وتكەل جول جۇمىستى جەڭىلدەتەدى

ەلوردا اكىمى التاي كولگىنوۆ №2 قالالىق اۋرۋحاناعا بارىپ, مەكەمەنىڭ جۇمىسىمەن تانىستى.ءوز كەزەگىندە كلينيكانىڭ باس دارىگەرى يۆان لي قالا باسشىسىنا پاتسيەنتتەرگە قىزمەت كورسەتۋدىڭ 3H جۇيەسى تۋرالى تولىعىراق ءتۇسىندىرىپ بەردى. ونىڭ ايتۋىنشا, بۇل جۇيە ەمدەلۋشىلەردى ءۇش بولىككە بولەدى.
– قىزىل بولىكتە قارقىندى تەراپيانىڭ رەانيماتسيالىق پالاتالارى ۇيىمداستىرىلعان: مۇندا پاتسيەنتتى جاساندى تىنىس الۋ اپپاراتىنا بىردەن كوشىرۋگە جانە ت. ب. جاساۋعا بولادى. اۆتوبۋس ءىرى جول-كولىك وقيعاسىنا تۇسكەن كەزدە بارلىق 29 زارداپ شەگۋشى ءبىزدىڭ قىزىل بولىككە كەلىپ ءتۇستى. سارى بولىكتە پاتسيەنتتەردى قاراۋ كابينەتتەرى ۇيىمداستىرىلعان. پاتسيەنت سول جەردە اناليز تاپسىرىپ, مامانداردىڭ كەڭەسىن الا الادى. ال جاسىل بولىكتە ناۋقاستاردى تىركەۋدىڭ ەلەكتروندىق جۇيەسى ۇيىمداستىرىلعان. وپەراتور العاشقى دياگ­نوستيكانى جۇرگىزىپ, ناۋقاستى قاراۋ ءۇشىن مامانداردى شاقىرادى, – دەدى باس دارىگەر.
كەزدەسۋ بارىسىندا كلينيكانىڭ ەكى عيماراتى اراسىندا وتكەل جول سالۋ, كومپيۋتەرلىك توموگرافيانى ساتىپ الۋ مەن ماشينالارعا ارنالعان تۇراق ورىندارىنىڭ سانىن ارتتىرۋ قاجەتتىگى دە ايتىلدى.
وتكەل جولدا كەشەندى-دياگ­نوس­تيكالىق بولىمشەسى بار قابىلداۋ بولمەسى بولادى. بۇل دارىگەرلەردىڭ جۇمىسىن جەڭىلدەتەدى جانە پاتسيەنتتەر ءۇشىن قولايلى جاعداي جاسايدى. قالا اكىمى التاي كولگىنوۆ وسى ماسەلەگە قاتىستى جوبالىق-سمەتالىق قۇجاتتامانى ازىرلەۋدى تاپسىردى.