19-20 قازاندا استانادا CRE Central Asia 2017 اتتى جىلجىمايتىن مۇلىك ماسەلەسى بويىنشا فورۋم بولادى. شارا اكىمدىك قولداۋىمەن قالالىق ينۆەستيتسيا جانە دامۋ باسقارماسىنىڭ باستاماسىمەن وتكىزىلەدى.
CRE Central Asia 2017 – بيزنەس وكىلدەرى ءۇشىن ورتالىق ازياداعى كوممەرتسيالىق جانە جىلجىمايتىن مۇلىك ماسەلەلەرىن تالقىلاۋعا ارنالعان الاڭ. بۇدان بۇرىن ەلوردادا كوممەرتسيالىق جىلجىمايتىن مۇلىكتىڭ اپتالىعى وتكىزىلىپ تۇراتىن. ال قازان ايىندا ەۋروپا, ازيا, تمد مەملەكەتتەرىنەن نارىق مەحانيزمىن تۇسىنەتىن ماماندار ءبىر جەرگە جينالىپ, پىكىر الماسىپ, ورتاق جوبالاردى تالقىلايدى.
تاۋەلسىزدىك سارايىندا وتەتىن فورۋمعا بىشكەك, تاشكەنت, اشحاباد, دۋشانبە, قازان, ومبى وبلىسى, ۋفا, باكۋ, ەكاتەرينبۋرگ, ءنوۆوسىبىر, تبيليسي قالالارىنىڭ باسشىلارى قاتىسىپ, قازاقستان تاراپىنان الماتى قالاسىنىڭ اكىمى باۋىرجان بايبەك, شىمكەنت اكىمى عابيدوللا ءابدىراحيموۆ جانە استانا اكىمى اسەت يسەكەشەۆ قاتىسادى دەپ جوسپارلانۋدا. ولار قالالار ينفراقۇرىلىمىنىڭ دامۋى مەن ينۆەستيتسيالىق تارتىمدىلىعىن ءسوز ەتىپ, ءوزارا تاجىريبە الماسادى.
گۇلدانا تالعاتقىزى
