ۇلتىمىزدىڭ ۇلىلىعى شىعار, اتا-اناسىز قالعان بالانى قاڭعىتىپ ءجىبەرمەگەن حالىقپىز. ءوزىنىڭ پەرزەنتىن عانا ەمەس, وزگەنىڭ دە بالاسىن باۋىرىنا باسىپ, اتا-انالىق مەيىرىمىن توگىپ, پاتروناتتىق تاربيەگە العان جانداردىڭ قاتارى سوڭعى كەزدە كوبەيىپ كەلەدى.
بۇگىندە ەلىمىزدە 38 مىڭ بالاعا قامقورلىق كورسەتىلەدى ەكەن. ونىڭ 2267-ءسى پاتروناتتىق تاربيەلەۋگە بەرىلگەن.
جالپى, اتا-اناسىنىڭ قامقورلىعىنسىز قالعان
بالالاردى تاربيەلەۋدىڭ ءتورت ءتۇرى بار, ول – بالانى اسىراپ الۋ, تۋىستارىنا قامقورلىققا بەرۋ, ينتەرناتتىق مەكەمەگە ورنالاستىرۋ جانە پاتروناتتىق تاربيەگە الۋ.
پاتروناتتىق تاربيە دەپ, بالانى جاڭا وتباسىنا بەيىمدەۋدىڭ ءبىر ءتۇرىن ايتادى. بۇل تۋرالى ەرەجە 1999 جىلى 9 قىركۇيەكتە قابىلدانعان. جەتىمدىكتىڭ الدىن الۋدا جانە بالانىڭ اينالاسىنداعى ادامدارمەن تۇراقتى تۇردە قارىم-قاتىناس جاساۋىنا, سونداي-اق, پسيحيكاسىنىڭ دۇرىس دامۋىنا بۇل تاربيەنىڭ اسەرى مول.
ارينە, بالا ءۇشىن وتباسىنىڭ ورنى بولەك. ول اتا-انانىڭ ايالى الاقانىن, شىنايى قامقورلىعىن سەزىنىپ ءوسۋى قاجەت. وسىعان وراي جەتكىنشەكتەردى ارنايى وتباسىلارعا پاتروناتتىق تاربيەگە بەرۋدى ودان ءارى جەتىلدىرۋ قاجەت دەپ ويلايمىن. ءويتكەنى, بالا ينتەرناتتا قانشا جەردەن ءبىلىم, ءتاربيە العانىمەن, بولاشاق ومىرگە, وتباسىلىق جاعدايعا بەيىمدەلىپ وسە المايدى. ال, تاعدىر تاۋقىمەتىن جاستايىنان تاتقان, اتا-انا مەيىرىمىنە بولەنبەگەن بالا جاتباۋىر بولىپ وسەدى. بالانىڭ تولىققاندى وتباسىندا تاربيەلەنۋى ونىڭ ومىرگە دەگەن كوزقاراسىن وزگەرتىپ قانا قويماي, بولاشاققا دەگەن سەنىمىن نىعايتاتىنى ءسوزسىز.
پاتروناتتىق تا ءپاتريوتيزمنىڭ ءبىر ءتۇرى. ءوز ۇلتىنا جانى اشىعان ادام جەتىم بالانىڭ جانىنا جالاۋ بولا الادى. بالالار ۇيىنە مەملەكەت تاراپىنان قولداۋ جەتكىلىكتى دەسەك تە, اتا-انانىڭ مەيىرىمى جەتپەي جاتادى. سوندىقتان, جۇرەگى كەڭ, جاعدايى بار ازاماتتار بالالار ۇيىنەن قامقورلىققا, پاتروناتتىققا بالا الىپ جاتسا, جەتىمدەردىڭ سانى ازايار ەدى.
P.S. كەيبىر بالالار ءۇيىنىڭ رەسمي سايتتارىندا وتباسىن كۇتىپ, جاۋتەڭدەپ جۇرگەن بالاقايلاردىڭ سۋرەتتەرى جاريالانادى. «مەن ءسىزدى كۇتىپ ءجۇرمىن, ماما!» دەپ جازىلعان فوتونىڭ استىنا ولاردىڭ جاقسى قاسيەتتەرىن جىپكە ءتىزىپ قويعان. كىشكەنتايىنان جەتىمدىكتىڭ اششى ءدامىن تاتقان مۇنداي بالاقايلاردىڭ سانى ازا-يىپ, مەيىرىمى شەكسىز جانداردىڭ ماحابباتىنا ەرتەرەك بولەنسە ەكەن دەپ تىلەيىك.
گۇلميرا ايماعامبەت
