«قازاقستاندا جاسالعان». بۇل – تاۋاردىڭ جاپسىرما قاعازىندا جازىلعان تاڭبا. بىرەۋ بىلمەس, بىرەۋ سەنبەس. بىراق, وتاندىق ءونىمنىڭ ءوڭى كىرىپ, ءورىسى كەڭەيە تۇسكەن كەز كەلىپ جەتتى. ماسەلەن, جاقىندا عانا «اstana Mall» ساۋدا ورتالىعىندا «قازاقستاندا جاسالعان» كورمە-جارمەڭكەسi ءوتتى. قر تۇڭعىش پرەزيدەنتi كۇنiنە ورايلاستىرعان شارادا 50-گە جۋىق كاسىپورىن ونىمدەرىن ۇسىندى. جارمەڭكەگە كەلگەندەر ۇيگە قاجەتتى بۇيىمداردان باستاپ, جۇمىسقا كيەتىن كوستيۋم-شالبارعا دەيىن وتاندىق تاۋارلاردى ساتىپ الدى. ۇيىمداستىرۋشى – «NADLoC» جەرگiلiكتi قامتۋدى دامىتۋدىڭ ۇلتتىق اگەنتتiگi.
بۇل قارقىننىڭ قاشان جانە قالاي قارىشتاعانىن ەسكە تۇسىرەيىك.
وسى جىلدىڭ اقپان ايىندا ۇكىمەتتىڭ كەڭەيتىلگەن وتىرىسىندا ەلباسى «قازاقستاندا جاسالعان» اكتسياسىن ۇيىمداستىرۋدى ۇسىنعان ەدى. حالىق ءۇشىن كۇردەلى كەزەڭدە ءبىر-ءبىرىمىزدى دەمەپ, وتاندىق ءونىمدى ساتىپ الۋعا شاقىرعان بولاتىن. ءىرى دۇكەن جەلىلەرى بۇل اكتسيانى قولداپ, ساۋدا سورەلەرىنە وتاندىق ءونىمدى ايشىقتايتىن ءتۇرلى-ءتۇستى تاقتايشالار جاسادى. تۇتىنۋشىلار دا وتاندىق ءونىمدى ساتىپ الىپ, ءار قىرىنان ساراپتاۋعا دا ايانبادى. وسى جىل ونىمدەرىمىزدىڭ تانىمالدىعى مەن تارالىمى ارتقان جىل دەپ ايتۋعا ابدەن بولادى. نۇرسۇلتان نازارباەۆتىڭ «قازاقستاندىق كاسىپكەرلىك ۇلتتىق ەكونوميكانى العا سۇيرەيتىن نەگىزگى كۇشكە اينالۋى ءتيىس» دەگەن ءسوزى ەلىمىزدەگى كاسىپكەرلىكتىڭ دامۋىنا ارقاۋ بولىپ كەلەدى.
پرەزيدەنتىمىز ءوزىنىڭ ويىن تەك سوزىمەن ەمەس, ىسىمەن دە دالەلدەي بىلەدى. سوندىقتان بولار, وتاندىق كوستيۋم مەن اياق كيىم كيەدى. اتىراۋدا وتكەن وبلىس اكىمدەرىنىڭ كەزدەسۋىندە ن.نازارباەۆ ءوزىن مىسالعا كەلتىرىپ, «ءبىزدىڭ جەڭىل ونەركاسىپتى جارنامالاۋشىمىن» دەگەن ەدى. «ۇستىمدەگى كوستيۋم قازاقستاندا شىعارىلعان» دەپ, پرەزيدەنت پيدجاگىنىڭ استارىنداعى جاپسىرما قاعازدى كورسەتتى. «ءتۋفليىم دە قازاقستاندىق» دەپ ءسوزىن جالعادى. ەلباسى جيىندا ينۆەستيتسيالار جانە دامۋ ءمينيسترى اسەت يسەكەشەۆتى كورسەتىپ, ونىڭ دا كوستيۋمى وزىمىزدىكى ەكەندىگىن ايتتى.
