وتانىڭدى تانىپ ءبىل
ەلوردادا «رۋحاني جاڭعىرۋ» باعدارلاماسى اياسىندا استانالىق جاس ولكەتانۋشىلاردىڭ فورۋمى ءوتىپ, ۇزدىكتەرى ماراپاتتالدى.
الدىمەن «جالىن» پاتريوتتىق قوزعالىسىنىڭ ساياحاتشىلارى وزدەرى ءجۇرىپ وتكەن ەكسپەديتسيامەن تانىستىردى. ەكسپەديتسيانىڭ ماقساتى – ولكەتانۋ ءتۋريزمىن قالىپتاستىرۋ, وعان مۇمكىندىك بەرەتىن تابيعي, تاريحي جانە الەۋمەتتىك-ەكونوميكالىق نىسانداردىڭ جول كارتاسىن جاساۋ. وقۋشىلار رايىمبەك باتىر اتىنداعى «قازعارىش» مەكتەپ-ليتسەيىنىڭ گەوگرافيا ءپانىنىڭ مۇعالىمى, «ولكەتانۋ» جوباسىنىڭ جەتەكشىسى قابانباي جاقىپوۆپەن بىرگە تاريحى تەرەڭ جەرلەرگە ساياحاتتادى. ولاردىڭ ىشىندە اياققامىر مازارى, قاراشاش انا مازارى, يبراگيم اتا كەسەنەسى, سايرام, وتىرار, تۇركىستان, قازىعۇرت, ۇلىتاۋ, شارىن شاتقالى, ەرەيمەنتاۋ, ءۇستىرت سياقتى كيەلى جەرلەر بار.
№40 مەكتەپتىڭ 9-سىنىپ وقۋشىسى ارۋجان قويانباەۆا: «مەكتەپتىڭ ەكسپەديتسياسىمەن ەلىمىزدىڭ كورنەكتى جەرلەرىنە ساياحات جاسادىق. وسى ۋاقىتقا دەيىن جەزقازعان, باياناۋىل, تۇركىستان, سىرىمبەت ولكەسىنە باردىق. قازاقستاننىڭ كەڭ-بايتاق جەرىن كورىپ, بارعان سايىن ءارتۇرلى اسەر الاتىنىمىز انىق. بالالار بۇل جەرلەردى زەرتتەپ قانا قويماي, ونىڭ تاريحىن تەرەڭ ءتۇسىنىپ, كوپتەگەن قىزىقتى مالىمەتتەرمەن تانىستىق. بيىل دا «رۋحاني جاڭعىرۋ» باعدارلاماسى اياسىندا جولعا شىعۋعا ازىرلەنىپ وتىرمىز» دەپ ساياحاتتان كەيىنگى ءوز اسەرلەرىمەن ءبولىستى.
ءبىرىنشى كەزەڭ جەڭىمپازدارىنىڭ ءبىرى №13 ورتا مەكتەبى استانا قالاسىندا تۋريزمگە باعىتتالعان مەكتەپ بولىپ سانالادى. بالالار بيىكتىگى 4010 مەترلىك اباي شىڭىنا شىققانىمىز ەرەكشە ەستە جاتتالىپ قالدى دەيدى. سونداي-اق, قازاقتىڭ بىرنەشە حانى تاقتا وتىرعان ۇلىتاۋ وڭىرىندەگى حان ورداسىن ءوز كوزدەرىمەن كورىپ قايتتى.
بيىل ەلوردالىق مەكتەپ پەن كوللەدجدەرىندە ەكسپەديتسيالىق توپتار قۇرىلىپ, ەكى مىڭنان استام وقۋشى ساياحاتقا شىعادى دەپ كۇتىلۋدە.
فورۋم سوڭىندا جاس ساياحاتشىلارعا ماقتاۋ قاعازدارى مەن جۇلدەلى ورىن يەگەرلەرىنە سىيلىقتار تابىستالدى.
گۇلدانا تالعاتقىزى