مەرەكە قارساڭىندا قالا اكىمى يمانعالي تاسماعامبەتوۆ استانالىق ارداگەرلەرگە پاتەر كىلتىن تابىستادى. كوممۋنالدىق تۇرعىن ءۇي قورىنان پاتەر الۋعا ءوتىنىش بىلدىرگەن سوعىس ارداگەرلەرى مەرەيلى مەرەكەنى جاڭا باسپانادا قارسى الاتىن بولدى.
– ەڭ الدىمەن سىزدەردى وتان قورعاۋشىلار كۇنىمەن جانە ۇلى جەڭىستىڭ 69 جىلدىعىمەن شىن جۇرەكتەن قۇتتىقتايمىن. بۇل, ەڭ الدىمەن, ەلدىك پەن ەرلىكتىڭ جەڭىسى. سوناۋ سۇراپىل جىلداردا ەرلىگىمەن كوزگە ءتۇسىپ, وتان قورعاۋ جولىندا جانپيدا قىلعان ارداگەرلەرىمىزدى قۇرمەتتەۋ – بۇگىنگى ۇرپاق الدىنداعى ابىرويلى پارىز. ءبۇگىندە ەلباسىنىڭ ساليقالى ساياساتىنىڭ ارقاسىندا ارداگەرلەرگە بارىنشا قامقورلىق جاسالۋدا. سونىڭ ءبىر عانا كورسەتكىشىن ايتار بولساق, وسى استانادا ارداگەرلەر تولىقتاي پاتەرمەن قامتاماسىز ەتىلگەن. بەيبىت ءومىردىڭ بەرەكەسىنە اينالعان ابزال مايدانگەرلەر بارلىق قۇرمەتكە لايىق. ولاردىڭ كورگەن سوعىسى مەن بەينەتىن بۇگىنگى ۇرپاقتارى كورمەسىن, – دەپ تىلەگىن ءبىلدىردى قالا باسشىسى يمانعالي تاسماعامبەتوۆ.
ەلوردادا ۇلى وتان سوعىسىنىڭ ارداگەرلەرى تۇگەلدەي باسپانامەن قامتىلعان. ماسەلەن, 2009-2013 جىلدار ارالىعىندا 218 مايدانگەر جاڭا باسپاناعا يە بولدى. سونىمەن قاتار, اعىمداعى جىلى باسپاناسىن جوندەۋدى قاجەت ەتەتىن ارداگەرلەردىڭ ءوتىنىشى اكىمدىك تاراپىنان قولعا الىنۋدا. الەۋمەتتىك كومەك رەتىندە استانالىق 258 ارداگەردىڭ كوممۋنالدىق قىزمەتاقىلارىن تولەۋ, قوعامدىق كولىكتەردە تەگىن ءجۇرۋدى قامتاماسىز ەتۋ, شيپاجايلارعا تەگىن ەمدەلۋ قاراستىرىلعان.
سونىمەن, جاڭا باسپاناعا يە بولعانداردىڭ قاتارىندا قۇبايدوللا سادىربەكوۆ, پەشىمباي نۇرىمبەتوۆ, نۇرماحان الپىسباەۆ جانە قابيمولدا سەيىتوۆ بار.
– استانانىڭ تورىندە تۇرۋ ويىمدا دا بولماعان. «بەينەتتىڭ زەينەتىن كورۋ» وسى شىعار. بىزگە وسىنداي قۇرمەت كورسەتكەن قالا اكىمدىگىنە ريزامىن, – دەيدى قارت مايدانگەر نۇرماحان الپىسباەۆ.
گۇلميرا شارحانقىزى
