ۇلىستىڭ ۇلى كۇنى قارساڭىندا, 15 ناۋرىزدا قازاقستانداعى وزبەكستاننىڭ جىلى سالتاناتتى تۇردە اشىلدى. ال 2019 جىل وزبەكستانداعى قازاقستان جىلى بولىپ بەكىتىلدى.
بۇل وقيعالار – باۋىرلاس ەكى حالىقتىڭ دوستىعى مەن ىنتىماقتاستىعىنىڭ جوعارى دەڭگەيگە كوتەرىلگەنىنىڭ ايقىن كورىنىسى. اتاپ ايتارلىعى, بيىل استانادا تۇركى حالىقتارىنا ورتاق ويشىل, مەملەكەت قايراتكەرى الىشەر ناۋايگە ەڭسەلى ەسكەرتكىش ورناتىلادى. ال وزبەك حالقى قازاقتىڭ باس اقىنى اباي قۇنانبايۇلىن ۇلىقتايدى.
وزبەك عالىمدارى اباي اتامىزدىڭ ۇلى مۇراسىن زەرتتەپ, وزبەك حالقى ابايدىڭ دانالىعىمەن ءوز رۋحانياتىن بايىتادى. جۋىردا وزبەكستان پرەزيدەنتى شاۆكات ميرزيەەۆ اباي قۇنانبايۇلىنىڭ شىعارماشىلىق مۇراسىن ناسيحاتتاۋ تۋرالى قاۋلىعا قول قويدى. «ۇلى اقىن, ويشىل اباي قۇنانبايۇلىنىڭ ەسىمى ءھام ونىڭ شىعارماشىلىق باي مۇراسى – گۋمانيزم مەن ىزگىلىكتىڭ ەڭ جوعارعى يدەالى. ول تەك قازاق حالقىنا عانا ەمەس, بۇكىل تۇركى جۇرتىنا, سونىڭ ىشىندە ءبىزدىڭ وزبەك حالقى ءۇشىن دە وشپەس ءىز, باي رۋحاني مۇرا قالدىردى. اباي قۇنانبايۇلىنىڭ بار ءومىرى مەن شىعارماشىلىعى وتانعا قالتقىسىز ادال قىزمەت ەتۋدىڭ, ونىڭ ۇلتتىق قۇندىلىقتارىن ءسۇيۋدىڭ جارقىن ۇلگىسى» دەلىنگەن قۇجاتتا.
بۇل قادام وزبەك جاستارىنىڭ قازاق ادەبيەتىمەن, سونىڭ ىشىندە اباي اتامىزدىڭ شىعارمالارىمەن سۋسىنداۋىنا جول اشادى. ويتكەنى جىل سايىن وزبەك ستۋدەنتتەرى اراسىندا «اباي شىعارمالارىنىڭ بىلگىرى» دەگەن بايقاۋ وتەتىن بولدى. بۇعان قوسا, ابايدىڭ تاڭدامالى شىعارمالار جيناعى, «وزبەك-قازاق ادەبي بايلانىستارى» اتتى ادەبي-ساراپتاما ماقالالار جيناعى شىعارىلادى. جىل سايىن 10 تامىزدا تاشكەنتتەگى اباي ەسكەرتكىشى الدىندا سالتاناتتى شارا وتكىزۋ, نيزامي اتىنداعى مەملەكەتتىك ۋنيۆەرسيتەتتە تۇراقتى كورمە ۇيىمداستىرۋ, اقىننىڭ ءومىرى مەن شىعارماشىلىعىن قوعامدا, باق-تاردا كەڭىنەن ناسيحاتتاۋ جوسپارلانعان. شاۆكات ميرزيەەۆتىڭ بۇل پاراساتتى قادامى ەكى حالىقتىڭ رۋحاني جاقىنداسۋىن ودان ءارى نىعايتا تۇسەرى ءسوزسىز.
تولەن تىلەۋباي
