وتباسى كۇنىنە ارنالعان شارالارعا 155 مىڭنان استام ەلوردالىق قاتىستى. اتالعان مەرەكە قازاقستاندا ءۇش جىلدان بەرى قىركۇيەكتىڭ ءاربىر ەكىنشى جەكسەنبىسىندە تويلانىپ كەلەدى. ەلوردا اكىمدىگىنىڭ مەرەكەلىك جوسپارىنا سايكەس, 30 استام شارا وتكىزىلدى, ونىڭ باسىم بولىگى «25 ىزگى ءىس» اكتسياسى اياسىندا حالىقتىڭ الەۋمەتتىك وسال توپتارىنا قايىرىمدىلىق كومەك كورسەتۋ ماقساتىندا وتكىزىلدى. سونىڭ ىشىندە تۇرمىسى تومەن جانە كوپ بالالى وتباسىلاردان شىققان بالالار ساياباقتارعا, سپەكتاكلدەر مەن كونتسەرتتەرگە باردى, مۇقتاج وتباسىلارعا ماتەريالدىق كومەك كورسەتىلدى.
سونىمەن قاتار, «استانا» بالالار دەرەۆنياسىندا وليمپيادا ويىندارىنىڭ چەمپيوندارى مەن جۇلدەگەرلەرىنىڭ قاتىسۋىمەن «تاتۋ جانە باقىتتى وتباسى!» سپورتتىق-زياتكەرلىك مەرەكەسى ۇيىمداستىرىلدى; «مامانداندىرىلعان بالا ءۇيى» مكك 45 الەۋەتتى بالا اسىراۋشىعا اشىق ەسىك كۇنى وتكىزىلدى. ەلوردالىق ءۇش پەريناتالدى ورتالىقتا جاڭا تۋعان سابيلەرگە ەستەلىك سىيلىقتار تابىستالدى. بۇل كۇنى 71 نارەستە دۇنيەگە كەلدى, سونىڭ ىشىندە 30 ۇل جانە 41 قىز.
«بالالار اربالارىنىڭ شوۋىنا» قاتىسۋشىلار دا كوپ بولدى, سونداي-اق, استانا قالاسىنىڭ مەملەكەتتىك اكادەميالىق فيلارمونياسى ارتىستەرىنىڭ وتباسىلىق جۇپتارىنىڭ قاتىسۋىمەن مەرەكەلىك كونتسەرت, وقۋشىلار اراسىندا «اكە, انا جانە مەن» سۋرەت بايقاۋى جانە ت.ب. ۇيىمداستىرىلدى.
