ەكسپو قالاشىعىندا كۇنارا تويلاناتىن ءار مەملەكەتتىڭ ۇلتتىق كۇنىن ۇلىقتاۋ جالعاسۋدا. كەشە پاكىستان يسلام رەسپۋبليكاسى ءوزىنىڭ تاۋەلسىزدىك العانىنا 70 جىل تولۋىنا وراي مەرەكەلىك باعدارلاما ازىرلەدى.
سالتاناتتى شاراعا قاتىسقان پاكىستان رەسپۋبليكاسىنىڭ قازاقستانداعى ەلشىسى ابدۋل ساليك حان مەملەكەتتىڭ تاريحىنا توقتالدى.
– 2017 جىلدىڭ ءبىز ءۇشىن ايرىقشا ءمانى بار, ويتكەنى بۇگىن پاكىستاننىڭ ەل بولىپ قۇرىلعانىنا 70 جىل تولىپ وتىر. مەملەكەتتىڭ نەگىزىن قالاۋشى كۋەيد-ي-ازام مۋحامماد الي دجيننانىڭ باسشىلىعىمەن جەتپىس جىل بۇرىن وڭتۇستىك-ازيالىق سۋبكونتينەنتتەگى مۇسىلماندار وزدەرىنىڭ سالتىنا, مادەنيەتى مەن قۇندىلىقتارىنا سايكەس ءومىر سۇرە الاتىنداي ازات ەل اتاندى. تاۋەلسىزدىكتى قورعاۋ – تاۋەلسىزدىككە جەتۋدەن دە قيىن. وسى تاۋەلسىزدىكتى قورعاۋ ءۇشىن جانىن قۇربان ەتكەندەر ءبىزدىڭ جادىمىزدا ساقتالادى. ازاتتىق العاننان كەيىن كۋەيد پاكىستاننىڭ سىرتقى ساياساتىنىڭ نەگىزگى قاعيدالارىن بەلگىلەپ كەتتى. ول ءوز سوزىندە جاڭا مەملەكەت بۇكىل الەم ەلدەرىمەن تاتۋ ءومىر سۇرۋگە نيەتتى ەكەندىگىن, سونداي-اق, باسقىنشىلىققا تالپىنبايتىنىن اتاپ وتكەن. سول ۋاقىتتان بەرى پاكىستان ۇلت اكەسىنىڭ ساياساتىن رۋحاني جاعىنان دا, ءىس جۇزىندە دە جالعاستىرۋدا, – دەدى ەلشى.
بۇگىندە پاكىستان – 200 ميلليونعا جۋىق حالقى بار دەموكراتيالىق رەسپۋبليكا. ەلدە ەرەكشە قۇلشىنىسپەن جۇمىس ىستەيتىن پارلامەنت, تاۋەلسىز سوت جۇيەسى جانە ەركىن باق-پەن قاتار بەلسەندى ازاماتتىق قوعام بار. ال ءجىو ءوسىمى سوڭعى جىلداردا ءۇش پايىزدان بەس پايىزعا دەيىن كوتەرىلدى.
ال «جاسىل» ەنەرگەتيكا سالاسىنا كەلەتىن بولساق, پاكىستان – جاھاندىق باستامانىڭ شەڭبەرىندە ۋاقىتىلى جۇزەگە اسقان جوعارى ساپالى كۇن كارتالارىنان پايدا كورە بىلگەن ەلدەردىڭ ءبىرى. مەملەكەتتىڭ بالامالى ەنەرگيانى وندىرە الاتىنداي ۇلكەن الەۋەتى بار. اتاپ ايتقاندا, پاكىستان شامامەن 2,9 ملن مۆت كۇن ەنەرگياسىن جانە 340 مىڭ مۆت جەل ەنەرگياسىن, سونداي-اق 100 مىڭ مۆت گيدروەلەكتروەنەرگيانى وندىرە الادى. وسىنىڭ ءبارى پاكىستان پاۆيلونىندا ايشىقتى تۇردە كورسەتىلگەن.
كەش سوڭىندا پاكىستاندىقتاردىڭ مادەني ءومىرىنىڭ كوركەمدىگى مەن بايلىعىن ميحرام جانە ونىڭ توبى پاش ەتتى.
گۇلدانا
تالعاتقىزى
