باس قالاداعى امفيتەاتردا «مەرەيلى وتباسى-2021» ۇلتتىق بايقاۋىنىڭ نۇر-سۇلتان قالاسىنداعى جەڭىمپازدارى ماراپاتتالدى. ەل تاۋەلسىزدىگىنىڭ 30 جىلدىق مەرەيتويىنا ورايلاستىرىلىپ وتكىزىلگەن بۇل بايقاۋدا 5 وتباسى ۇلگىلى دەپ تانىلدى.
جەڭىمپازدارعا ديپلومداردى قر پرەزيدەنتىنىڭ كەڭەسشىسى, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى مارجان اكىمجانوۆا مەن ەلوردا اكىمىنىڭ ورىنباسارى اسحات ورالوۆ تابىس ەتتى. اسحات ورالوۆ قالا اكىمىنىڭ اتىنان بايقاۋعا قاتىسقان بارلىق وتباسىلارعا العىس ءبىلدىردى.
– «وتان وتباسىنان باستالادى» دەگەندەي, بەرەكەلى وتباسى بولىپ, ۇلاعاتتى ۇرپاق تاربيەلەۋ – ءاربىر اتا-انانىڭ قاسيەتتى بورىشى. ءاربىر وتباسى بەرەكەلى, ۇلگىلى بولسا, قازاق ەلىنىڭ دە مارتەبەسى بيىك بولادى. 2013 جىلدان بەرى وتكىزىلىپ كەلە جاتقان «مەرەيلى وتباسى» بايقاۋى ادامگەرشىلىك رۋحتى جاڭعىرتۋ جانە وتباسىلىق جاراسىمدىلىق پەن باياندى نەكەنىڭ جاعىمدى بەينەسىن قالىپتاستىرۋدىڭ جارقىن ۇلگىسىن كورسەتۋدىڭ تاماشا ءتاسىلى رەتىندە ءدۇيىم جۇرتتىڭ قولداۋىنا يە بولىپ وتىر. بايقاۋعا قاتىسۋشىلار دا جىل سايىن مولايىپ كەلەدى. بيىل ەلوردا بويىنشا 120 وتباسى بايقاۋعا قاتىستى. ەل تاۋەلسىزدىگىنىڭ 30 جىلدىعىمەن تۇسپا-تۇس كەلگەن بيىلعى بايقاۋدىڭ ءمان-ماڭىزى ەرەكشە. سوندىقتان مەن بايقاۋدىڭ جەڭىمپازدارىن جۇلدەلى بولۋىمەن جانە ەل تاۋەلسىزدىگىنىڭ 30 جىلدىعىمەن قۇتتىقتايمىن, – دەدى اكىم ورىنباسارى.
«مەرەيلى وتباسى» ۇلتتىق كونكۋرسىن وتكىزۋگە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ 2013 جىلى وتباسىلىق قۇندىلىقتاردى دارىپتەۋ جانە وتباسى ينستيتۋتىنىڭ مارتەبەسىن ارتتىرۋ ماقساتىندا باستاماشىلىق جاساعان بولاتىن. قازىرگە دەيىن 7 مارتە وتكىزىلگەن بۇل بايقاۋ قاتىسۋشىلارىنىڭ سانى جىلدان-جىلعا ارتىپ كەلەدى. ماسەلەن, 2018 جىلى بايقاۋ كوميسسياسىنىڭ قاراۋىنا 51 ەلوردالىق وتباسى ءوتىنىم بەرسە, 2019 جىلى 60-تان استام ءوتىنىم تۇسكەن. بيىل «مەرەيلى وتباسى-2021» بايقاۋىنا قاتىسقىسى كەلگەن وتباسىلار سانى 120-عا جەتتى. ولاردىڭ قاتارىندا كوپبالالى وتباسىلار, ەڭبەك اۋلەتتەرى, كاسىپكەرلەر جانە ت. ب. بار.
بايقاۋدا توپ جارعان ۇزدىك وتباسىلار اقشالاي سىيلىقتارمەن جانە ەلوردا اكىمىنىڭ العىس حاتتارىمەن ماراپاتتالدى. كوميسسيا شەشىمىمەن كوپبالالى شىعارماشىلىق وتباسى سامارباەۆتار ۇلتتىق بايقاۋدىڭ قالالىق كەزەڭىنىڭ جەڭىمپازى اتانىپ, 500000 تەڭگەمەن ماراپاتتالدى. سۇڭعات پەن الما 4 بالا تاربيەلەپ وتىر. وتباسىنىڭ بارلىق مۇشەسى سپورتتى جاقسى كورەدى, سالاۋاتتى ءومىر سالتىن ۇستانادى. وتاعاسى – ينجەنەر مامانى, 4 ءتىلدى مەڭگەرگەن. زايىبى الما – جۋرناليستيكا سالاسىنداعى PhD دوكتورى, اعا وقىتۋشى, جاقىندا عانا وتباسىلىق قۇندىلىقتار تۋرالى «باقىتتى كەلىنشەك» كىتابى جارىق كورگەن. وتباسى كونكۋرستىڭ رەسپۋبليكالىق كەزەڭىنە قاتىسۋعا دايىندالۋدا.
ەكىنشى ورىن پەداگوگ نوسيەۆتەر اۋلەتى مەن ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ ماماندارى بەكەنوۆتەر وتباسىنا بۇيىردى. «مەرەيلى وتباسى-2021» كونكۋرسىنىڭ قولا جۇلدەسىن وماروۆتار وتباسى مەن التى بالا تاربيەلەپ وتىرعان, كاسىپكەرلەردەن قۇرالعان وشاقباەۆ وتباسى جەڭىپ الدى.
قالياكبار ۇسەمحانۇلى
