قالالىق ەمحانالاردىڭ بىرىندە مەديتسينا سالاسىنىڭ قىزمەتكەرلەرىمەن كەزدەستىك. مەديتسينا سالاسىنداعى وزگەرىستەردەن بولەك پارلامەنت مارتەبەسىنىڭ ارتۋى بويىنشا قىزىقتى تالقىلاۋ بولدى.
ارينە, حالىق اراسىندا دەپۋتاتتاردىڭ قۇزىرەتى شەكسىز, ايتقانى زاڭ, كوتەرىلگەن ماسەلەلەرى ورىندالۋعا مىندەتتى بولىپ كورىنەتىندەي پىكىر قالىپتاسقانى بار. دەگەنمەن, حالىق قالاۋلىلارىنىڭ بيۋدجەتتى بەكىتۋدەگى, كەيبىر زاڭ نورمالارى ءۇشىن كۇرەسى مەن ەلدىڭ ماسەلەلەرىن شەشۋ ءۇشىن اكىمدىكتەر جانە مينيسترلىكتەرمەن ارپالىسىپ جۇرەتىنىن ءبىرى بىلسە, كەيبىرەۋى بىلە قويماس. وسى رەتتە, اتا زاڭىمىزعا ەنگىزىلەتىن وزگەرىستەر پارلامەنتتىڭ ءرولىن كۇشەيتىپ, مارتەبەسىن ارتتىرۋعا باعىتتالعان. مىسالى, ءماجىلىستىڭ قۇزىرەتى كەڭەيىپ, رەسپۋبليكالىق بيۋدجەتتىڭ اتقارىلۋ ساپاسىنا پارلامەنتتىك باقىلاۋ كۇشەيەدى. ول ءۇشىن, بۇعان دەيىن ايتقانىمىزداي, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى جوعارى اۋديتورلىق پالاتا بولىپ قايتا قۇرىلادى. ونىڭ توراعاسى جىلىنا ەكى رەت ءماجىلىس دەپۋتاتتارىنىڭ الدىندا ەسەپ بەرەدى. ساياسي جۇيەدە تەپە-تەڭدىك جانە تەجەمەلىك تەتىكتەردى نىعايتۋ جانە زاڭ شىعارۋ جۇمىسىن وڭتايلاندىرۋ ماقساتىندا ماجىلىسكە زاڭداردى قابىلداۋ, ال سەناتقا زاڭداردى تەك ماقۇلداۋ نە ماقۇلداماۋ قۇزىرەتى بەرىلەدى. ءماجىلىس كەلىسپەگەن تۇستا, زاڭدى قول قويۋعا تىكەلەي پرەزيدەنتكە جىبەرەتىن بولادى. پارلامەنت كونستيتۋتسيالىق زاڭداردى پالاتالاردىڭ بىرلەسكەن وتىرىسىندا, كەمىندە ەكى وقىلىمدا قابىلدايتىن بولادى. ايرىقشا قاجەتتىلىك تۋىنداسا, زاڭداردى جەدەل قابىلداۋ ءتارتىبى ەنگىزىلەدى. بۇل تەك اسا قاجەتتىلىك, قاۋىپ-قاتەردى ەڭسەرۋ ءۇشىن شۇعىل ءىس-قيمىل ماقساتىندا قولدانىلادى.
ەلنۇر بەيسەنباەۆ