ال قازان ايىنىڭ سوڭىندا مەملەكەت باسشىسى «قازجەڭىلونەركاسىپ – الماتى» كاسىپورنىندا بولدى. ءدال وسى مەكەمەدە نۇرسۇلتان نازارباەۆقا ارنالعان كيىمدەر تىگىلدى. جوعارى ساپالى ماتالاردان كلاسسيكالىق كوستيۋم مەن شالبار, 42-ولشەمدەگى اياق كيىم قولدان جاسالدى. ءبىرىنشىسى – «وكسفورد» ستيلىندە, ياعني باتىڭكەلەردىڭ باۋى بايلانادى, ەكىنشى ۇلگى – «لوفەر», باۋسىز اياق كيىم. كاسىپورىن باسشىسى ايبەك بەكتۇرعانوۆتىڭ ايتۋىنشا, ەلباسىنا ارنالعان «Made in Kazakhstan» توپتاماسىن ۇسىنۋ ءۇشىن بىرنەشە كۇن كەتتى. ونەركاسىپ قىزمەت ەتىپ كەلە جاتقان 2 جىلدىڭ ىشىندە 55 ميلليون جۇپ اياق كيىم ەكسپورتقا شىعارىلعان.
– بارشا قازاقستاندىقتارعا ءوزىمىزدىڭ وتاندىق تاۋارلاردى, سونىڭ ىشىندە «مade in Kazakhstan» بەلگىسى بار اياق كيىمدەر مەن كوستيۋمدەردى ساتىپ الۋ قاجەتتىگىن ايتقىم كەلەدى. ەگەر جەڭىل ونەركاسىپ ىلگەرى باساتىن بولسا, سالا كاسىپورىندارىندا جۇمىس ىستەيتىندەر ەڭبەكاقى الىپ, مەملەكەتكە سالىق تولەيدى. بۇل بارىنە ءتيىمدى – بيۋدجەتكە ءتۇسىم تۇسەدى, ەلدە ءوزىمىزدىڭ وندىرگەن تاۋارلارىمىز پايدا بولادى. بۇل ورايدا ءونىم ساپاسىن ۇدايى جەتىلدىرىپ وتىرعان ءجون, – دەدى ەلباسى كەزدەسۋ بارىسىندا.
ءوز ىسىمەن اينالىسام دەگەن ادامعا ەكى قولعا ءبىر كۇرەك تە, قارجىلاندىرۋ كوزى دە تابىلادى. ماسەلەن, «مەنىڭ ەلباسىم» دەپ اتالاتىن ەرلەر توپتاماسىنىڭ اۆتورى ايجاني نۇرلانوۆانىڭ ءىسى بۇگىندە العا باسۋدا. 2014 جىلدىڭ «ەڭ ۇزدىك ايەل كاسىپكەرى» اتانعان ديزاينەر – «التىن ادام» فابريكاسىنىڭ استانا قالالىق فيليالىنىڭ ديرەكتورى. فابريكا 2013 جىلدان باستاپ جۇمىس ىستەپ كەلەدى. ماتا مەن سىزبا ۇلگى تۇركيا مەن يتاليادان اكەلىنەدى, ال ونى ءوزىمىزدىڭ وتاندىق ماماندار تىگەدى. بۇل باستامانى ەلباسى قولداپ, ودان ءارى وڭتۇستىك قازاقستان وبلىسىنىڭ اكىمى بەيبىت اتامقۇلوۆ تا كوستيۋم-شالبار ساتىپ الدى. فابريكا مينۋتىنا 1, كۇنىنە 400 دانا كوستيۋم دايىندايدى. باستاپقىدا قۇنى 25 مىڭ تەڭگە ەدى, دوللار باعامىنىڭ كوتەرىلۋىنە بايلانىستى قازىردە ونى 45 مىڭ تەڭگەگە ساتىپ الۋعا بولادى.
ەلباسى بۇۇ-داعى جيىنعا, سوچيدەگى پرەزيدەنتتەردىڭ كەزدەسۋىنە قۇنى 45 مىڭدىق وسى كوستيۋم-شالباردى كيدى. ونىڭ بۇل ءىسى وتاندىق تاۋاردى قولداعىسى كەلەتىن بارشا قازاقستاندىقتارعا ۇلگى بولۋى ءتيىس.
گۇلدانا تالعاتقىزى
