ەلورداداعى «گراند استانا» تۇرعىن ءۇي كەشەنىنە كوشىپ كەلگەنىمىزگە بىرنەشە جىلدىڭ ءجۇزى بولدى. قالانىڭ قاق ورتاسىندا قونىس تەپكەندىكتەن, اينالامىزدا ءارلى-بەرلى سەرۋەنگە قولايلى جەرلەر كوپ-اق. اسىرەسە, پرەزيدەنتتىك ساياباققا بارۋدى ۇناتامىز. الايدا ءار بارعان سايىن قارىن اشتىرار كورىنىسكە كۋا بولىپ قايتاتىنىمىز شىندىق.
سولتۇستىك جاعىنان – بايتۇرسىنوۆ كوشەسىمەن, وڭتۇستىك جاعىنان – ناجىمەدەنوۆ كوشەسىمەن, باتىسىندا – اق وردامەن, ال شىعىسىندا بەيبىتشىلىك جانە كەلىسىم سارايىمەن شەكتەسىپ, وزەن جيەگىندە جاتقان بۇل پارك – بۇگىندە شاھارىمىزداعى ەڭ ءىرى ساياباق. ونىڭ اۋماعى 80 گەكتاردى قۇرايدى. ءوزى 2007 جىلى استانامىزدىڭ ون جىلدىق مەرەيتويىنا ورايلاستىرىلىپ اشىلىپتى. اتى دا, زاتى دا دارداي پاركتەگى سۋبۇرقاق-گۇلزارلار, ءتىپتى, جول جيەگىنە, وزەن جاعاسىنا ورناتىلعان ورىندىقتاردىڭ ماتەريالىنان-اق ءاۋ باستا از قارجى جۇمسالماعانىن بايقاۋعا بولادى. بىراق ساياباقتىڭ بۇگىنگى كورىنىسىن كورگەندە, سول اقشانىڭ ەسىل كەتكەنى مە دەپ قارنىڭ اشادى.
مۇنداعى كوزگە تۇسەتىن ەڭ ءبىرىنشى نارسە – جايراپ جاتقان قوقىس قالدىقتارى. اۋزى-مۇرنىنان شىعىپ تۇرعان قوقىس جاشىكتەرى ۋاقىتىلى تازارتىلمايتىنى كورىنىپ تۇر. نەگىزى, جاشىكتىڭ تولى ەكەنىن كورىپ, بوساعان بوتەلكەڭدى سومكەڭە سالىپ الىپ, باسقا جەردەگى جاشىككە دە تاستاۋعا بولادى عوي. ونداي مادەنيەتتىڭ بىزدە قالىپتاسۋى ءۇشىن قانشا جىل كەرەك ەكەنىن بىلمەيمىن. ايتكەنمەن, قىزىعى, پسيحولوگيا عىلىمىندا تۇرعىنداردىڭ وسىنداي قىلىعىن تۇسىندىرەتىن «سىنىق تەرەزە تەورياسى» بار ەكەن. ول تۇسىنىك بويىنشا, الدەبىر جەردە تارتىپسىزدىك كورىنىس تاپسا, ونى دەرەۋ جويۋ كەرەك, ال يدەال نۇسقاسىندا سول تارتىپسىزدىكتىڭ الدىن الۋ قاجەت. ويتكەنى ءدال جاڭاعى ءبىرىنشى يمپۋلس تارتىپسىزدىكتى ودان ارى قاراي جالعاستىرادى. ياعني ءبىزدىڭ جاعدايىمىزعا كەلسەك, شاشىلىپ جاتقان قوقىستى كورگەن ادامداردا «ە-ە-ە, مىنا جەردىڭ يەسى جوق ەكەن, قوقىستارى جايراپ جاتىر, دەمەك مۇنداي ارەكەت جاساۋعا بىزگە دە رۇقسات» دەگەن وي پايدا بولادى. پاركتەگى قيراعان ورىندىقتار تۋرالى دا وسىنى ايتۋعا بولادى.
قورىتا كەلگەندە ايتپاعىم, قالامىزدىڭ تاپ-تاماشا ساياباعى يەسىز قالماي, ءبىر ورگاننىڭ قاراۋىنا بەرىلسە ەكەن. تۇراقتى تۇردە رەتكە كەلتىرىلىپ تۇرعان دۇنيەگە باسقالار دا جاناشىرلىقپەن قاراي باستايدى دەپ ويلايمىن. سونىمەن قاتار, قازىر ەلوردادا ەكولوگيالىق ەستافەتا ءوتىپ جاتىر. ءتۇرلى ۇيىم وكىلدەرى بىرلەسىپ نەمەسە, تىم بولماعاندا, وسى ماڭداعى تۇرعىنداردى جاقىن ماڭداعى كەگوك, ۇلتتىق مۋزەي سياقتى ۇلكەن ۇجىمداردى جۇمىلدىرىپ, ءبىر سەنبىلىكتە پرەزيدەنتتىك ساياباق اۋماعىن قالدىقتان تازارتۋدى ۇيىمداستىرسا دەگەن دە تىلەك بار.
انۋاربەك امانات,
زەينەتكەر
