ بولاتىنىنا ايرىقشا توقتالدى.
– ۇكىمەت بۇدان ەكى جىل بۇرىن تەحنيكالىق رەتتەۋ جانە مەترولوگيا جۇيەسىن جەتىلدىرۋ جونىندەگى 2020 جىلعا دەيىنگى كەشەندى جوسپار بەكىتكەن بولاتىن. وسى جوسپار رەسپۋبليكامىزداعى تەحنيكالىق رەتتەۋ ءجۇيەسىنىڭ قولدانىستاعى ءتاسىلىن تۇبەگەيلى جەتىلدىرەدى جانە وتاندىق وندىرۋشىلەر مەن سىرتقى ەكونوميكالىق قاتىناستا جۇمىس جاسايتىن كومپانيالاردىڭ الەمدىك نارىقتا باسەكەگە قابىلەتتىلىگىن ارتتىرۋعا سەپتەسەدى. ءبىز ءوز كەزەگىمىزدە تەحنيكالىق رەتتەۋ سالاسىندا مەملەكەتتىك-جەكە مەنشىك سەرىكتەستىكتى دامىتۋ بويىنشا مۇددەلى تاراپتاردىڭ ءوزارا ارەكەتىن قامتاماسىز ەتۋگە ءتيىسپىز. يندۋستريالاندىرۋ كارتاسىنا, «بيزنەستىڭ جول كارتاسى – 2020» باعدارلاماسىنا سايكەس ەلوردادا تەحنيكالىق رەتتەۋ سالاسىندا بىرىڭعاي تەحنيكالىق ساياسات قاجەت, – دەدى ا.لۋكين.
قالا اكىمىنىڭ ورىنباسارى ءوز بايانداماسىندا تەحنيكالىق رەتتەۋ سالاسىندا مەملەكەتتىك ۇيىمداردىڭ, ۇلتتىق كاسىپكەرلەر پالاتاسى وڭىرلىك كەڭەسىنىڭ, سالالىق بيزنەس-قاۋىمداستىقتاردىڭ, تۇتىنۋشىلاردىڭ قۇقىعىن قورعاۋ قوعامىنىڭ جانە باسقا دا قوعامدىق بىرلەستىكتەردىڭ ارەكەتتەرى جان-جاقتى ۇيلەستىرىلەتىنىن, «تەحنيكالىق رەتتەۋ تۋرالى» زاڭدى ىسكە اسىرۋدا مەملەكەتتىك جانە كورپوراتيۆتىك سەكتورلارعا جاردەم بەرۋ ماسەلەسىن ەگجەي-تەگجەي اڭگىمەلەپ بەردى.
ونىڭ ايتۋىنشا, تارتىپكە كەلتىرىلگەن جۇمىس وتاندىق نارىقتى قاۋىپتى جانە ساپاسىز ونىمنەن قورعاۋعا, الەمدىك ستاندارتتارعا سايكەس ءونىم شىعارۋعا قاجەتتى جاعدايلار جاساۋعا, مەنەدجمەنت جۇيەسىن ەنگىزۋگە, سونداي-اق, ىشكى نارىقتىڭ ينفراقۇرىلىمىن جاساپ, يندۋستريالاندىرۋ كارتاسى اياسىندا جوبالاردى ءساتتى ىسكە اسىرۋعا مۇمكىندىك بەرمەك.
جيىندا سالا ماماندارى تاسىمالداۋعا جانە قولدانۋعا دايىندالعان مۇنايعا قاۋىپسىزدىك تالاپتارىن ورناتاتىن ەەو تەحنيكالىق رەگلامەنتىن دە تالقىعا سالدى. بۇل جوبانىڭ نەگىزگى ماقساتى – ادام دەنساۋلىعى مەن قورشاعان ورتانى قورعاۋ. رەگلامەنتتە بارلىق ءتيىستى تالاپتار بار جانە ول 2017 جىلعى 1 ناۋرىزعا قاراي ەنگىزىلمەك.
بۇدان سوڭ تەحنيكالىق رەتتەۋ جانە مەترولوگيا كوميتەتى ءتوراعاسىنىڭ ورىنباسارى عالىمجان دۇعالوۆ وتكىزىلىپ جاتقان ءىس-شارانىڭ ماڭىزدىلىعىن اتاپ ءوتىپ, كۇن تارتىبىندەگى كەلەسى ماسەلەلەردى تىزبەكتەپ شىقتى.
– تاسىمالداۋعا جانە قولدانۋعا دايىندالعان مۇنايعا قاۋىپسىزدىك تالاپتارىن ورناتاتىن ەەو تەحنيكالىق رەگلامەنتى جوباسىن, جانارماي ساپاسىنا وتپەلى باقىلاۋ جۇيەسىن, سونىمەن قاتار «مۇناي ونىمدەرىن وندىرۋشىلەردىڭ وندىرىستىك وبەكتىلەرىنىڭ, مۇناي ونىمدەرى بازالارىنىڭ جانە جانارماي قۇيۋ ستانسالارى رەزەرۆۋارلارىن ەسەپكە الاتىن باقىلاۋ اسپاپتارىمەن جاراقتاندىرۋ بويىنشا قاعيدالار مەن تالاپتار» جوباسىن قاراستىرۋىمىز قاجەت, – دەدى عالىمجان تىلەكتەسۇلى.
شارا اياسىندا استانا قالاسىنىڭ وڭىرلىك شتاب مۇشەلەرى «قازمۇنايگاز ونىمدەرى» جشس مۇناي ونىمدەرىن ىرىكتەۋ جانە سىناۋ ءجونىندەگى اككرەديتتەلگەن سىناق زەرتحاناسىنا بارىپ, جانارمايدى وتپەلى باقىلاۋ جۇيەسىمەن جانە جاڭا سىناق جابدىقتارىمەن تانىستى.
م. شامۇراتوۆ, astana-akshamy.kz
