كۇن سۋىتقالى استاناداعى بەلگىلى تۇراعى جوق ادامدارعا ارنالعان الەۋمەتتىك بەيىمدەۋ ورتالىعىنا كەلۋشىلەردىڭ سانى ارتتى. بۇگىندە مۇندا 126 ادام تىركەلگەن.
«توعىزىن اۋرۋحانالارعا جىبەردىك, ال قالعان 116-سىن تاماقتاندىرىپ وتىرمىز. ءبارىنىڭ دە ءۇي-كۇيى جوق» دەيدى بەلگىلى تۇراعى جوق ادامدارعا ارنالعان الەۋمەتتىك بەيىمدەۋ ورتالىعى ديرەكتورىنىڭ الەۋمەتتىك ماسەلەلەر جونىندەگى ورىنباسارى دينارا شاپينا.
«سىرقاتتاردى اۋرۋحاناعا جاتقىزامىز. بىزدە ءتۇرلى ادامدار كەلەدى. قۇجاتسىز بولسا ءبىر جىل, باسقا جاقتان كەلسە ءبىر اي بويى بىزدە قالادى» دەيدى دينارا شاپينا.
ونىڭ ايتۋىنشا, بەلگىلى تۇراعى جوق ادامداردىڭ كەيبىرى مەكەمەگە وزدەرى كەلسە, قالعانىن قۇقىق قورعاۋ ورگاندارىنىڭ نەمەسە جەدەل مەديتسينالىق كومەك قىزمەتىنىڭ قىزمەتكەرلەرى الىپ كەلەدى.
ايتا كەتەيىك, بۇل مەكەمە 2001 جىلدان بەرى پاناسىز, كاسىبى جانە تىرشىلىك ەتۋ قارجىسى جوق تۇلعالارعا الەۋمەتتىك, مەديتسينالىق جانە باسقا دا كومەكتەر كورسەتۋ, سونىمەن قاتار, استانا قالاسىندا كريمينوگەندىك جاعدايدى قىسقارتۋ جانە سانيتارلىق-ەپيدەميولوگيالىق, قوعامدىق ءتارتىپتى قامتاماسىز ەتۋ ماقساتىندا قىزمەت ەتەدى.
وتكەن جىلى اتالمىش مەكەمەگە 1275 ادام كەلىپ تۇسكەن. ونىڭ 300-ىندە عانا جەكە قۇجاتى بولسا, قالعان 984-ىندە جەكە باسىن راستايتىن قۇجاتى بولماي شىققان. ورتالىق سولاردىڭ 134-ءىنىڭ قۇجاتىن قالپىنا كەلتىرىپ, 10 ادامنىڭ «قىزىل پاسپورتى» جەكە كۋالىككە اۋىستىرىلعان. ال, 92 ازامات ورتالىقتىڭ كۇشىمەن جۇمىسقا ورنالاستىرىلعان.
قاڭعىباستار قامىتىن كيگەندەردىڭ جەتەۋى قارتتار مەن مۇگەدەكتەرگە ارنالعان الەۋمەتتىك مەديتسينالىق مەكەمەگە ورنالاسىپ, تۇراقتى جايىن تاپتى. 55 ادام دەنساۋلىعىنا بايلانىستى مۇگەدەكتىككە راسىمدەلىپتى. ال 63 ازاماتقا جاسىنا بايلانىستى زەينەتاقى مەن مۇگەدەكتىگىنە قاتىستى الەۋمەتتىك تولەمدەر الۋىن قامتاماسىز ەتكەن. وسى كەزەڭدە رەسپۋبليكانىڭ وزگە ايماقتارىنان كەلگەن 310 ادام كەلگەن جەرلەرىنە قايتارىلعان. اعايىندارىنان قول ۇزگەن ءجۇز ادامنىڭ جاقىندارىمەن بايلانىسىپ, تۋىستارىنىڭ الىپ كەتۋىنە قول ۇشىن بەرىپتى. ەشقانداي تۋىسى تابىلماعان 60 ازامات وزدەرى تىركەلگەن باسقا وبلىستارداعى بالامالى الەۋمەتتىك ورىندارعا جەتكىزىلگەن.
– كۇن سايىن ديسپەتچەرىمىز بارلىق تىرەك پۋنكتتەرىمەن, پيك, قالا ۆوكزالدارىمەن بايلانىسادى. ەگەر بەلگىلى تۇراعى جوق ادامدار انىقتالسا, ولاردى مەكەمەمىزگە الدىرتۋعا تىرىسامىز. قالا بويىنشا 9:00-دەن 22:00-گە دەيىن جۇمىس ىستەيتىن ءموبيلدى الەۋمەتتىك جاساعىمىز ءبىزدىڭ قاراۋىمىزداعى ساناتقا كىرەتىن ادامداردى جىلدام جەتكىزە الادى. مۇندا ولارعا مەديتسينالىق كومەك كورسەتىلىپ, الەۋمەتتىك احۋالىنا تالداۋ جاساپ, كورسەتىلەتىن قىزمەتتى بەلگىلەيمىز, – دەيدى استانالىق بەلگىلى تۇراعى جوق ادامدارعا ارنالعان الەۋمەتتىك بەيىمدەلۋ ورتالىعى ديرەكتورىنىڭ الەۋمەتتىك ماسەلەلەر جونىندەگى ورىنباسارى دينارا شاپينا.
وسىلايشا, قۇردىمعا كەتكەندەردى قۇتقارۋ ءۇشىن ورتالىق قولدان كەلگەن بار مۇمكىندىكتەردى قاراستىرىپ وتىر.
ءمادينا جاقىپ
