پاريج قالاسىنداعى اقىندار الاڭىندا قازاقتىڭ باس اقىنى, اعارتۋشى, ويشىل اباي قۇنانبايۇلىنىڭ ءبيۋستى اشىلدى. بۇل جونىندە اشىلۋ سالتاناتىنا قاتىسقان نۇر-سۇلتان قالاسىنىڭ اكىمى التاي كولگىنوۆ ءمالىم ەتتى.
«بيۋست ءپاريجدىڭ ورتالىعىنداعى اقىندار الاڭىندا فرانتسۋز جازۋشىسى ۆيكتور گيۋگو, ورىس جازۋشىسى الەكساندر پۋشكين جانە باسقا دا الەمدىك ادەبيەتتىڭ كورنەكتى وكىلدەرىنە قۇرمەت كورسەتىلگەن. اباي قۇنانبايۇلىنىڭ ءمۇسىنى تاۋەلسىزدىگىمىزدىڭ 30 جىلدىعى قارساڭىندا اشىلدى. ۇيىمداستىرۋشىسى – قر فرانتسياداعى ەلشىلىگى, بيۋست دەمەۋشىلىك قاراجات ەسەبىنەن اشىلدى.
مەملەكەت باسشىسىنىڭ تاپسىرماسى بويىنشا قالامىزدىڭ ەكونوميكاسىنا جەكە ينۆەستيتسيالار تارتۋ بويىنشا جۇمىس جۇرگىزىپ جاتىرمىز. پاريج قالاسىنىڭ مەرى انن يدالگومەن دوستىق پەن ىنتىماقتاستىق تۋرالى پاكتىگە قول قويىپ, بىرلەسكەن جوبالاردى جۇزەگە اسىرۋدى تالقىلادىق. ماسەلەن, نۇر-سۇلتاندا 30-دان استام فرانتسۋز كومپانياسى جۇمىس ىستەيدى. بۇل بىرلەسكەن ماڭىزدى جوبالاردى اشۋ جانە جەكە ينۆەستيتسيالاردى تارتۋ عانا ەمەس, سول سياقتى قوسىمشا جۇمىس ورىندارىن قۇرۋ بولىپ سانالادى.
بىرلەسكەن جوبالار سانىن كەڭەيتەتىن بولامىز. سونىمەن بىرگە ەلوردامىزدا فرانتسيانىڭ جەكە ينۆەستيتسيالارى ەسەبىنەن جەكە مەكتەپ سالۋ تۋرالى كەلىسىمگە كەلدىك. سونداي-اق مۋزەيلەر ۇجىمىن كەلەسى جىلى كورمەلەرىمەن شاقىردىق, ولار ەلوردامىزدىڭ مادەني سالاسىن دامىتۋعا ءوز ۇلەسىن قوساتىنى ءسوزسىز» دەپ جازدى ەلوردا اكىمى ءوزىنىڭ الەۋمەتتىك پاراقشاسىندا.
