شىنى كەرەك, قوعامدا دارىگەرلەرگە دەگەن ءارتۇرلى سىن-پىكىرلەر ايتىلىپ جاتادى. الايدا ەمدەلۋشىلەردىڭ اراسىندا اق جەلەڭدى ابزال جاندارعا العىسىن جاۋدىرىپ جاتاتىن دا ازاماتتار جەتەرلىك. سولاردىڭ ءبىرى – جۋىردا ۇلتتىق ونكولوگيا جانە ترانسپلانتولوگيا عىلىمي ورتالىعىندا وتا جاساتقان مەيرام مايلىباەۆ. زەينەتكەر اقمولا وبلىسى ەرەيمەنتاۋ اۋدانىنان اتالعان ورتالىققا پورتال ارقىلى تىركەلىپ كەلگەنىن ايتادى.
مەيرام مايلىباەۆ جۇرەگىنە وتا جاساعان ورتالىق ءدارىگەرلەرىنىڭ شەبەرلىگىنە ءدان ريزا. سەبەبى ول قارتايعان شاقتا «پىشاققا ءتۇسۋدىڭ» پسيحولوگيالىق تۇرعىدان وڭايعا سوقپاعانىن ايتىپ بەردى.
– اۋداننان استاناعا بەت العاندا «بۇل قالاي بولار ەكەن؟» دەپ الاڭداعان بولاتىنمىن. ويتكەنى جاسىم جەتپىسكە جەتكەندە جۇرەككە وتا جاساتۋ قىل كوپىردەن وتكەننەن بەتەر قيىن ەكەن. جۇرەك تۇرماق باسقا ورگانعا وتا جاساتساق تا الاڭدايتىنىمىز جاسىرىن ەمەس قوي. باقىتىما وراي, ورتالىقتىڭ كارديولوگيا بولىمشەسىنىڭ مەڭگەرۋشىسى تالعات مولدابەكوۆ باستاعان دارىگەرلەر جان-جاقتى كومەك كورسەتتى. اسىرەسە, وزىمە وتا جاساعان تالعات ەسقاراەۆ پەن داۋلەتبەك ماراتۇلىنا جانە دە ەمدەۋشى دارىگەر گۇلجاينا لەپەسوۆاعا العىسىم شەكسىز. ويتكەنى ءبىرىنشى اللا, ەكىنشىسى وسى دارىگەرلەردىڭ ارقاسىندا امان قالدىم دەپ ەسەپتەيمىن. سوندىقتان دا مەديتسينا قىزمەتكەرلەرىنىڭ ءتول مەرەكەسى قارساڭىندا اق جەلەڭدى ابزال جانداردى قۇتتىقتايمىن, – دەيدى زەينەتكەر.
سەرىك جولداسباي
