ەلورداداعى تاۋەلسىزدىك سارايىندا «ن.نازارباەۆتىڭ بەيبىتشىلىك يدەياسى» اتتى عىلىمي-تاجىريبەلىك كونفەرەنتسيا اياسىندا «جىبەك جولى ەكونوميكالىق بەلدەۋ – الۋان مادەنيەتتى ارداقتاپ, ءبىر وركەندەۋگە جول اشۋ» اتتى حالىقارالىق كورمە ءوتتى.
يگى شاراعا جيىرما بەس مەملەكەتتەن قىرىققا جۋىق سۋرەتشى قاتىسىپ, جەتپىستەن اسا ۇلتتىڭ وزىندىك ەرەكشەلىگىن بەينەلەيتىن تۋىندىلار قويىلعان. ءار شىعارمادان تەرەڭ تۇڭعيىققا تولى سىر ۇعىپ, ادام جانىنىڭ نازىك ءدىرىلىن تاپ باساتىن شەبەرلىكتى ايقىن اڭعارۋ بولادى.
– ءبىزدىڭ تاريحىمىزدا جىبەك جولىنىڭ الار ورنى ۇلكەن. ول تەك ساۋدا كوزى عانا ەمەس, ونەرگە دە ايرىقشا ءورىس بەرگەن. ال, بۇگىنگى شارا سول تاريحي جولدىڭ جاڭاشا جاڭعىرعانى دەپ ايتۋعا بولادى. وسى كورمە ناۋرىز ايىندا بەلگيادا وتكەن ەدى. اۋقىمدى شاراعا وتاندىق جەتى سۋرەتشى قاتىسىپ وتىر. ءوزىم «سۋاتتا» دەپ اتالاتىن تۋىندىمدى الىپ كەلدىم. Cونداي-اق, شەت مەملەكەتتەردەن كەلگەن قىلقالام شەبەرلەرىنىڭ بارلىعى دا ءوز دارىنىمەن مويىندالعان تۇلعالار. سوندىقتان كورمەگە كەلگەن كورەرمەننىڭ الار اسەرى مول بولاتىنى داۋسىز, – دەيدى بەلگىلى سۋرەتشى سەمبىعالي سماعۇلوۆ.
ازامات ەسەنجول
