جاقىندا ۇلىتاۋ وبلىسىنىڭ اكىمى بەرىك ابدىعاليۇلى «كەڭەس زامانىنان قالعان اتاۋلاردان ارىلاتىن ۋاقىت جەتتى. سقو-عا – قىزىلجار, پاۆلودارعا – باياناۋىل, بقو-عا – اقجايىق, شقو–عا – التاي دەگەن تاريحي اتاۋلارىن قايتارۋىمىز كەرەك» دەگەن پىكىرىن ايتتى. سونىمەن قاتار, ول ءوزى دەپۋتات بولىپ جۇرگەن كەزدە پارلامەنتكە جەر-سۋ اتتارىن ورىسشا اتاماۋ جونىندە ۇسىنىس جاساپ, زاڭعا جەر اتتارىن ورىسشا جازۋعا تىيىم سالاتىن نورما ەنگىزىلگەنىن دە ەسكە سالىپ, «قازىرگى زاڭ بويىنشا جەر اتتارىن ورىسشا اتاۋعا تىيىم سالىنادى, اباي كوشەسىن ابايا دەپ اۋىستىرىپ جازۋعا بولمايدى» دەپ اتاپ كورسەتتى.
ساياساتكەردىڭ بۇل ورىندى ۇسىنىسى قازىر قوعامدا قىزۋ تالقىلانىپ جاتىر. اسىرەسە جىلدار بويى جىر بولعان جەر اتتارىن اۋىستىرۋ جونىندەگى ۇسىنىسقا قاراپايىم حالىق تا قۋانا قولداۋ كورسەتۋدە. ارينە, باتىس قازاقستان وبلىسى, شىعىس قازاقستان وبلىسى, سولتۇستىك قازاقستان وبلىسى دەگەن گەوگرافيالىق اتاۋلاردىڭ شۇبالاڭقى ەكەنى راس. بىراق سوعان قاراماستان بۇل اتاۋلار كۇنى بۇگىنگە دەيىن قولدانىستان قالماي كەلەدى. كەڭەس زامانى كەزىندە ورنىعىپ, ابدەن ءتىلىمىز ۇيرەنىپ كەتكەن بۇل اتاۋلاردىڭ اراسىنان تەك «وڭتۇستىك قازاقستان وبلىسىن» تۇركىستان دەپ وزگەرتتىك تە قالعانىن قالدىردىق. ياعني, سولتۇستىگى بار قازاقستاننىڭ وڭتۇستىگى جوق. دەمەك, جاعىراپيالىق اتاۋ تۇرعىسىنان العاندا, ءبىزدىڭ ءتورت باعىتىمىز تۇگەل ەمەس, ءبىر اياعى جوق بارىس سياقتى, اقساق. كەزىندە عابيت مۇسىرەپوۆ «وڭتۇس», «سولتۇس» دەپ جازعانىن دا ەسكەرۋ كەرەك. وسى تۇرعىدان العاندا, ىرگەلى وبلىستاردى جاعىراپيالىق ورنالاسۋ بويىنشا اتاماي, قىزىلجار, اق- جايىق, التاي دەسەك, قۇبا-قۇپ بولار ەدى. وسكەمەننىڭ «كەڭگىر تۇرا» دەگەن تاريحي اتاۋىن دا ەسكەرۋ كەرەك. بۇل جاڭا قازاقستانداعى جاڭا ءبىر يشارا, قادام بولار ەدى…
