ەلوردادا پوليتسەيلەر مەن قۇتقارۋشىلار بىرلەسىپ, 15 جەلتوقسان مەن 12 قاڭتار ارالىعىندا «پيروتەحنيكا» جەدەل-پروفيلاكتيكالىق ءىس-شاراسىن وتكىزىپ جاتىر.
نۇر-سۇلتان قالاسى تجد مەملەكەتتىك ءورت باقىلاۋ باسقارماسىنىڭ باسشىسى ەركىن وتارعالىمۇلى ونلاين-بريفينگ بارىسىندا قۇقىق قورعاۋ ورگاندارىنىڭ سەرتيفيكاتتالماعان پيروتەحنيكالىق بۇيىمدار تارالۋىنىڭ جولىن كەسۋ جانە جاڭا جىلدىق مەرەكەلەردە جازاتايىم وقيعالاردىڭ الدىن الۋ بويىنشا قابىلداپ جاتقان شارالارى تۋرالى ايتتى.
– پيروتەحنيكا – بۇل قاۋىپتى قۇرال, ول مەرەكەلىك وتشاشۋمەن قاتار ءورتتىڭ تۋىنداۋىنا عانا ەمەس, ادام دەنساۋلىعىنا دا ايتارلىقتاي زيان كەلتىرەدى. جاڭا جىلدىق مەرەكەلەردى وتكىزۋ كەزىندە قوعامدىق قاۋىپسىزدىكتى جانە قۇقىقتىق ءتارتىپتى قامتاماسىز ەتۋ, سونداي-اق جەكە جانە زاڭدى تۇلعالاردىڭ ازاماتتىق پيروتەحنيكالىق زاتتار اينالىمىنىڭ بەلگىلەنگەن قاعيدالارىن ساقتاعانىن باقىلاۋ ماقساتىندا پوليتسەيلەر قۇتقارۋشىلارمەن بىرلەسىپ, بازارلاردا سەرتيفيكاتتالماعان پيروتەحنيكالىق بۇيىمداردىڭ ستيحيالىق ساۋدا فاكتىلەرىن انىقتاپ, جولىن كەسەتىن ءىس-شارا وتكىزىپ جاتىر. اتالعان ءىس-شارانىڭ نەگىزگى ماقساتى – قوعامدىق قاۋىپسىزدىكتى قامتاماسىز ەتۋ, – دەدى باسقارما باسشىسى.
