استاناداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە «ايبىن» اسكەري-پاتريوتتىق ويىنى مەن 11-سىنىپ وقۋشىلارىنا اسكەري تىركەۋ كۋالىكتەرىن تابىستاۋ ءراسىمى جىل سايىن ءداستۇرلى تۇردە ۇيىمداستىرىلادى.
مەكتەپتەگى العاشقى اسكەري دايىندىق ءپانىنىڭ مۇعالىمى, اۋعان سوعىسىنىڭ ارداگەرى نۇرالى اۋباكىروۆ ۇيىمداستىرعان «ايبىن» اسكەري-پاتريوتتىق ويىنىندا 11-سىنىپ وقۋشىلارى پنەۆماتيكالىق قارۋمەن نىسانانى كوزدەۋ, اۆتوماتتى جيناپ-قۇراستىرۋ, قورعانىس كوستيۋمىن جىلدام كيىپ-شەشۋ, ساپتا ءجۇرىپ ءان سالۋ, العاشقى دارىگەرلىك كومەك كورسەتۋ بويىنشا سايىسقا ءتۇستى. سايىسقا قازىلىق ەتكەن اۋعان سوعىسى ارداگەرلەر كەڭەسىنىڭ مۇشەسى قانات كارىموۆ پەن №1, №82, №84 ورتا مەكتەپتەرىنىڭ العاشقى اسكەري دايىندىق ءپانى مۇعالىمدەرى ەڭ مىقتى ءارى شاپشاڭ كوماندانى انىقتاپ, جەڭىمپازداردى كۋبوكپەن جانە ارنايى ديپلومدارمەن ماراپاتتادى.
ال «بۇگىنگى وقۋشى – ەرتەڭگى وتان قورعاۋشى» اتتى اسكەري تىركەۋ كۋالىكتەرىن تابىستاۋ سالتاناتىنا قر قارۋلى كۇشتەرى ارداگەرلەر وداعىنىڭ توراعاسى, پودپولكوۆنيك امانعالي ەرەكەشەۆ, اۋعان سوعىسىنىڭ ارداگەرلەرى ءسابيت اقباەۆ پەن داۋرەنبەك يسكاكوۆ, اقىن, ءانشى اسقار ساعناەۆ جانە مەكتەپ ۇستازدارى مەن وقۋشىلارى قاتىستى. كۋالىكتى تابىستاۋ ساتىندە ءسوز العان امانعالي ەرەكەشەۆ «وتان قورعاۋشىلار كۇنى مەن ۇلى جەڭىس كۇنى قۇتتى بولسىن! ەلىمىزدىڭ كەلەشەگى – جاستاردىڭ قولىندا. سوندىقتان قاشاندا رۋحى بيىك, وتانشىل ازامات بوپ وسىڭدەر. بولاشاقتارىڭ جارقىن بولسىن!» دەپ جاس جەتكىنشەكتەرگە اعالىق اق تىلەگىن ءبىلدىردى. شارا بارىسىندا وقۋشىلار ونەر كورسەتىپ, جينالعانداردى ءان مەن كۇيگە بولەدى.
