وتكەن سەنبى-جەكسەنبى كۇندەرى ءداستۇرلى اۋىل شارۋاشىلىق ونىمدەرىنىڭ جارمەڭكەسىندە وڭتۇستىك قازاقستان جانە جامبىل وبلىستارى شارۋالارىنىڭ ءدامى ساۋدالاندى. بۇل وڭىرلەردىڭ جالپى قۇنى 85 ملن تەڭگەنىڭ 700 تونناعا جۋىق ازىق-تۇلىك تاۋارى ەلورداعا اكەلىنگەن.وڭتۇستىك قازاقستان وبلىسىن جارمەڭكەگە باستاپ كەلگەن وبلىستىق اۋىل شارۋاشىلىعى باسقارماسىنىڭ باسشىسى قاناتبەك وسپانبەكوۆتىڭ ايتۋىنشا, شىمكەنت وڭىرىنەن استاناعا نەگىزىنەن كوكونىس پەن جەمىس جەتكىزىلگەن. سونداي-اق, وڭتۇستىكتىكتەر استانالىق تۇتىنۋشىعا ءسۇت جانە باقشا ونىمدەرىن ۇسىندى.
جامبىل وبلىسىنىڭ 10 اۋدانى مەن تاراز قالاسىنان اكەلىنگەن تاۋارلاردىڭ دا نەگىزگى بولىگىن كوكونىس پەن جەمىس قۇرادى (150 توننا). جامبىلدىقتار «جەسە – تىسكە, جەمەسە – تۇسكە كىرەتىن» ەتتى دە اكەلۋدى ۇمىتپاپتى. كوكونىس-جەمىسپەن بىرگە 5 توننا بالىق, 4 تونناعا جاقىن ءسۇت ءونىمى باس قالامىزعا كەلدى. مۇنداي اقپاراتتى بىزگە جامبىل وبلىسى اكىمىنىڭ ورىنباسارى مۇراتباي جولداسباەۆ ايتتى.
ساۋداعا تۇسكەن ونىمدەردىڭ باعاسىن ايتار بولساق, ولار نارىقتاعى باعادان 10-15 پايىزعا تومەن ساتىلدى. ماسەلەن, كوكونىس باعاسى 35-70 تەڭگە شاماسىندا بولدى. اتاپ ايتار بولساق, قىرىققابات پەن پياز, بولگار بۇرىشى – 35 تەڭگەدەن, ءسابىز – 40 تەڭگەدەن, قىزاناق – 60 تەڭگەدەن, قىزىلشا مەن قيار 70 تەڭگەدەن ساۋدالاندى.
«قازاگروماركەتينگ» اق-نىڭ ەت باعاسىنا جۇرگىزگەن مونيتورينگىنە سەنسەك, استانالىقتار ەڭ ارزان ەتتى «شاپاعات» بازارىنان الا الادى. ونداعى قوي ەتىنىڭ باعاسى – 1050 تەڭگە بولسا, سيىر ەتى – 980 تەڭگەدەن, ال جىلقى ەتى – 1200 تەڭگەدەن ساۋدالانۋدا. جارمەڭكەدە قوي ەتى – 900 تەڭگەدەن, سيىر ەتى – 950 تەڭگەدەن, جىلقى ەتى 1150 تەڭگەدەن ساتىلدى. شولپان قىرقىمباي ەسىمدى تۇتىنۋشى: «مۇنداعى ەت باعاسى «شاپاعاتتىكىنەن» 30-50 تەڭگە عانا ارزان بولسا دا, ءبىر زەينەتاقىعا قاراعان بىزدەرگە بۇل اجەپتەۋىر كومەك» دەيدى.
ەستەرىڭىزگە سالىپ وتەيىك, اۋىل شارۋاشىلىق ونىمدەرىنىڭ جارمەڭكەسى 3 قاراشاعا دەيىن سوزىلادى. الداعى دەمالىستاردا, 28-29 قىركۇيەك كۇندەرى ەلوردالىقتارعا قاراعاندى وبلىسىنىڭ اۋىل ەڭبەككەرلەرى ءوز ونىمدەرىن ۇسىنادى.
امانعالي قالجانوۆ
